Jharsuguda By Poll: ଜମୁଛି ପ୍ରଚାର, ବିଜେପି ପ୍ରାର୍ଥୀ ଟଙ୍କଧରଙ୍କ ସହ ମୈଦାନରେ ସୁରେଶ ପୂଜାରୀ
ଝାରସୁଗୁଡ଼ା: ଭୋଟରଙ୍କ ମନ ଜିଣିବା ପାଇଁ ହାତରେ ଆଉ ମାତ୍ର କିଛି ଦିନର ସମୟ । ଏଥିପାଇଁ ଜୋରଦାର ପ୍ରଚାରରେ ମୈଦାନ କମ୍ପୁଛି । ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀ ଝାରସୁଗୁଡ଼ା ପୌରାଞ୍ଚଳ ମଙ୍ଗଳବଜାର, ମୁଙ୍ଗାପଡ଼ା ଠାରେ ନିଜ ସମର୍ଥକଙ୍କ ସହ ଘର ଘର ବୁଲି ପ୍ରଚାର କରୁଥିବା ବେଳେ, ବିଜେପିର ହେଭିୱେଟ ନେତା ଗ୍ରାମାଞ୍ଚଳରେ ନିଜ ପ୍ରାର୍ଥୀଙ୍କ ପାଇଁ ପ୍ରଚାର ଚଳାଇଛନ୍ତି । ପୌର ପରିଷଦରେ ସ୍ଥାନୀୟ ଲୋକମାନେ ମୌଳିକ ସୁବିଧାରୁ ବଞ୍ଚିତ ହେବା ସହିତ ସ୍ଵାସ୍ଥ୍ୟ, ଶିକ୍ଷା ଓ ଆବାସ ଯୋଜନାକୁ ପ୍ରସଙ୍ଗ କରି ଟଙ୍କଧର ତ୍ରିପାଠୀ ଭୋଟ ମଗୁଥିବା ଦେଖିବାକୁ ମିଳିଛି ।
ଆଜି ବିଜେପି ନେତା ତଥା ବରଗଡ଼ ସାଂସଦ ସୁରେଶ ପୂଜାରୀ ମଧ୍ୟ ଦଳୀୟ ପ୍ରାର୍ଥୀ ଟଙ୍କଧର ତ୍ରିପାଠୀଙ୍କ ସହିତ ଘରକୁ ଘର ବୁଲି ଭୋଟ ଭିକ୍ଷା କରିଛନ୍ତି । କେନ୍ଦ୍ରୀୟ ଯୋଜନା ବିଷୟରେ ଭୋଟର ମାନଙ୍କୁ ବୁଝାଇ ରାଜ୍ୟ ସରକାରଙ୍କ ବିପର୍ଯ୍ୟସ୍ତ ଆଇନ ଶୃଙ୍ଖଳା ଉପରେ ଲୋକଙ୍କୁ କହିବା ସହିତ ଏଥର ଭାରତୀୟ ଜନତା ପାର୍ଟିକୁ ଭୋଟ ଦେଇ ଜୟଯୁକ୍ତ କରି ଝାରସୁଗୁଡ଼ାର ସେବା କରିବା ପାଇଁ ସୁଯୋଗ ଦେବାକୁ ଅନୁରୋଧ କରିଛନ୍ତି । ଅପର ପକ୍ଷରେ ବିଜେପିକୁ କିଛି ଭୋଟର ପସନ୍ଦ କରୁଥିବା ନଜର ଆସିଛି । ଏଥର ଭାରତୀୟ ଜନତା ପାର୍ଟି ସପକ୍ଷରେ ଭୋଟ ଦେବେ ବୋଲି ମତବ୍ୟକ୍ତ କରିଛନ୍ତି ।
ଇଟିଭି ଭାରତ, ଝାରସୁଗୁଡ଼ା