ਚੰਡੀਗੜ੍ਹ: ਚੰਨੀ ਸਰਕਾਰ (Channi Govt.) ਨੇ ਅਨਿਰੁੱਧ ਤਿਵਾੜੀ (Anirudh Tiwari) ਨੂੰ ਮੁੱਖ ਸਕੱਤਰ (Chief Secretary) ਲਗਾਇਆ ਹੈ। ਵਿੰਨੀ ਮਹਾਜਨ (Vinni Mahajan) ਨੂੰ ਇਸ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਹੈ। ਉਹ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ (Captain Amrinder Singh) ਦੇ ਚਹੇਤੇ ਅਫਸਰਾਂ ਵਿੱਚੋਂ ਇੱਕ ਸੀ। ਸਰਵੇਸ਼ ਕੌਸ਼ਲ ਉਪਰੰਤ ਕਈ ਆਈਏਐਸ ਕਤਾਰ ਵਿੱਚ ਸੀ ਪਰ ਕੈਪਟਨ ਅਮਰਿੰਦਰ ਸਿੰਘ ਨੇ ਵਿੰਨੀ ਮਹਾਜਨ ਨੂੰ ਮੁੱਖ ਸਕੱਤਰ ਦੇ ਅਹੁਦੇ ‘ਤੇ ਵਿਰਾਜਮਾਨ ਕੀਤਾ ਸੀ।
ਸਲਾਹਕਾਰ ਹਟਾਏ, ਸਹੂਲਤਾਂ ਵਾਪਸ ਮੰਗੀਆਂ
ਦੂਜੇ ਪਾਸੇ ਕੈਪਟਨ ਦੇ ਸਾਰੇ ਓਐਸਡੀਜ਼ ਤੇ ਸਲਾਹਕਾਰਾਂ ਨੂੰ ਵੀ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਹਟਾ ਦਿੱਤਾ ਹੈ। ਉਨ੍ਹਾਂ ਨੂੰ 15 ਦਿਨਾਂ ‘ਚ ਸਰਕਾਰੀ ਰਿਹਾਇਸ਼ਾਂ ਖਾਲੀ ਕਰਨ ਦਾ ਹੁਕਮ ਵੀ ਦੇ ਦਿੱਤਾ ਗਿਆ ਹੈ, ਹਾਲਾਂਕਿ ਇੱਕ ਓਐਸਡੀ ਵੀ.ਕੇ.ਗਰਗ ਨੂੰ ਮੁੜ ਅਹੁਦਾ ਦੇ ਦਿੱਤਾ ਗਿਆ ਹੈ।
ਪਹਿਲੇ ਮਹਿਲਾ ਸੀਐਸ ਰਹੇ ਵਿੰਨੀ ਮਹਾਜਨ
ਜਿਕਰਯੋਗ ਹੈ ਕਿ ਵਿੰਨੀ ਮਹਾਜਨ ਪਹਿਲੇ ਮਹਿਲਾ ਮੁੱਖ ਸਕੱਤਰ ਸੀ। ਉਨ੍ਹਾਂ ਦੀ ਮੁੱਖ ਸਕੱਤਰ ਵਜੋਂ ਨਿਯੁਕਤੀ ਵੇਲੇ ਵੀ ਕਈ ਸੀਨੀਅਰ ਆਈਏਐਸ ਅਫਸਰਾਂ ਦੀਆਂ ਉਮੀਦਾਂ ‘ਤੇ ਪਾਣੀ ਫਿਰ ਗਿਆ ਸੀ। ਵਿੰਨੀ ਮਹਾਜਨ ਦੇ ਮੁੱਖ ਸਕੱਤਰ ਬਣਾਏ ਜਾਣ ਵੇਲੇ ਇਹ ਵੀ ਸੁਰਾਂ ਉਠੀਆਂ ਸੀ ਕਿ ਉਨ੍ਹਾਂ ਦੇ ਪਤੀ ਦਿਨਕਰ ਗੁਪਤਾ ਪੰਜਾਬ ਦੇ ਡੀਜੀਪੀ ਹਨ ਤੇ ਦੋਵੇਂ ਪਤੀ-ਪਤਨੀ ਨੂੰ ਸਰਵ ਉੱਚ ਅਹੁਦਿਆਂ ‘ਤੇ ਇਕੱਠਿਆਂ ਨਹੀਂ ਬਿਠਾਇਆ ਜਾ ਸਕਦਾ ਪਰ ਤੱਤਕਾਲੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਸੇ ਦੀ ਪਰਵਾਹ ਨਾ ਕਰਦਿਆਂ ਦਿਨਕਰ ਗੁਪਤਾ ਦੇ ਡੀਜੀਪੀ ਹੁੰਦਿਆਂ ਹੋਏ ਵੀ ਉਨ੍ਹਾਂ ਦੇ ਪਤਨੀ ਵਿੰਨੀ ਮਹਾਜਨ ਨੂੰ ਮੁੱਖ ਸਕੱਤਰ ਲਗਾ ਦਿੱਤਾ ਸੀ ਤੇ ਹੁਣ ਕੈਪਟਨ ਦੇ ਚਹੇਤੇ ਅਫਸਰਾਂ ਨੂੰ ਨਿਸ਼ਾਨੇ ‘ਤੇ ਲੈਂਦਿਆਂ ਚੰਨੀ ਸਰਕਾਰ ਨੇ ਵਿੰਨੀ ਮਹਾਜਨ ਨੂੰ ਇਸ ਅਹੁਦੇ ਤੋਂ ਹਟਾ ਦਿੱਤਾ ਹੈ।