ପଞ୍ଚାୟତ ନିର୍ବାଚନରେ ନିଆରା ଦୃଶ୍ୟ: ପ୍ରାର୍ଥୀଙ୍କ ପାଇଁ ପ୍ରଚାର କଲେ ବିଦେଶୀ ମହିଳା - ପଞ୍ଚାୟତ ନିର୍ବାଚନ ପ୍ରଚାରରେ ବିଦେଶିନୀ
ପୁରୀ: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ନେଇ ପ୍ରାର୍ଥୀମାନେ ଜୋରଦାର ପ୍ରଚାର ଚଳାଇଥିବା ବେଳେ ପୁରୀ ସଦର ବ୍ଳକ କାଶୀହରିପୁର ପଞ୍ଚାୟତରେ ଦେଖିବାକୁ ମିଳିଛି ନିଆରା ଦୃଶ୍ୟ। ଏଠାରେ ଜଣେ ବିଦେଶିନୀ ନିର୍ବାଚନ ପ୍ରଚାରରେ ପ୍ରାର୍ଥୀଙ୍କ ପାଇଁ ଓହ୍ଲାଇଛନ୍ତି। ଫ୍ରାନ୍ସର ବାସିନ୍ଦା ତଥା ଦୀର୍ଘ 8 ବର୍ଷ ଧରି ପୁରୀରେ ବସବାସ କରି ଆସୁଥିବା ବିଦେଶିନୀ ଏଜାନବେଲ ସରପଞ୍ଚ ପ୍ରାର୍ଥୀ ମୁକ୍ତିକାନ୍ତ ପଣ୍ଡା ଓ ସମିତି ସଭ୍ୟ ପ୍ରାର୍ଥୀ ପ୍ରଦୀପ୍ତ କୁମାର ଘଟୁଆରୀଙ୍କ ସପକ୍ଷରେ ଭୋଟ ଭିକ୍ଷା କରିଛନ୍ତି। କାଶୀହରିପୁର ପଞ୍ଚାୟତ ବାସୀ ଏହି ଦୁଇ ପ୍ରାର୍ଥୀଙ୍କୁ ବିପୁଳ ସଂଖ୍ୟାରେ ଭୋଟ ଦେଇ ଜୟଯୁକ୍ତ କରାନ୍ତୁ ବୋଲି ଘରକୁ ଘର ବୁଲି ଚକଲେଟ୍ ଦେଇ ଭୋଟରଙ୍କୁ ଅନୁରୋଧ କରୁଛନ୍ତି। ବିଦେଶିନୀଙ୍କ ଏହି ନିଆରା ପ୍ରଚାର ଏବେ ପୁରୀ ସଦରରେ ଚର୍ଚ୍ଚାର ବିଷୟ ପାଲଟିଛି। ବିଦେଶିନୀ ମହିଳା ଜଣକ ଉକ୍ତ ପଞ୍ଚାୟତର ଏକ ନମ୍ବର ୱାର୍ଡରେ ରହୁଛନ୍ତି। ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ