ବୋଲବମ ଧ୍ୱନିରେ ପ୍ରକମ୍ପିତ ବାବା ଆଖଣ୍ଡଳମଣିଙ୍କ ପୀଠ, ହଜାର ହଜାର ଶ୍ରଦ୍ଧାଳୁଙ୍କ ସମାଗମ
ଭଦ୍ରକ: ଆଜି ପବିତ୍ର ଶ୍ରାବଣ ସୋମବାରରେ ଆରଡିପୀଠ ବାବା ଆଖଣ୍ଡଳମଣିଙ୍କୁ ଜଳଲାଗି କରିବା ପାଇଁ ରାଜ୍ୟ ଓ ରାଜ୍ୟ ବାହାରୁ ହଜାର ହଜାର କାଉଡିଆଙ୍କ ଭିଡ ଜମିଥିଲା । ପୀଠରେ ପ୍ରଚଳିତ ବିରଜା ପଞ୍ଜିକା ଅନୁଯାୟୀ ପୀଠରେ ଆଉଗୋଟେ ସୋମବାର ପାଳନ ହେବ ବୋଲି ସୂଚନା ମିଳିଛି । କିନ୍ତୁ ପୂର୍ଣ୍ଣିମା ପୂର୍ବରୁ ଆଜି ଶେଷ ସୋମବାର ହୋଇଥିବାରୁ କାଉଡିଆଙ୍କ ନାହିଁ ନଥିବା ଭିଡ ଲାଗି ରହିଥିଲା । କାଉଡିଆଙ୍କ ଭିଡକୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ପାଇଁ ଜଣେ ମାଜିଷ୍ଟ୍ରେଟଙ୍କ ସମେତ ଜଣେ ଏଏସପି, ୬ ଜଣ ଡିଏସପି, ୨୦ ଜଣ ଇନସପେକ୍ଟର, ୮ ପ୍ଲାଟୁନ ଫୋର୍ସ ଓ ଟ୍ରାଫିକ ପୋଲିସ ନିୟୋଜିତ ହୋଇଥିଲେ । ପୀଠକୁ ଆସୁଥିବା ଅଧିକାଂଶ ଭକ୍ତ ଜଳପଥରେ ଡଙ୍ଗା ଦ୍ବାରା ନଈ ପାରିହୋଇ ଆସୁଥିବାରୁ ସୁରକ୍ଷା ନିମନ୍ତେ ନଦୀ ମଧ୍ୟରେ ଓଡ୍ରାଫ ଓ ଅଗ୍ନିଶମ ବିଭାଗ ପକ୍ଷରୁ ବୋଟ ଦ୍ବାରା ପଇଁତରା ଦିଆଯାଇଥିଲା । ଇଟିଭି ଭାରତ, ଭଦ୍ରକ