ପରିକ୍ରମା ପ୍ରକଳ୍ପ ପାଇଁ ଦାରୁକ୍ଷେତ୍ର ଓ ଅନନ୍ତ ପୁରୁଷୋତ୍ତମ ଦେବଙ୍କୁ ନିମନ୍ତ୍ରଣ

Srimandir Parikrama Project: 

ଖୋର୍ଦ୍ଧା: ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ଉତ୍ସବ ପାଇଁ ନିମନ୍ତ୍ରଣ ଯାତ୍ରା ଆରମ୍ଭ ହୋଇଛି । ଆସନ୍ତା ଜାନୁଆରୀ ୧୭ ତାରିଖରେ ଅନୁଷ୍ଠିତ ହେବାକୁ ଥିବା ଏହି ଭବ୍ୟ ଉତ୍ସବକୁ ଖୋର୍ଦ୍ଧା ଦଧିମାଛଗାଡ଼ିଆ ଦାରୁକ୍ଷେତ୍ରକୁ ନିମନ୍ତ୍ରଣ କରାଯାଇଛି । ଶ୍ରୀମନ୍ଦିର ପ୍ରଶାସନ ପକ୍ଷରୁ ନିମନ୍ତ୍ରଣ ଧରି ଦଇତାପତି ଦାରୁକ୍ଷେତ୍ରରେ ପହଞ୍ଚିଥିଲେ । ସେଠାରେ ସଂକୀର୍ତ୍ତନ ଦଳ ଘଣ୍ଟଘଣ୍ଟା, ଢୋଲ, ଶଙ୍ଖ, ହୁଳହୁଳି ବଜାଇ ଏକ ଭକ୍ତିମୟ ପରିବେଶରେ ନିମନ୍ତ୍ରଣ ଦଳକୁ ପାଛୋଟି ନେଇଥିଲେ । ଦାରୁକ୍ଷେତ୍ର ଟ୍ରଷ୍ଟି ମୁଖ୍ୟ ମାନସ ରଞ୍ଜନ ପଟ୍ଟନାୟକ ନିମନ୍ତ୍ରଣ ଗ୍ରହଣ କରିଥିଲେ । ଶ୍ରୀମନ୍ଦିର ପକ୍ଷରୁ ଦଇତାପତି ଜଗନ୍ନାଥ ଦାସ ମହାପାତ୍ର, ବିଭୁ ପ୍ରସାଦ ମହାପାତ୍ର ଏହି ଟିମ୍‌ରେ ଆସିଥିଲେ ।

ଏହା ମଧ୍ୟ ପଢନ୍ତୁ: ପରିକ୍ରମା ପ୍ରକଳ୍ପ: ମହାପ୍ରଭୁ ଲିଙ୍ଗରାଜଙ୍କୁ ନିମନ୍ତ୍ରଣ ଦେଲେ ଶ୍ରୀମନ୍ଦିର ସେବାୟତ

ଏହି ସମୟରେ ପ୍ରଶାସନ ପକ୍ଷରୁ ଖୋର୍ଦ୍ଧା ବିଡ଼ିଓ କ୍ଷୀରବ୍ଧ ତନୟା ସାହୁ ଉପସ୍ଥିତ ଥିଲେ । ଦଧିମାଛଗାଡ଼ିଆ ଗ୍ରାମବାସୀ ନିମନ୍ତ୍ରଣ ପାଇ ଖୁସିରେ ବିଭୋର ହୋଇପଡ଼ିଥିଲେ । ସେହିପରି ଏହି କାର୍ଯ୍ୟକ୍ରମରେ ସ୍ଵତନ୍ତ୍ର ଟିମ୍‌ରେ ମନ୍ଦିର ସେବାୟତ, ନୋଡାଲ ଅଧିକାରୀ ନିମନ୍ତ୍ରଣ ଧରି ଖୋର୍ଦ୍ଧାର ଜାଗୁଳାଇ ପୀଠଠାରେ ଥିବା ପୂର୍ଣ୍ଣ ବୟବ ଜଗନ୍ନାଥ ମନ୍ଦିରରେ ପହଞ୍ଚିଥିଲେ । ମନ୍ଦିର ଟ୍ରଷ୍ଟି ପକ୍ଷରୁ ଉପଜିଲ୍ଲାପାଳ ଦୀପ୍ତି ରଂଜନ ସେଠି, ମନ୍ଦିର ସେବାୟତ ବୈକୁଣ୍ଠ ମହାପାତ୍ର ପ୍ରମୁଖ ଏହି ଟିମକୁ ସ୍ବାଗତ କରିଥିଲେ । ବ୍ଲକ ଅଧ୍ୟକ୍ଷା ଶ୍ରୀମୟୀ ପ୍ରିୟଦର୍ଶିନୀ ଜାଗୁଳାଇ ପାଟଣା ଏବଂ ଦଧିମାଛଗାଡ଼ିଆ ଠାରେ ଉପସ୍ଥିତ ରହି ନିମନ୍ତ୍ରଣ ଦଳକୁ ସ୍ଵାଗତ ଜଣାଇଥିଲେ ।  ହୁଳହୁଳି, ହରିବୋଲି ଧ୍ଵନିରେ ନିମନ୍ତ୍ରଣ ଦଳକୁ ପାଛୋଟି ନିଆଯାଇଥିଲା । ସେଠାରେ ସେମାନେ ଉପଜିଲ୍ଲାପାଳଙ୍କ ଉପସ୍ଥିତିରେ ମନ୍ଦିର କର୍ମକର୍ତ୍ତାଙ୍କୁ ନିମନ୍ତ୍ରଣ କରି ଶ୍ରୀଜଗନ୍ନାଥ ମହାପ୍ରଭୁଙ୍କ ପରିକ୍ରମା ପ୍ରକଳ୍ପ ପ୍ରତିଷ୍ଠା କାର୍ଯ୍ୟକ୍ରମରେ ଯୋଗ ଦେବାକୁ ଅନୁରୋଧ କରିଥିଲେ ।

ଇଟିଭି ଭାରତ, ଖୋର୍ଦ୍ଧା