Watch: ବିପଦରେ ଛାତ୍ରଛାତ୍ରୀଙ୍କ ଜୀବନ, ଡଙ୍ଗାରେ ପାରି ହୋଇ ଯାଉଛନ୍ତି ସ୍କୁଲ

ପାଟନା:ବନ୍ୟା ଓ ବିହାରର ଯେପରି ପରସ୍ପରର ପରିପୂରକ । ପ୍ରତିବର୍ଷ ବିହାରରେ ବନ୍ୟା ଆସିଥାଏ । ନେପାଳରୁ ବନ୍ୟା ପାଣି ନିଷ୍କାସନ ହେବାପରେ ବିହାରର ନଦୀଗୁଡ଼ିକ ସ୍ଥାନୀୟ ବାସୀଙ୍କୁ ଭୟଭୀତ କରାଏ । ଏହାରି ଭିତରେ ଆସିଛି ଏକ ଭୟଙ୍କର ଦୃଶ୍ୟ । ବିପଦରେ ପଡ଼ିଛି ଆସନ୍ତାକାଲିର ନାଗରିକ ତଥା ଛାତ୍ରଛାତ୍ରୀଙ୍କ ଜୀବନ । ବିଦ୍ୟାଳୟକୁ ପାଠ ପଢ଼ିବାକୁ ଯିବା ଲାଗି ଛାତ୍ରଛାତ୍ରୀ ଡଙ୍ଗାରେ ବିପଦସଙ୍କୁଳ ଭାବେ ଯାତ୍ରା କରୁଥିବା ଦେଖିବାକୁ ମିଳିଛି । ଡଙ୍ଗାରେ ଛାତ୍ରଛାତ୍ରୀଙ୍କ ସମେତ ସାଇକେଲ୍‌ ମଧ୍ୟ ବୁହା ହେଉଛି । ମୁଜ୍ଜଫରପୁର ବାଗମତି ନଦୀରେ ଏକ ଡଙ୍ଗା ଓଲଟି ପଡ଼ିଥିବା ବେଳେ ଏଥିରେ ଅନେକ ଛାତ୍ରଛାତ୍ରୀ ମଧ୍ୟ ଯାତ୍ରା କରୁଥିଲେ । ଏହାପରେ ବି ବେତିୟା ଅଞ୍ଚଳରୁ ଆସିଛି ସମାନ ଦୃଶ୍ୟ । ଏଠାରେ ବି ନଦୀ ପାର ହେବା ଲାଗି ସ୍କୁଲ୍‌ ଛାତ୍ରଛାତ୍ରୀମାନେ ଡଙ୍ଗାର ସହାୟତା ନେଉଛନ୍ତି । ସ୍କୁଲ୍‌ ଯିବା ଆସିବା କରିବା ଲାଗି ଛାତ୍ରଛାତ୍ରୀଙ୍କ ଏକମାତ୍ର ଭରସା ପାଲଟିଛି ଏହି ଡଙ୍ଗା । ପିଲମାନେ ନିଜ ଘର ପାଖରୁ ସାଇକେଲରେ ଆସିବା ପରେ ଡଙ୍ଗାରେ ନଦୀ ପାର ହୁଅନ୍ତି । ପୁଣି ସେପଟେ କୂଳରୁ ସାଇକେଲ ଚଲାଇ ସ୍କୁଲକୁ ଯାଇଥାଆନ୍ତି । ଛାତ୍ରଛାତ୍ରୀ ଭୟଭୀତ ଥିଲେ ବି କୌଣସି ସୁବିଧା ନଥିବାରୁ ଏପରି ବିପଦପୂର୍ଣ୍ଣ ଅବସ୍ଥାରେ ନଦୀ ପାର ହେଉଥିବା କହିଛନ୍ତି । ଅନେକ ଥର କାଠପୋଲ କି ବ୍ରିଜ୍‌ ନିର୍ମାଣ ଲାଗି ଦାବି ହେଉଥିଲେ ସୁଦ୍ଧା ପ୍ରଶାସନ କର୍ଣ୍ଣପାତ କରୁନଥିବା ଅଭିଯୋଗ ହୋଇଛି ।  

ବ୍ୟୁରୋ ରିପୋର୍ଟ, ଇଟିଭି ଭାରତ