କଟକରେ ହୁତୁହୁତୁ ହୋଇ ଜଳିଗଲା ବସ, ଅଗ୍ନିକାଣ୍ଡର କାରଣ ଅସ୍ପଷ୍ଟ
କଟକ: ଲିଙ୍କ୍ ରୋଡ୍ରେ ଭୟାବହ ଅଗ୍ନିକାଣ୍ଡ । ଠିଆ ହୋଇଥିବା ବସ୍ରେ ଲାଗିଲା ନିଆଁ । ବସଟି ଦୀର୍ଘଦିନ ହେବ ଠିଆ ହୋଇ ରହିଥିବା ବେଳେ ଆଜି ହଠାତ ସେଥିରେ ନିଆଁ ଲାଗିଥିଲା । ବସ ପାଖରେ ଥିବା ଏକ ପାନ ଦୋକାନ ଓ ଗଛରେ ମଧ୍ୟ ଏହି ନିଆଁ ଲାଗିଛି । ଫଳରେ ଦୋକାନରେ ଥିବା ସମସ୍ତ ଜିନିଷ ଜଳି ପାଉଁଶ ହୋଇଯାଇଥିବା ବେଳେ ଲକ୍ଷାଧିକ ଟଙ୍କାର କ୍ଷତି ହୋଇଥିବା ସୂଚନା । ଦୋକାନ ମାଲିକ ଖରାବେଳେ ଦୋକାନ ବନ୍ଦ କରି ଖାଇବାକୁ ଯିବା ସମୟରେ ଏହି ଅଘଟଣ ଘଟିଛି । ଖବର ପାଇ ଅଗ୍ନିଶମ ବାହିନୀର ଦୁଇଟି ଟିମ୍ ପହଞ୍ଚି ନିଆଁକୁ ଆୟତ୍ତ କରିଥିଲେ । ଧୁମ୍ରପାନ ଯୋଗୁଁ ଏପରି ନିଆଁ ଲାଗିଥିବା ଅନୁମାନ କରାଯାଉଛି । ଦୋକାନୀଙ୍କ କହିବାନୁସାରେ, ଏହି ବସ୍ଟି ଲକଡାଉନଠୁ ସେହି ସ୍ଥାନରେ ରହିଥିଲା । ସବୁବେଳେ ଅସାମାଜିକ କାର୍ଯ୍ୟକଳାପ ସହ ଲିପ୍ତ ଥିବା ବ୍ୟକ୍ତି ବିଶେଷ ସେଠାରେ ଆଡ୍ଡା ଜମାନ୍ତି । ହେଲେ ଆଜି ବସ୍ଟି ଅଚାନକ ହୁତୁହୁତୁ ହୋଇ ଜଳିବା ପରେ ଅଞ୍ଚଳରେ ଭୟର ବାତାବରଣ ଖେଳି ଯାଇଛି । ଏହି ଘଟଣାର ତଦନ୍ତ କରାଯାଉଛି ।
ଇଟିଭି ଭାରତ, କଟକ