ସ୍କୁଲ ଭିତରେ ୨ ଫୁଟ ବନ୍ୟା ପାଣି, ପରୀକ୍ଷା ନଦେଇ ଫେରିଲେ ଛାତ୍ରଛାତ୍ରୀ
ଭଦ୍ରକ: ସ୍କୁଲ ଭିତରେ ଚାଲିଛି ଦୁଇ ଫୁଟର ପାଣି । ଅଣ୍ଟାଏ ପାଣିରେ ପରୀକ୍ଷା ଦେବା ପାଇଁ ଆସିଥିଲେ ଛାତ୍ରଛାତ୍ରୀ । ବନ୍ୟା ପାଇଁ ବିଦ୍ୟାଳୟରେ ପରୀକ୍ଷା ହୋଇପାରି ନଥିବାରୁ ଛାତ୍ରଛାତ୍ରୀ ଘରକୁ ଫେରିଛନ୍ତି । ଏଭଳି ସ୍ଥିତି ଦେଖିବାକୁ ମିଳିଛି ଭଦ୍ରକ ଜିଲ୍ଲା ଧାମନଗର ବ୍ଲକ କାସିମପୁର ପଞ୍ଚାୟତ ହେମେନ୍ଦ୍ର ନାଥ ଉଚ୍ଚ ବିଦ୍ୟାଳୟରେ । ବନ୍ୟା ଜଳ ଘେରରେ ବିଦ୍ୟାଳୟଟି ରହିଥିବା ବେଳେ କେଉଁଭଳି ଶିକ୍ଷକ ପରୀକ୍ଷା କରୁଥିଲେ ତାହା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏନେଇ ବିଭାଗୀୟ ଅଧିକାରୀ କିମ୍ବା ଜିଲ୍ଲା ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ । ତେବେ ବ୍ଲକରେ ବନ୍ୟା ପରିସ୍ଥିତିକୁ ଦୃଷ୍ଟିରେ ରଖି ମଣ୍ଡଳ ଶିକ୍ଷାଧିକାରୀମାନେ ନିଜ ଅଞ୍ଚଳରେ ଛୁଟି ଘୋଷଣା କରିପାରିବେ ବୋଲି ଜିଲ୍ଲାପାଳଙ୍କ ନିର୍ଦ୍ଦେଶ ରହିଥବା ସୂଚନା ମିଳିଛି । ଇଟିଭି ଭାରତ, ଭଦ୍ରକ