ନିଶାରେ ପାଟିରେ ଭର୍ତ୍ତି କରିଥିଲେ ସାପ, ଜୀବନ ନେଇଗଲା ବିଷଧର - ମହଙ୍ଗା ପଡିଲା ସାପ ସହ ଖେଳିବା
ପାଟନା:ମହଙ୍ଗା ପଡିଲା ସାପ ସହ ଖେଳ । ମଦ୍ୟପାନ କରି ସହ ଖେଳୁଥିଲେ ଯୁବକ । କେତେବେଳେ ସାପକୁ ପାଟିରେ ପୁରାଉ ଥିଲା ତ କେତେବେଳେ କାନ୍ଧରେ ଧରି ବୁଲୁଥିଲେ । ଶେଷରେ ବିଶାକ୍ତ ସାପଟି ଯୁବକଙ୍କ ଓଠକୁ ଦଂଶନ କରିବାରୁ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଏଭଳି ଘଟଣା ଘଟିଛି ବିହାରର ସିୱାନରେ । ତେବେ ଯୁବକ ଜଣଙ୍କ ଏପରି କାର୍ଯ୍ୟକୁ ଦେଖି ସ୍ଥାନୀୟ ଲୋକେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ । ସାପ ସହ ଯୁବକ ଜଣଙ୍କ ଖେଳୁଥିବା ସମୟର ଏକ ଭିଡିଓ ମଧ୍ୟ ଭାଇରାଲ ହୋଇଛି।
ମୃତକ ଜଣଙ୍କ ହେଉଛନ୍ତି ତିତ୍ରା ହରିଜନ ଟୋଲାର ଗ୍ରାମର ଇନ୍ଦ୍ରଜିତ । ଏନେଇ ସ୍ଥାନୀୟ ଲୋକେ କହିଛନ୍ତି ଯେ, ''ଯୁବକ ଜଣଙ୍କ ମଦ୍ୟପାନ କରିଥିଲେ । ଏହାପରେ ଘର ପାଖରେ ଇଟା ଉଠାଉଥିଲେ । ଏହି ସମୟରେ ଏକ ବିଷାକ୍ତ ସାପ ସେଠାରୁ ବାହାରିଥିଲା । ସ୍ଥାନୀୟ ଲୋକେ ଏହା ଦେଖି ସାପ ଉପରେ ଡିଜେଲ ପକାଇ ଦେଇଥିଲେ । ଏହାପରେ ସାପଟି ଶାନ୍ତ ହୋଇଯିବାରୁ ଯୁବକ ଜଣଙ୍କ ସାପଟିକୁ କାନ୍ଧରେ ପକାଇ ବୁଲିବାକୁ ଲାଗିଥିଲେ । ସେ ନିଶାରେ ଥିବାରୁ କଣ କରୁଛନ୍ତି ନିଜେ ମଧ୍ୟ ଜାଣିପାରି ନଥିବା ଗ୍ରାମବାସୀ କହିଛନ୍ତି ।''
ତେବେ ଯେତେବେଳେ ଡିଜେଲର ପ୍ରଭାବ କମିବାକୁ ଲାଗିଲା ସାପଟି ପୁଣି ସକ୍ରିୟ ହୋଇଥିଲା । ଏହାପରେ ସାପଟିକୁ ତଳେ ରଖି ମୁହାଁମୁହିଁ କଥାବାର୍ତ୍ତା ଆରମ୍ଭ କରିଥିଲେ ଯୁବକ ଜଣଙ୍କ । ସାପଟିକୁ ପାଟିରେ ମଧ୍ୟ ପୁରାଉଥିବା ଦେଖିବାକୁ ମିଳିଛି ଭାଇରାଲ ଭିଡିଓରେ । ପ୍ରାୟ 4ରୁ 5 ଥର ସାପଟିକୁ ପାଟିରେ ଭର୍ତ୍ତି କରୁଥିବାରୁ ଶେଷରେ ତାଙ୍କ ଓଠକୁ ସାପଟି କାମୁଡି ଦେଇଥିଲା । ଯାହା ଦେଖି ସ୍ଥାନୀୟ ଲୋକେ ମଧ୍ୟ ଭୟଭୀତ ହୋଇଯାଇଥିଲେ। । ସଙ୍ଗେସଙ୍ଗେ ଯୁବକଙ୍କୁ ଗୁରୁତର ଅବସ୍ଥାରେ ଗ୍ରାମବାସୀ ଡାକ୍ତରଖାନା ନେଇଥିଲେ କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଯୁବକଙ୍କ ପରିବାର ପକ୍ଷରୁ ଏନେଇ କିଛି ସୂଚନା ହସ୍ତଗତ ହୋଇ ନାହିଁ ।
ଗତବର୍ଷ ମହାରାଷ୍ଟ୍ରରୁ ମଧ୍ୟ ଏପରି ଏକ ଖବର ସାମ୍ନାକୁ ଆସିଥିଲା । ନାଗେଶ ଭାଲେରାଓ ନାମକ ଜଣେ ଯୁବକ କିଙ୍ଗ୍ କୋବ୍ରା ସାପକୁ ଚୁମ୍ବନ ଦେବାକୁ ଚେଷ୍ଟା କରୁଥିଲେ । ଏହି ସମୟରେ ବିଷାକ୍ତ ସାପ ରାଗିଯାଇ ତାଙ୍କ ଓଠକୁ କାମୁଡି ଦେଇଥିଲା । ଏହାପରେ ଘଟଣାସ୍ଥଳରେ ଚେତାଶୂନ୍ୟ ହୋଇପଡିବାରୁ ତାଙ୍କୁ ସଙ୍ଗେସଙ୍ଗେ ଆମ୍ବୁଲାନ୍ସ ଯୋଗେ ହସ୍ପିଟାଲକୁ ନିଆଯାଇଥିଲା । କିନ୍ତୁ ସାପ ବିଷ ଯୁବକଙ୍କ ଶରୀରରେ ବ୍ୟାପି ଯାଇଥିବାରୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।