କଂଗ୍ରେସ ଭବନରେ ରଙ୍ଗର ଆସର, ନେତା ଓ କର୍ମୀଙ୍କ ସହ ହୋଲି ଖେଳିଲେ ସୁର - କଂଗ୍ରେସ ବିଧାୟକ ସୁର ରାଉତରାୟ
ଭୁବନେଶ୍ବର: ଆନନ୍ଦ ଓ ଭାଇଚାରାର ପର୍ବ ହୋଲି । ପଲ୍ଲୀରୁ ସହର ସବୁଠି ହୋଲିର ଆସର ଜମିଛି । ରଙ୍ଗ ଲଗେଇ, ମିଠା ଖୁଆଇ ହୋଲି ପାଳୁଛନ୍ତି ସମସ୍ତେ । ସେହିଭଳି ଆଜି ହୋଲି ଅବସରରେ ଚଳଚଞ୍ଚଳ ହୋଇଛି କଂଗ୍ରେସ ଭବନ । କଂଗ୍ରେସ ଭବନରେ ବିଧାୟକ ସୁର ରାଉତରାୟ ହୋଲିର ଉତ୍ସବ ପାଳନ କରିଛନ୍ତି । ଏହି ଅବସରରେ ଯାତ୍ରା ଅଭିନେତ୍ରୀ ରାଣୀ ପ୍ରିୟଦର୍ଶିନୀଙ୍କୁ ମଧ୍ୟ କଂଗ୍ରେସ ଭବନରେ ହୋଲି ଖେଳୁଥିବା ଦେଖିବାକୁ ମିଳିଛି ।
ହୋଲି ଅବସରରରେ ଭୁବନେଶ୍ବର କଂଗ୍ରେସ ଭବନରେ ଦଳର ନେତା ଓ କର୍ମୀ ଏକାଠି ହୋଇ ବାଜା ବଜାଇ, ଦହିବରା ଖାଇ ରଙ୍ଗର ପର୍ବ ହୋଲିକୁ ପାଳିଛନ୍ତି । ସମସ୍ତେ ସମସ୍ତଙ୍କୁ ଅବିର ବୋଳି ହୋଲି ଶୁଭେଚ୍ଛା ଦେଇଛନ୍ତି । ଏହି ଅବସରରେ କଂଗ୍ରେସ ବିଧାୟକ ସୁର ରାଉତରାୟ କହିଛନ୍ତି, "ଭାରତ ଆଜି ଦରଦାମ ବୃଦ୍ଧିରେ ଜଳିଯାଉଛି । ଓଡିଶାରେ ଆଇନ ଶୃଙ୍ଖଳା ବିପର୍ଯ୍ୟସ୍ତ । ତେଣୁ ଆଗକୁ କଂଗ୍ରେସ ସହ ଯୋଡି ହୁଅନ୍ତୁ ବୋଲି ଆଜିର ପବିତ୍ର ଦିବସରେ ସମସ୍ତଙ୍କ ପାଇଁ ବାର୍ତ୍ତା ରହିବ ।" ସୁର ରାଉତରାୟଙ୍କ ସହ ଅଧିକ ଆଲୋଚନା କରିଛନ୍ତି ଆମ ଭୁବନେଶ୍ୱର ପ୍ରତିନିିଧି ସଞ୍ଜିବ କୁମାର ରାୟ।
ଇଟିଭି ଭାରତ, ଭୁବନେଶ୍ବର