ଜମିବାଡି ବିବାଦର କରୁଣ କାହାଣୀ: 3 ପରିବାରର ଘର ଜାଳିଦେଲେ ଗାଁ ଲୋକେ

ବ୍ରହ୍ମଗିରି: ଜମିବାଡିକୁ କେନ୍ଦ୍ର କରି 3ଟି ଘରେ ନିଆଁ ଲଗାଇଲେ ଗ୍ରାମବାସୀ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବ୍ରହ୍ମଗିରି ଥାନା ଅନ୍ତର୍ଗତ କଣ୍ଡଗଦା ଗ୍ରାମ ପଞ୍ଚାୟତର ମନାପୁର ଗ୍ରାମରେ । ସୂଚନାମୁତାବକ, ଉକ୍ତ ଗ୍ରାମର ପୂର୍ଣ୍ଣ ବାରିକ,ଆନନ୍ଦ ବାରିକ ଓ କେଲୁ ବାରିକଙ୍କ ସହିତ ଗ୍ରାମର କିଛି ଲୋକଙ୍କ ଜମିଜମାକୁ ନେଇ ବହୁ ଦିନ ହେବ ବିବାଦ ଲାଗି ରହିଥିଲା । ଫଳରେ ରବିବାର ଦିନ ଗ୍ରାମବାସୀ ମାନେ ଆସି ଏହି 3 ବାରିକ ପରିବାର ସହିତ ଝଗଡା କରିଥିଲେ। ତେବେ ଏହି ଝଗଡ଼ା ଏତେ ଉଗ୍ର ରୂପ ନେଇ ନେଇଥିଲା ଯେ, ଉତ୍ୟକ୍ତ ଗ୍ରାମବାସୀ ଘରେ ନିଆଁ ଲଗାଇବାକୁ ବି ପଛାଇ ନ ଥିଲେ । ଏହି 3 ପରିବାରର 3 ଜଣ ଆହତ ହୋଇ ରେବଣା ନୂଆ ଗାଁ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି । ଏପରିକି ଯେତେବେଳେ ପଡୋଶୀ ଗ୍ରାମର ଲୋକମାନେ ନିଆଁକୁ ଆୟତ କରିବା ପାଇଁ ଆସୁଥିଲେ, ସେତେବେଳେ ମନାପୁର ଗ୍ରାମବାସୀ ତାଙ୍କୁ ବାରଣ କରିଥିବା ଜଣାପଡ଼ିଛି । ଅପର ପକ୍ଷେ ନିଆଁ ଲଗାଇଥିବା ଘଟଣାକୁ ଗ୍ରାମବାସୀଙ୍କ ପକ୍ଷରୁ ଖଣ୍ଡନ କରାଯାଇଛି । ଏନେଇ ବ୍ରହ୍ମପୁର ଥାନାରେ ଅଭିଯୋଗ ହୋଇଛି ।