ଜଙ୍ଗଲକୁ ଛେଳି ଚରାଇବାକୁ ଯାଇଥିଲେ, ଆକ୍ରମଣ କଲା ବାଘ
ଅନୁଗୋଳ: ଅନୁଗୋଳରେ ବାଘ ଆତଙ୍କ । ବାଘ ଆକ୍ରମଣ ଆଜି ଦୁଇଜଣ ଗୁରୁତର ଭାବେ ଆହତ ହୋଇଛନ୍ତି । ସେମାନେ ହେଲେ ଜନକ ବେହେରା ଓ ନେକୁରି ବେହେରା । ଅନୁଗୋଳ ବନଖଣ୍ଡ ବନାଞ୍ଚଳର କୃଷ୍ଣଚକ୍ରଗଡ ଗାଁ ପାଖ ଜଙ୍ଗଲରେ ଘଟିଛି ଏହି ଘଟଣା । ଗାଁ ଲୋକେ ଆଜି ପାଖ ଜଙ୍ଗଲକୁ ଛେଳି ଚରାଇବାକୁ ଯାଇଥିବା ବେଳେ ସେଠାରେ ତାଙ୍କୁ ବାଘ ଆକ୍ରମଣ କରିଥିଲା ।
ଲୋକଙ୍କ କହିବା ମୁତାବକ ହଠାତ ଏକ କଲରାପତରିଆ ବାଘ ଜନକ ଉପରକୁ ଆକ୍ରମଣ କରିଥିଲା । ତାଙ୍କ ଗୋଡ଼ ଓ ହାତକୁ କାମୁଡି ଦେଇଥିବା ବେଳେ ପାଖରେ ଥିବା ନେକୁରିକୁ ମଧ୍ୟ ସେ ଆକ୍ରମଣ କରିଥିଲା । ଉଭୟ ପାଖରେ ଥିବା ବାଡ଼ି ଓ ଟାଙ୍ଗିଆ ରେ ବାଘକୁ ଘଉଡେଇବାକୁ ଚେଷ୍ଟା କରିଥିଲେ । ଅନ୍ୟ ଛେଳି ଚରାଳିମାନେ ପାଟିତୁଣ୍ଡ କରିବାରୁ ବାଘଟି ଚାଲିଯାଇଥିଲା । ଗାଁ ଲୋକେ ଉଭୟଙ୍କୁ ଅନୁଗୋଳ ଡାକ୍ତର ଖାନାରେ ଚିକିତ୍ସା ପାଇଁ ଭର୍ତ୍ତି କରାଇଛନ୍ତି । ଖବର ପାଇ ବନବିଭାଗ ମଧ୍ୟ ଘଟଣା ସ୍ଥଳରେ ଓ ହସ୍ପିଟାଲରେ ପହଁଚି ଅଧିକ ତଦନ୍ତ କରିଛି । ତେବେ ଦିନ ସମୟ ଗାଁ ଜଙ୍ଗଲରେ ବାଘ ବାହାରିବା ଓ ଆକ୍ରମଣ କରିବା ଘଟଣା ଘଟିବା ପରେ ସ୍ଥାନୀୟ ଲୋକେ ଭୟଭୀତ ଅଛନ୍ତି ।
ଇଟିଭି ଭାରତ, ଅନୁଗୋଳ