ପ୍ରବଳ ଖରାରୁ ରକ୍ଷା ପାଇବା ପାଇଁ ପୋଖରୀକୁ ଗାଧୋଇବାକୁ ଯାଇ ବୁଡ଼ିଗଲେ ନାବାଳକ - ପୋଖରୀରେ ବୁଡି ନାବାଳକଙ୍କ ମୃତ୍ୟୁ
ଖୋର୍ଦ୍ଧା: ପ୍ରବଳ ଗ୍ରୀଷ୍ମପ୍ରବାହ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି । ଏଥିରୁ ଆରାମ ପାଇବା ପାଇଁ ଜଳାଶ୍ରୟ ମାନଙ୍କରେ ଭିଡ଼ ଦେଖିବାକୁ ଦେଖିବାକୁ ମିଳୁଛି । କିନ୍ତୁ ଗରମରୁ ରକ୍ଷା ପାଇବା ପୋଖରୀ ଗାଧୋଇବା ବେଳେ ଜଣେ ନାବାଳକଙ୍କ ମୃତ୍ୟୁ ଘଟିଥିବା ଖବର ସାମ୍ନାକୁ ଆସିଛି । ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ଭଜାଗଡ ଗ୍ରାମରେ ଏଭଳି ଏକ ଦୁଃଖଦ ଘଟଣା ଘଟିଛି । ପୋଖରୀରେ ବୁଡି ଜଣେ ନାବାଳକର ମୃତ୍ୟୁ ହୋଇଛି ।
ସୂଚନା ଅନୁଯାୟୀ, ଅତ୍ୟଧିକ ଗରମରୁ ରକ୍ଷା ପାଇବା ପାଇଁ ଭଜାଗଡ ଗ୍ରାମର ଡମ୍ବରୁ ବାରିକଙ୍କ ପୁତ୍ର ଆଲୋକ ପୋଖରୀରେ ଗାଧୋଇବାକୁ ଯାଇଥିଲେ । ସ୍କୁଲରୁ ଫେରି ସାଙ୍ଗ ସାଥିମାନଙ୍କ ସହ ଘର ନିକଟସ୍ଥ ପୋଖରୀକୁ ଯାଇଥିଲେ । ଗାଧୋଇବା ବେଳେ ପହଁରି ପହଁରି ଗଭୀର ଜଳକୁ ପଳାଇଯାଇଥିଲେ । ଏହାପରେ ସେ ଆଉ କୂଳକୁ ଫେରି ପାରିନଥିଲେ । ବହୁ ଖୋଜା ଖୋଜି ପରେ ନାବାଳକଙ୍କୁ ଉଦ୍ଧାର କରି ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ମୃତଦେହ ଉଦ୍ଧାର କରି ଟାଙ୍ଗୀ ପୋଲିସ ଘଟଣାର ତଦନ୍ତ କରୁଥିବା ଜଣାପଡ଼ିଛି ।
ଇଟିଭି ଭାରତ, ଖୋର୍ଦ୍ଧା