ଡିସେମ୍ବରରେ ରାଜ୍ୟସ୍ତରୀୟ ତାଇକୋଣ୍ଡ ଚମ୍ପିଆନସିପ, ଭାଗ ନେବେ 550ରୁ ଅଧିକ ପ୍ରତିଯୋଗୀ
Published : Nov 6, 2023, 4:30 PM IST
ବ୍ରହ୍ମପୁର: ଡିସେମ୍ବରରେ ବ୍ରହ୍ମପୁର ଠାରେ ଅନୁଷ୍ଠିତ ହେବାକୁ ଯାଉଛି ଦୁଇ ଦିନିଆ ରାଜ୍ୟସ୍ତରୀୟ ଟାବ୍ ଫେଷ୍ଟ । ରାଜ୍ୟସ୍ତରୀୟ ତାଇକୋଣ୍ଡ ଚମ୍ପିଆନସିପର ଏହି ପ୍ରତିଯୋଗିତାରେ ରାଜ୍ୟର ବିଭିନ୍ନ ଜିଲ୍ଲାରୁ ପ୍ରାୟ ୫୫୦ରୁ ଊର୍ଦ୍ଧ୍ୱ ପ୍ରତିଯୋଗୀ ଅଂଶଗ୍ରହଣ କରିବେ । ଏହି ପ୍ରତିଯୋଗିତା ସମୟରେ ଅନ୍ତଃ ରାଜ୍ୟ ଏବଂ ଜାତୀୟ ସ୍ତରରେ ତାଇକୋଣ୍ଡ ଖେଳିବା ପାଇଁ ଏଠାରେ କୃତି ପ୍ରତିଯୋଗୀଙ୍କୁ ଚୟନ କରାଯିବ ।
ଏହି ପ୍ରତିଯୋଗିତା ଡିସେମ୍ବର ୨୩ ଓ ୨୪ ତାରିଖ ଦୁଇ ଦିନଧରି ଅନୁଷ୍ଠିତ ହେବାକୁ ଥିବା ବେଳେ ଏନେଇ ଅନଲାଇନ୍ ଜରିଆରେ ପ୍ରତିଯୋଗୀମାନେ ବିଭିନ୍ନ ବର୍ଗରେ ନିଜର ପଞ୍ଜିକରଣ ଜାରି ରଖିଛନ୍ତି । ଏନେଇ ସହରର ହିଲପାଟଣା ସ୍ଥିତ ତାଇକୋଣ୍ଡ ଏସୋସିଏସନ୍ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ରାଜ୍ୟ ତାଇକୋଣ୍ଡ ଆସୋସିଏସନ୍ ପକ୍ଷରୁ ସୂଚନା ଦିଆଯାଇଛି । ସାମ୍ବାଦିକ ସମ୍ମିଳନୀରେ ଟାବ୍ ଫେଷ୍ଟର ଅଧ୍ୟକ୍ଷ କାର୍ତ୍ତିକ ଚନ୍ଦ୍ର ମହାପାତ୍ରଙ୍କ ସମେତ ରାୟଗଡାର କୋଚ୍ ଗଣେଶ ଚନ୍ଦ୍ର ମହାପାତ୍ର, କଳାହାଣ୍ଡିର କୋଚ୍ ବର୍ରୁ ବାହାନ ବୁଧୁଆ, ରବିନ୍ଦ୍ର କୁମାର ସାହୁ, ରାକେଶ ମହାପାତ୍ର, ଶିବରାଜ ରାଉତ, ରଞ୍ଜିତ କୁମାର ଶବର, ସତ୍ୟନାରାୟଣ ତ୍ରିପାଠୀ, ଜିତେନ୍ଦ୍ର ମୁନି ପ୍ରମୁଖ ଉପସ୍ଥିତ ଥିଲେ ।
ଏହା ମଧ୍ୟ ପଢ଼ନ୍ତୁ....ସରିଲା ଡଟ ଫେଷ୍ଟ ଭୁବନେଶ୍ବର ଲାଇଭ, ଝୁମାଇଲେ ଅରୁଦ୍ବୀପ ଯୋଡ଼ି
ଇଟିଭି ଭାରତ, ବ୍ରହ୍ମପୁର