ସମ୍ପର୍କୀୟଙ୍କ ମୃତ୍ୟୁ ପରେ କୋକେଇ କାନ୍ଧେଇବାକୁ ଯାଉଥିଲେ ଶ୍ୱଶୁର-ଜ୍ବାଇଁ, ଚାପିଦେଲା ଟ୍ରକ - ବାଇକକୁ ପିଟିଲା ଟ୍ରକ

ନବରଙ୍ଗପୁର: ନବରଙ୍ଗପୁର ଜିଲ୍ଲା ଅନ୍ତର୍ଗତ ରାଇଘର ବ୍ଲକ ସଦର ମହକୁମାରେ ଅବସ୍ଥିତ ଡାକଘର ସମ୍ମୁଖ ରାସ୍ତାରେ ଘଟିଛି ଏକ ମର୍ମନ୍ତୁଦ ସଡକ ଦୁର୍ଘଟଣା । ରାଇଘର ଦେଇ ଛତିଶଗଡ଼କୁ ସଂଯୋଗ କରୁଥିବା ରାଜ୍ୟ ରାଜପଥରେ ଏହି ସଡକ ଦୁର୍ଘଟଣା ଘଟି ଶ୍ୱଶୁର ଓ ଜ୍ବାଇଁଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି । ଖବର ଅନୁଯାୟୀ,ରାଇଘର ବ୍ଲକ ଅନ୍ତର୍ଗତ ଗୋନା ଗ୍ରାମ ପଞ୍ଚାୟତର ଭୀମାଟିକରା ଗ୍ରାମର ଲକ୍ଷଣ ଜାନୀ(30)ଙ୍କ ପିଉସୀର ଗତକାଲି ରାତିରେ ମୃତ୍ୟୁ ଘଟିଥିଲା l ଆଜି ଶୁଦ୍ଧିକ୍ରିୟା ଥିବାରୁ ଗଞ୍ଜାପାରା ଗ୍ରାମପଞ୍ଚାୟତର ମାରଙ୍ଗପାଲି କଲୋନୀରେ ରହୁଥିବା ନିଜ ଶଶୁର ଘରକୁ ବୁଲିବାକୁ ଆସିଥିବା ଜ୍ବାଇଁ ଖବର ପାଇ ଶଶୁର ବାଲି ଜାନୀ(65)ଙ୍କୁ ସଙ୍ଗରେ ନେଇ ନିଜ ଗ୍ରାମକୁ ଯିବାକୁ ବାହାରି ଥିଲେ l

ଏହା ମଧ୍ୟ ପଢନ୍ତୁ ...କାର ବାଇକ ଧକ୍କା: ଦୁର୍ଘଟଣା ଘଟାଇ କାର ଡ୍ରାଇଭର ଫେରାର, ବାଇକ ଚାଳକ ମୃତ

ଆଜି ଏକ ବାଇକ ଯୋଗେ ଯିବା ସମୟରେ ରାଇଘର ମୁଖ୍ୟ ବଜାର ଉପରେ ଅବସ୍ଥିତ ଡାକଘର ସମ୍ମୁଖରେ ଏକ ନୂତନ ଟ୍ରକ ଚକ ତଳେ ପଡି ଯାଇଥିଲେ l ଫଳରେ ଘଟଣାସ୍ଥଳରେ ହିଁ ଶ୍ୱଶୁର ଜ୍ବାଇଁଙ୍କ ମୃତ୍ୟୁ ଘଟିଥିଲା l ରାଇକିଆ ଥାନାରୁ ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ଘଟାଇ ଥିବା ଟ୍ରକକୁ ଅଟକ ରଖିଥିବା ବେଳେ ଶବ ଉଦ୍ଧାର କରି ମେଡିକାଲକୁ ସ୍ଥାନାନ୍ତର କରି ତଦନ୍ତ ଜାରି ରଖିଛନ୍ତି l ପରିବାର ଲୋକେ ମେଡିକାଲକୁ ପହଞ୍ଚି ଥିବା ବେଳେ ଶବ ବ୍ୟବଚ୍ଛେଦ ପରେ ସେମାନଙ୍କୁ ହସ୍ତାନ୍ତର କରାଯିବ ବୋଲି ସୂଚନା ମିଳିଛି l

ଇଟିଭି ଭାରତ, ନବରଙ୍ଗପୁର