International women's day: ଅନ୍ତର୍ଜାତିକ ମହିଳା ଦିବସ ପାଳିତ - ଆନ୍ତର୍ଜାତିକ ମହିଳା ଦିବସ ପାଳିତ

ଭଦ୍ରକ: ଭଦ୍ରକ ଜିଲ୍ଲା ତିହିଡି ବ୍ଲକ ପରିସର ନିଳମଣି ସଭାଗୃହରେ ଜିଲ୍ଲା ସ୍ତରୀୟ ବିଶ୍ବ ମହିଳା ଦିବସ ପାଳିତ ହୋଇଛି । ହାତରେ ପ୍ଲାକାର୍ଡ ଧରି ସ୍ଲୋଗାନ ଦେଇ ମେଡିକାଲ ପରିସରରୁ ମହିଳାମାନଙ୍କ ଦ୍ବାରା ଏକ ବିଶାଳ ଶୋଭାଯାତ୍ରା ବାହାରି ବଜାର ପରିକ୍ରମା କରିବା ସହ ସଚେତନା ସୃଷ୍ଟି କରା ଯାଇଥିଲା । ଏହି ଅବସରରେ ଏକ ସଭା ଅନୁଷ୍ଠିତ ହୋଇଥିଲା । ତେବେ ମହିଳାଙ୍କ ସୁରକ୍ଷା ଓ ସ୍ଵାଧୀନତା ନେଇ ଆଲୋଚନା ହେବା ସହ ପରିବାର ତଥା ସାମାଜିକ ସ୍ତରରେ ମହିଳାମାନଙ୍କ ଅଧିକାର ସମ୍ପର୍କରେ ସଚେତନ କରାଯାଇଥିଲା । ପାରିବାରିକ ହିଂସା ଓ ନାରୀ ନିର୍ଯାତନା ବିରୋଧରେ ମୁହଁ ଖୋଲିବାର ସମୟ ଆସିଛି । ସେହିପରି ସରକାରଙ୍କ ପକ୍ଷରୁ ନାରୀ ପୁରୁଷ ମଧ୍ଯରେ ଅସମାନତା ଦୂର ହୋଇଥିଲେ ହେଁ ସମାଜରେ କେତେକ ସ୍ଥଳରେ ଏହାର ବିଡମ୍ବନା ଦେଖା ଦେଉଛି ।କନ୍ୟା ଭୃଣ ହତ୍ୟା ବନ୍ଦ କରିବା ଓ ନାରୀକୁ ପୁରୁଷ ପରି ସମାନ ଅଧିକାର ପ୍ରଦାନ କରିବା ଆଦି ଏହି ଦିବସ ପାଳନର ମୂଳ ଲକ୍ଷ୍ୟ ବୋଲି ମତ ପ୍ରକାଶ ପାଇଥିଲା । ଜିଲ୍ଲା ସମାଜ ମଙ୍ଗଳ ଅଧିକାରିଣୀ ଜୟନ୍ତୀ ବେହେରାଙ୍କ ପୌରହିତ୍ୟରେ ଅନୁଷ୍ଠିତ ଏହି ଦିବସ ପାଳନରେ ଜିଲ୍ଲା ସ୍ତରୀୟ ପଦାଧିକାରୀଙ୍କ ସମେତ ବିଭିନ୍ନ ବ୍ଲକର ସିଡିପିଓ ଓ ବିଭିନ୍ନ ଏନଜିଓର କର୍ମକର୍ତ୍ତା ପ୍ରମୁଖ ଉପସ୍ଥିତ ରହିଥିଲେ । ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ