କଟକରେ 5T ସଚିବ ଭିକେ ପାଣ୍ଡିଆନ, ବୋର୍ଡ଼ ସ୍କୁଲ ଭିତ୍ତିଭୂମି ବିକାଶର କଲେ ସମୀକ୍ଷା - କଟକସ୍ଥିତ ବୋର୍ଡ଼ ସ୍କୁଲ ଗସ୍ତ କରିଛନ୍ତି ପାଣ୍ଡିଆନ

କଟକ: ଆଜି ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ତଥା 5T ସଚିବ ଭିକେ ପାଣ୍ଡିଆନ କଟକ ଗସ୍ତରେ ରହିଛନ୍ତି । କଟକସ୍ଥିତ ବୋର୍ଡ଼ ସ୍କୁଲ ଗସ୍ତ କରିଛନ୍ତି ପାଣ୍ଡିଆନ । ଏହି ଅବସରରେ ସେ ପ୍ରଥମେ ସ୍କୁଲ ପରିସରରେ ଥିବା ମହାମନୀଷୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ପରେ 5T ଅଧୀନରେ ଚାଲିଥିବା ସ୍କୁଲର ଭିତ୍ତିଭୂମିର ବିକାଶ ଯୋଜନାର ସମୀକ୍ଷା ମଧ୍ୟ କରିଥିଲେ । ତେବେ ସ୍କୁଲର ଛାତ୍ରଛାତ୍ରୀଙ୍କ ସହ ଆଲୋଚନା ମଧ୍ୟ କରିଥିଲେ 5T ସଚିବ । ବେଶ୍‌ କିଛି ସମୟ ଧରି ଚାଲିଥିବା ଏହି ଆଲୋଚନାରେ ସଚିବ ଛାତ୍ରଛାତ୍ରୀଙ୍କୁ ସେମାନଙ୍କ ଭବିଷ୍ୟତ ଯୋଜନା ନେଇ ଅନେକ ପ୍ରଶ୍ନ କରିଥିଲେ । ସେପଟେ ଛାତ୍ରଛାତ୍ରୀମାନେ ପାଣ୍ଡିଆନଙ୍କ ସହ ଭାବ ବିନିମୟ କରିବା ପରେ ତାଙ୍କର ଅଟୋଗ୍ରାଫ ମଧ୍ୟ ନେଇଥିଲେ । 5T ସଚିବଙ୍କ ଏହି ଗସ୍ତ ସମୟରେ ସ୍କୁଲର ପୁରାତନ ଛାତ୍ରମାନେ ମଧ୍ୟ ଉପସ୍ଥିତ ଥିଲେ । ପୁରାତନ ଛାତ୍ରଙ୍କ ସହ 5T ସଚିବ ଭିକେ ପାଣ୍ଡିଆନ ସ୍କୁଲର ଉନ୍ନତି ସମ୍ପର୍କରେ ଆଲୋଚନା କରିଥିଲେ ।

ଇଟିଭି ଭାରତ, କଟକ