କାଲିଠୁ ଗଡିବ ବନ୍ଦେ ଭାରତ ଏକ୍ସପ୍ରେସ, VCରେ ଉଦଘାଟନ କରିବେ ପ୍ରଧାନମନ୍ତ୍ରୀ - ଭିଡିଓ କନଫରେନ୍ସି ମାଧ୍ୟମରେ ଉଦଘାଟନ କରିବେ ମୋଦି
ପୁରୀ:ଆସନ୍ତାକାଲି ଠାରୁ ପୁରୀ-ହାୱଡା ମଧ୍ୟରେ ଗଡିବ ବନ୍ଦେ ଭାରତ ଏକ୍ସପ୍ରେସ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସି ମାଧ୍ୟମରେ ଆସନ୍ତାକାଲି ଏହାକୁ ଉଦଘାଟନ କରିବାର କାର୍ଯ୍ୟକ୍ରମ ରହିଛି। ଏହି ଭବ୍ୟ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରେଳମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ ସହ ବହୁ ବିଶିଷ୍ଟ ବ୍ୟକ୍ତି ଏଥିରେ ଯୋଗଦେବେ। ଏଥିପାଇଁ ପୁରୀ ରେଳ ଷ୍ଟେସନକୁ ଅତି ସୁନ୍ଦର ଭାବେ ସୁସଜ୍ଜିତ କରାଯାଇଥିବା ବେଳେ ୭ ଓ ୮ ନଂ ପ୍ଲାଟଫର୍ମରେ ରଙ୍ଗ ଦିଆଯାଇ ବିଭିନ୍ନ ପ୍ରକାରର ସାଜସଜ୍ଜା କରାଯାଇଛି। ଆସନ୍ତାକାଲି ୧୨ ଟା ୫୩ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭର୍ଚୁଆଲ୍ ମାଧ୍ୟମରେ ପତାକା ଦେଖାଇ ବନ୍ଦେ ଭାରତ ଏକ୍ସପ୍ରେସର ଉଦଘାଟନ କରିବେ। ତେବେ ଏହା ପୂର୍ବରୁ ରେଳ ବିଭାଗର ଜେନେରାଲ ମ୍ୟାନେଜର ଓ ଡିଆରଏମ୍ ଙ୍କ ସହ ବହୁ ବରିଷ୍ଠ ଅଧିକାରୀ ରେଳ ଷ୍ଟେସନ ଆସି ଅନୁଧ୍ୟାନ କରିଛନ୍ତି। ଆସନ୍ତାକାଲି ପୁରୀ -ହାୱଡା ବନ୍ଦେ ଭାରତ ଏକ୍ସପ୍ରେସ ଗଡିବାକୁ ଥିବାବେଳେ ସମସ୍ତେ ବେଶ୍ ଉତ୍ସାହିତ ଥିବା କହିଛନ୍ତି ରେଳ ବିଭାଗର ଜେନେରାଲ ମ୍ୟାନେଜର।
ଇଟିଭି ଭାରତ, ପୁରୀ