ବନ୍ଧୁ ପରି ବନ୍ଧୁଟିଏ: ଗୌରୀଙ୍କୁ ଦାମୀ ଉପହାର ଦେଲେ ରାଷ୍ଟ୍ରପତି
Published : Nov 27, 2023, 1:06 PM IST
ଖୋର୍ଦ୍ଧା: ଗୌରୀଙ୍କୁ ଦାମୀ ଉପହାର ଦେଲେ ରାଷ୍ଟ୍ରପତି । ସାଙ୍ଗକୁ ଭେଟିବା ପାଇଁ ଗୌରାଙ୍କର ଥିବା ଦୀର୍ଘ ଦିନର ଆଶା ପୂରଣ ହୋଇଛି । ଏଥିରେ ସେତୁବନ୍ଧ ସାଜିଥିଲା ଗଣମାଧ୍ୟମ । ପିଲାଦିନର ସାଙ୍ଗ ଯିଏ ଏବେ ଭାରତର ସର୍ବୋଚ୍ଚ ପଦରେ ଅଛନ୍ତି କିଭଳି ତାଙ୍କୁ ଭେଟିବାକୁ ଚାହିଁଥିଲେ ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ଦୁର୍ଗାପୁର ଗ୍ରାମର ଗୋୖରୀ ମଲ୍ଲିକ । ଏ ସମ୍ପର୍କରେ ଇଟିଭି ଭାରତରେ ବାରମ୍ବାର ଆମେ ଖବର ପ୍ରକାଶ କରିଥିଲୁ । ଆଉ ଶେଷରେ ଗତକାଲି(ରବିବାର) ଓଡିଶା ରାଜଭବନ ପରିସରରେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଛନ୍ତି ପିଲା ଦିନର ସାଙ୍ଗ ଗୋୖରୀ ମଲ୍ଲିକ।
ବେଗୁନିଆ ବିଡ଼ିଓ ସରକାରୀ ଗାଡ଼ିରେ ଗୌରୀଙ୍କ ସହ ତାଙ୍କ ପରିବାର ସଦସ୍ୟଙ୍କୁ ସମ୍ମାନର ସହ ପାଛୋଟି ନେଇଥିଲେ । ରାଜ ଭବନ ପରିସରରେ ରାଷ୍ଟ୍ରପତିଙ୍କୁ ଭେଟିଛନ୍ତି ସପରିବାର । ରାଷ୍ଟ୍ରପତିଙ୍କୁ ଭେଟିବା ପରେ ଭାବବିହ୍ଵଳ ହୋଇପଡିଥିବା ଗୌରୀ କହିଥିବା ବେଳେ ପୁନର୍ବାର ତାଙ୍କୁ ଭେଟିବାକୁ ପ୍ରତିଶୃତି ଦେଇଥିବା ମଧ୍ୟ କହିଛନ୍ତି । ସେହିପରି ଫେରିବାବେଳେ ଗୌରୀଙ୍କୁ ଜଗନ୍ନାଥ, ବଳଭଦ୍ର ଓ ମା' ସୁଭଦ୍ରାଙ୍କ ବନ୍ଧେଇ ହୋଇଥିବା ବଡ଼ ପଟ୍ଟଚିତ୍ର ସହ ଦାମୀ ଶାଢ଼ୀ ଉପହାର ଦେଇଥିବା ଗୌରୀ କହିଛନ୍ତି । ଏହି ଭେଟଘାଟ ପାଇଁ ଗଣମାଧ୍ୟମ ଓ ସ୍ଥାନୀୟ ପ୍ରଶାସନକୁ ଧନ୍ୟବାଦ ଦେଇଛନ୍ତି ଗୌରୀ ।
ଇଟିଭି ଭାରତ, ଖୋର୍ଦ୍ଧା