Padmapur Bypoll Result: ଧାମନଗର ଉପନିର୍ବାଚନରେ ପରାଜିତ ବିଜେଡି କ୍ୟାମ୍ପରେ ସେଲିବ୍ରେସନ - ପଦ୍ମପୁର ଉପନିର୍ବାଚନ

ଭଦ୍ରକ: ପଦ୍ମପୁରରେ ବିଜେଡିରେ ବଡ ବିଜୟ ହୋଇଛି । ବିପୁଳ ସଂଖ୍ୟକ ଭୋଟରେ ବିଜେଡି ପ୍ରାର୍ଥିନୀ ବର୍ଷା ସିଂ ବରିହାଙ୍କର ବିଜୟ ପରେ ଭଦ୍ରକରେ ବିଜୟ ଉତ୍ସବ ପାଳନ କରିଛି ବିଜେଡି । ଆଇ ଲଭ ଭଦ୍ରକ ଠାରେ ଏହି ଉତ୍ସବ ପାଳନ କରାଯାଇଥିଲା । ଭଦ୍ରକ ଜିଲ୍ଲା ଅନ୍ତର୍ଗତ ଧାମନଗର ଉପନିର୍ବାଚନରେ ବିଜେଡି ପରାସ୍ତ ହୋଇଥିଲା । ପ୍ରାର୍ଥିନୀ ଅବନ୍ତୀ ଦାସଙ୍କର ଶୋଚନୀୟ ପରାଜୟ ପରେ ବିଜେଡି ଦୁଃଖିତ ଥିଲା । ହେଲେ ପଦ୍ମପୁର ଉପନିର୍ବାଚନ ଫଳାଫଳ ପରେ ଜିଲ୍ଲାର ବିଜେଡି କ୍ୟାମ୍ପ ବେଶ୍ ଉତ୍ସାହିତ ହୋଇଥିବା ଦେଖିବାକୁ ମିଳିଛି । ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଥିବା ଆଇ ଲଭ ଭଦ୍ରକ ଠାରେ, ଭଦ୍ରକ ବିଧାୟକ ସଞ୍ଜୀବ ମଲ୍ଲିକ, ଭଦ୍ରକ ବିଜୁ ଜନତା ଦଳ ଜିଲ୍ଲା ସଭାପତିଙ୍କ ସମେତ ଦଳର ବହୁ ବରିଷ୍ଠ ନେତା ତଥା କର୍ମୀମାନେ ରୁଣ୍ଡ ହୋଇ ବିଜୟ ଉତ୍ସବ ପାଳନ କରିଥିଲେ । ପଦ୍ମପୁର ଉପନିର୍ବାଚନରେ ବିଜେଡି ବିଧାୟିକା ଭାବେ ବର୍ଷା ସିଂ ବରିହାଙ୍କ ବିଜୟ ପରେ ଭଦ୍ରକ ବିଜେଡି ନେତା ଓ କର୍ମୀଙ୍କ ମଧ୍ୟରେ ନାହିଁ ନଥିବା ଖୁସି । ବାଜା ବଜାଇ, ବାଣ ଫୁଟାଇ ନାଚିବା ସହିତ ପରସ୍ପରକୁ ମିଠା ଖୁଆଇଥିବା ଦେଖିବାକୁ ମିଳିଥିଲା । ପ୍ରକାଶ ଥାଉ କି, ବିଜେଡି ପ୍ରାର୍ଥିନୀ ବର୍ଷାଙ୍କ ସପକ୍ଷରେ 1,20, 807ଖଣ୍ଡ ଭୋଟ ଯାଇଛି । ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କୁ 78,128 ଖଣ୍ଡ ଭୋଟ ଯାଇଥିବାବେଳେ କଂଗ୍ରେସ ପ୍ରାର୍ଥୀ ମାତ୍ର 3594 ଖଣ୍ଡ ଭୋଟ ମିଳିଛି ।