ଗୋରୁ ଚରାଇବାକୁ କେନ୍ଦ୍ର କରି ହତ୍ୟା ! ଗୁଳିବିଦ୍ଧ ଅବସ୍ଥାରେ ମିଳିଲା ମୃତଦେହ

କନ୍ଧମାଳ:ଗୋରୁ ଚରାଇବାକୁ କେନ୍ଦ୍ର କରି ଦେଶୀ ବନ୍ଧୁକରେ ଗୁଳିକରି ହତ୍ୟା । ଏଭଳି ସ୍ପର୍ଶକାତର ଘଟଣା ଘଟିଛି ଦାରିଙ୍ଗବାଡ଼ି ବ୍ଳକ ବ୍ରାହ୍ମଣୀଗାଁ ଥାନା ଅଞ୍ଚଳରେ। କାଟିଙ୍ଗିଆ ପଞ୍ଚାୟତର ଖାରିଗୁଡ଼ା ଗ୍ରାମର ମାଦିପଡ୍ରା ନାମକ ଜଣେ ବ୍ୟକ୍ତିଙ୍କୁ ଶୁକ୍ରବାର ପଣସପଦର ଗ୍ରାମର ଆକାଶ ପଡ୍ରା ହତ୍ୟା କରିଥିବା ସୂଚନା ମିଳିଛି। ଗାଈ ବଳଦମାନେ ମକା ଫସଲ ଖାଇ ଦେବାରୁ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଛି। ଦେଶୀ ବନ୍ଧୁକରେ ଗୁଳିକରି ହତ୍ୟା କରାଯାଇଥିବା ନେଇ  ଥାନାରେ ଲିଖିତ ଅଭିଯୋଗ କରିଛନ୍ତି ମୃତକଙ୍କ ପୁଅ ଧର୍ମେନ୍ଦ୍ର ପଡ୍ରା । 

ଏହା ବି ପଢନ୍ତୁ...ଭାଣିଜୀକୁ ହତ୍ୟା କରିବା ଅଭିଯୋଗରେ ବନ୍ଧା ହେଲା କଂସ ମାମୁ

ସୂଚନା ମୁତାବକ, ଶୁକ୍ରବାର ମାଦିପଡ୍ରା ଚାଷ କାମ ସାରି ଗ୍ରାମ ନିକଟ ପାହାଡ଼କୁ ଗାଈ ଚରାଇବାକୁ ନେଇଥିଲେ । ହେଲେ ସନ୍ଧ୍ୟା ପୂର୍ବରୁ ଗାଈ ବଳଦ ପାହାଡ଼ରୁ ଗାଁକୁ ଫେରିଥିଲେ ମଧ୍ୟ ମାଦିପଡ୍ରା ଘରକୁ ଫେରି ନଥିଲେ । ସନ୍ଧ୍ୟା ହୋଇଯାଇଥିଲେ ମଧ୍ୟ ବାପା ଘରକୁ ଫେରିନଥିବା ନେଇ ଚିନ୍ତାରେ ଥିବା ଧର୍ମେନ୍ଦ୍ର ତାଙ୍କୁ ଖୋଜିବାକୁ ପାହାଡ଼କୁ ଯାଇଥିଲେ। ବିଭିନ୍ନ ସ୍ଥାନରେ ଖୋଜାଖୋଜି କଲାପରେ ମକା ଚାଷ ପଦର ନିକଟରେ ଗୁଳିବିଦ୍ଧ ଅବସ୍ଥାରେ ତାଙ୍କ ମୃତଦେହ ପଡିଥିବାର ଦେଖିଥିଲେ। ଏନେଇ ପୋଲିସ ଖବର ପାଇବା ପରେ ଘଟଣା ସ୍ଥଳରେ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି । ଆକାଶ ପଡ୍ରାଙ୍କୁ ଥାନାରେ ଅଟକ ରଖି ପୋଲିସ ପଚରାଉଚରା କରିଛି। 

ଇଟିଭି ଭାରତ, କନ୍ଧମାଳ