ବିଶ୍ବକପ୍ ନେଇ ରାଉରକେଲାରେ ଉତ୍ସାହ; ଇଣ୍ଡିଆ ନିଶ୍ଚୟ ଜିତିବ କହିଲେ କ୍ରୀଡ଼ାପ୍ରେମୀ
Published : Nov 19, 2023, 10:44 AM IST
ରାଉରକେଲା:ଆଉ କିଛି ଘଣ୍ଟାର ଅପେକ୍ଷା । ସୁପର୍ ସଣ୍ଡେରେ ଆରମ୍ଭ ହେବ ବିଶ୍ବକପ୍ କ୍ରିକେଟ ଗ୍ରାଣ୍ଡ ଫାଇନାଲ । ମୁହାଁମୁହିଁ ହେବେ ଭାରତ ଓ ଅଷ୍ଟ୍ରେଲିଆ । ଅହମ୍ମଦାବାଦ ସ୍ଥିତ ବିଶ୍ବର ସବୁଠୁ ବଡ କ୍ରିକେଟ ଷ୍ଟାଡିୟମ ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବ ଏହି ମ୍ୟାଚ । ଆଜି ହାଇଭୋଲଟେଜ ମ୍ୟାଚ ଉପରେ ନଜର ରଖିଛି ସାରା ବିଶ୍ବ । ଏଥିପାଇଁ ଦେଶବ୍ୟାପୀ ଉତ୍ସାହର ମାହୋଲ । କ୍ରିକେଟ ପ୍ରେମୀଙ୍କ ମନରେ ଖୁସି କହିଲେ ନସରେ । ଟିମ୍ ଇଣ୍ଡିଆର ବିଜୟ ପାଇଁ କେଉଁଠି ହୋମ ଯଜ୍ଞ ହେଲାଣି ତ ଆଉ କିଏ ଉପବାସ ରଖିଲାଣି । ଏହି କ୍ରମରେ ରାଉରକେଲା ସହରରେ ମଧ୍ୟ ବିଶ୍ବକପ୍ ଫିଭର ଦେଖିବାକୁ ମିଳିଛି । ମ୍ୟାଚକୁ ନେଇ ଉତ୍ସାହିତ ଅଛନ୍ତି ସହରର କ୍ରୀଡ଼ାପ୍ରେମୀ ଏବଂ ଇଣ୍ଡିଆ ନିଶ୍ଚୟ ଜିତିବ ବୋଲି ଆଶା ବାନ୍ଧିଛନ୍ତି । ତେବେ ଆଜିର ମ୍ୟାଚ୍ରେ କାହାର ହେବ ବିଶ୍ବକପ୍, କିଏ ମାରିବ ବାଜି, କିଏ ମୌକାରେ ମାରିବ ଚୌକା ବର୍ତ୍ତମାନ ଦେଖିବାକୁ ବାକି ରହିଲା ।
ଅପରାଜୟ ଭାରତୀୟ ଟିମ ନିଜର ବିଜୟ ଧାରା ବଜାୟ ରଖିବାରେ ସଫଳ ହେବ ନା କମବ୍ୟାକ କିଙ୍ଗ ଅଷ୍ଟ୍ରେଲିଆ ଭାରି ପଡିବ, ଆଉ କିଛି ସମୟ ପରେ ଦେଖାଯିବ । ଚଳିତ ବିଶ୍ୱକପରେ ପ୍ରଥମେ ପରାଜୟ ପରେ ବିଜୟ ହୋଇ ଫାଇନାଲରେ ପହଞ୍ଚିଛି ଅଷ୍ଟ୍ରେଲିଆ ଦଳ । ଅନ୍ୟପକ୍ଷରେ ଭାରତୀୟ ଦଳ ନିଜର ଧୂଆଁଦାର ଖେଳ ପ୍ରଦର୍ଶନ କରି ଗୋଟିଏ ବି ମ୍ୟାଚ ନହାରି ଫାଇନାଲକୁ ଏଣ୍ଟ୍ରି କରିଛି । ଦୁଇ ଦଳ କେହି କାହାଠୁ କମ୍ ନୁହନ୍ତି । ତେବେ ଆଜିର ମ୍ୟାଚରେ ଯିଏ ଏକ ପ୍ରତିଶତ ଭଲ ଖେଳିବ ସିଏ ବିଶ୍ୱକପ ବିଜୟୀ ହେବ ବୋଲି କହିଛନ୍ତି କ୍ରିକେଟ ପ୍ରେମୀ । ବର୍ତ୍ତମାନ ଭାରତୀୟ ଦଳକୁ ଭଲ ସ୍କୋର୍ କରିବାକୁ ପଡିବ । ଏଥିପାଇଁ ରୋହିତ ଏବଂ ଶୁଭମନ ସହ ବିରାଟଙ୍କୁ ଧୂଆଁଦାର ପ୍ରଦର୍ଶନ କରିବାକୁ ପଡ଼ିବ । ତାହେଲେ ଯାଇ ମିଡିଲ ଅର୍ଡରରେ ରାହୁଲ, ଶ୍ରେୟାସ ମିଶି ଭଲ ସ୍କୋର କରିବାରେ ସଫଳ ହେବେ । କ୍ରିକେଟ ପ୍ରେମୀ ଆଶା କରିଛନ୍ତି ଯେ, ଏହି ମ୍ୟାଚ ଏକ ହାଇ ସ୍କୋରିଂ ମ୍ୟାଚ ରହିବ । ଅଷ୍ଟ୍ରେଲିଆର ବୋଲିଂକୁ ସମ୍ଭାଳି ଖେଳିବାକୁ ପଡିବ । ଷ୍ଟାର୍କ ଏବଂ ହଜେଲଉଡ଼ ସହ ଜାମ୍ପା ଏବଂ କମିନ୍ସଙ୍କୁ ସମ୍ଭାଳିବାକୁ ପଡିବ ।
ଇଟିଭି ଭାରତ, ରାଉରକେଲା