ଗଡଜାତ ଅଞ୍ଚଳ ସୁବର୍ଣ୍ଣପୁରରୁ ମେଲାଣି ନେଲେ ମା’ ଯୋଗମାୟା, ଆର ବର୍ଷକୁ ଆପେକ୍ଷା - ଧରାପୃଷ୍ଟରୁ ବିଦାୟ ନେଲେ ଜଗତ ଜନନୀ ମା’ ଦୁର୍ଗା

ସୁବର୍ଣ୍ଣପୁର:  ତନ୍ତ୍ର ପୀଠ ତଥା ଗଡଜାତ ସହରରେ ଚଳିତ ବର୍ଷ ଶାରଦୀୟ ଦୁର୍ଗାପୂଜାର ପରିସମାପ୍ତି ଘଟିଛି । ଆଜି ଆଶ୍ବୀନ ଶୁକ୍ଲ ପକ୍ଷ ତ୍ରୟୋଦଶୀ ତିଥିରେ ଦେବୀ ମା‘ଙ୍କ ମୃଣ୍ମୟୀ ପ୍ରତିମା ବିସର୍ଜନ କରାଯାଇଛି । ସହରରେ 11 ଗୋଟି ସ୍ଥାନରେ ଆୟୋଜିତ ହୋଇଥିବା ଶାରଦୀୟ ପୂଜାର ମୃଣ୍ମୟୀ ପ୍ରତୀମାଗୁଡିକୁ ଆଜି ମହାନଦୀର ତେନ୍ତୁଳି ଘାଟରେ ବିସର୍ଜନ କରାଯାଇଛି । ସଦର ପୌର ପରିଷଦ ପକ୍ଷରୁ ପୂର୍ବରୁ ବଛା ଯାଇଥିବା ଘାଟରେ ଦେବୀଙ୍କ ବିସର୍ଜନ ପର୍ବ ପାଇଁ ବ୍ୟାପକ ପ୍ରସ୍ତୁତି କରାଯାଇଥିଲା । ଗୋଟିଏ ଦିନରେ ହିଁ ସମସ୍ତ ପୂଜା କମିଟିକୁ ବିସର୍ଜନ କରିବା ପାଇଁ ଜିଲ୍ଲା ପୋଲିସ ପକ୍ଷରୁ ଅନୁରୋଧ କରାଯାଇଥିଲା । ତେବେ ଚଳିତ ବର୍ଷ ଆୟୋଜିତ ନବରାତ୍ର ଓ ପଞ୍ଚଦିନାତ୍ମକ ଶାରଦୀୟ ଦୁର୍ଗା ପୂଜାରେ ଜିଲ୍ଲା ପୋଲିସ , ସଦର ପୌର ପରିଷଦ ଓ ପୂଜାକମିଟି ଗୁଡିକ ଭିତରେ ସମନ୍ବୟ ରକ୍ଷା କରିଥିଲା । ପ୍ରାୟ ସପ୍ତାହ ବ୍ୟାପି ଦେବୀଙ୍କ ଆଗମନରେ ସହର ଉତ୍ସବ ମୁଖର ହୋଇ ଉଠିଥିବା ବେଳେ ଆଜି ଦେବୀ ମେଲାଣି ନେବା ପରେ ସହର ଖାଁ ଖାଁ ହୋଇଯାଇଛି । ମା’ଙ୍କ ମେଲାଣିକୁ ନେଇ ଭକ୍ତ ଭାବବିହ୍ବଳିତ ହୋଇ ପଡିଛି । ତେବେ ବିସର୍ଜନ ପୂଜାରେ ସମ୍ବଲପୁରୀ ଲୋକବାଦ୍ୟ , ଘଣ୍ଟ ବାଦ୍ୟ, ସଂକୀର୍ତ୍ତନ, ଘୁମୁରା , ନଚନିଆଁ, ଡିଜେ, ଆଧୁନିକ ବ୍ୟାଣ୍ଡ ପାର୍ଟି ସହ ପରିବେଶ ବେଶ ମନମୋହକ ହୋଇ ଉଠିଥିଲା ।  

ଏହା ମଧ୍ୟ ପଢନ୍ତୁ...Goddess Durga Immersion: ବଲାଙ୍ଗୀରରେ ମେଲାଣି ନେଲେ ମା’ ଦୁର୍ଗା

ଇଟିଭି ଭାରତ, ସୁବର୍ଣ୍ଣପୁର