ହାଇଦ୍ରାବାଦ: କେବଳ ରୋଗର ଚିକିତ୍ସା ନୁହେଁ ଶରୀରକୁ ସୁସ୍ଥ ଏବଂ ରୋଗମୁକ୍ତ ରଖିବାରେ ୟୁନାନି ଔଷଧର ଉପଯୋଗିତା ରହିଛି । ସାଧାରଣ ଲୋକଙ୍କ ମଧ୍ୟରେ ଏହି ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ପ୍ରତିବର୍ଷ ଫେବୃଆରୀ 11ରେ ବିଶ୍ୱ ୟୁନାନି ଦିବସ ପାଳନ କରାଯାଏ । ସାଧାରଣତଃ ଲୋକମାନେ କୌଣସି ରୋଗ କିମ୍ବା ସମସ୍ୟା ପାଇଁ ଏଲୋପାଥିକ୍ ଚିକିତ୍ସାକୁ ଗୁରୁତ୍ବ ଦେଇଥାଆନ୍ତି, କିନ୍ତୁ ଏଲୋପାଥିକ୍ ବ୍ୟତୀତ ଅନ୍ୟାନ୍ୟ ଅନେକ ପ୍ରକାରର ବିକଳ୍ପ ଔଷଧ ଏବଂ ଚିକିତ୍ସା ପଦ୍ଧତି ଅଛି, ଯାହା ବିଭିନ୍ନ ପ୍ରକାରର ଚିକିତ୍ସାରେ ସଫଳତା ମଧ୍ୟ ହାସଲ କରିଥାଏ ।
ସେଥିମଧ୍ୟରୁ ଆୟୁର୍ବେଦିକ, ହୋମିଓପାଥିକ ଏବଂ ୟୁନାନି ଔଷଧ ରହିଛି । ୟୁନାନି ଔଷଧ ଏପରି ଏକ ପଦ୍ଧତି, ଯାହାକୁ ବିଭିନ୍ନ ଦେଶରେ ଅନୁସରଣ କରାଯାଏ । କିନ୍ତୁ ଏକ ସଫଳ ବିକଳ୍ପ ଚିକିତ୍ସା ପଦ୍ଧତି ସତ୍ତ୍ବେ ବିଶ୍ବରେ ଏହାର ପାଦୁର୍ଭାବ ଅପେକ୍ଷାକୃତ କମ୍ ରହିଛି । କାରଣ ଏହାକୁ ନେଇ ଲୋକେ ସଚେତନ ନାହାନ୍ତି । ଏଥିପାଇଁ ବିଶ୍ୱ ସ୍ୱାସ୍ଥ୍ୟସେବାରେ ୟୁନାନି ଔଷଧର ଉପଯୋଗିତା ବାବଦରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ପ୍ରତିବର୍ଷ 11 ଫେବୃଆରୀରେ ବିଶ୍ୱ ୟୁନାନି ଦିବସ ପାଳନ କରାଯାଏ ।
ବିଶ୍ୱ ୟୁନାନି ଦିବସର ଇତିହାସ ଏବଂ ଉଦ୍ଦେଶ୍ୟ
ପ୍ରତିବର୍ଷ ଏହି ଦିବସ ଏକ ବିଷୟବସ୍ତୁ ଆଧାରରେ ଆୟୋଜନ କରାଯାଉ ଥିବାବେଳେ ଚଳିତ ବର୍ଷ "ୟୁନାନି ମେଡିସିନ୍ ଫର୍ ପବ୍ଲିକ୍ ହେଲ୍ଥ" ଅର୍ଥାତ୍ "ଜନସ୍ୱାସ୍ଥ୍ୟ ପାଇଁ ୟୁନାନି ଔଷଧ" ବିଷୟବସ୍ତୁ ଉପରେ ଆୟୋଜନ କରାଯାଉଛି । ଏହି ଦିନରେ ମଧ୍ୟ ଭାରତର ୟୁନାନି ଚିକିତ୍ସକ ଅଜମଲ ଖାନଙ୍କୁ ଶ୍ରଦ୍ଧାଞ୍ଜଳି ଦିଆଯାଏ, ଯିଏ ୟୁନାନି ପ୍ରଣାଳୀକୁ ପୁନର୍ଜୀବିତ ତଥା ଲୋକପ୍ରିୟ କରିବା ପାଇଁ ଉଦ୍ୟମ କରିଥିଲେ । ତାଙ୍କ ଜନ୍ମଦିନ ଅବସରରେ ଏହି ଦିବସ ପାଳନ କରାଯାଏ ।
ଉଲ୍ଲେଖନୀୟ କଥା ହେଉଛି, ୟୁନାନି ଔଷଧ ପ୍ରଣାଳୀ ଏକ ବିକଳ୍ପ ଔଷଧ ବର୍ଗରେ ରଖାଯାଇଛି ଏବଂ ଏହା ପ୍ରଥମେ ପ୍ରାଚୀନ ଗ୍ରୀସରେ ଉତ୍ପନ୍ନ ହୋଇଥିଲା । ୟୁନାନି ଔଷଧ ପ୍ରଣାଳୀ ହିପୋକ୍ରାଟସ୍ ଏବଂ ତାଙ୍କ ଅନୁଗାମୀମାନଙ୍କ ଦ୍ବାରା ପରିଚାଳିତ ହୋଇଥିଲା । କିନ୍ତୁ 1868 ମସିହାରେ ଭାରତରେ ଜନ୍ମ ହୋଇଥିବା ଅଜମଲ ଖାନ୍ ଭାରତରେ ୟୁନାନି ଔଷଧର ବିକାଶ ତଥା ବିସ୍ତାର ପାଇଁ ବହୁ ଚେଷ୍ଟା କରିଥିଲେ ଏବଂ ୟୁନାନି ଔଷଧକୁ ଏକ ପରିଚୟ ଦେଇଥିଲେ । ବର୍ତ୍ତମାନ ଏହି ଚିକିତ୍ସା ବ୍ୟବସ୍ଥା ଭାରତ, ପାକିସ୍ତାନ, ପାରସ୍ୟ, ଦକ୍ଷିଣ ଆଫ୍ରିକା ଏବଂ ଇଂଲଣ୍ଡ ସମେତ ଅନେକ ଦେଶରେ ବ୍ୟବହୃତ ହେଉଛି ।
ଉଲ୍ଲେଖନୀୟ ବିଷୟ ହେଉଛି, ହାଇଦ୍ରାବାଦର ସେଣ୍ଟ୍ରାଲ୍ ରିସର୍ଚ୍ଚ ଇନଷ୍ଟିଚ୍ୟୁଟ୍ ଅଫ୍ ୟୁନାନି ମେଡିସିନ୍(CRIUM)ରେ 2017ରେ ପ୍ରଥମ ବିଶ୍ୱ ୟୁନାନି ଦିବସ ପାଳନ କରାଯାଇଥିଲା । ଆୟୁଷ ମନ୍ତ୍ରଣାଳୟ ଅଜମଲ ଖାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବା ଉଦ୍ଦେଶ୍ୟରେ ଫେବୃଆରୀ 11ରେ ଏହି ଦିବସ ମନାଇବା ପାଇଁ ଘୋଷଣା କରିଥିଲା । ଜଣେ ସାମାଜିକ ସଂସ୍କାରକ ହେବା ସହିତ ହାକିମ ଅଜମଲ ଖାନ ଜଣେ ଆଧ୍ୟାତ୍ମିକ ଆରୋଗ୍ୟକାରୀ ଔଷଧୀୟ ତଥା ଖ୍ୟାତନାମା ୟୁନାନି ଚିକିତ୍ସକ ଥିଲେ ।
ସାଧାରଣ ଜନତାଙ୍କୁ ୟୁନାନି ଔଷଧ ବିଷୟରେ ଅବଗତ କରାଇବା ପାଇଁ ସେ ବହୁତ ଚେଷ୍ଟା କରିଥିଲେ । ଏପରିକି ସେ ଦିଲ୍ଲୀରେ ନିର୍ମିତ ସେଣ୍ଟ୍ରାଲ କଲେଜ, ତିବ୍ବିଆ କଲେଜ ଏବଂ ହିନ୍ଦୁସ୍ତାନୀ ଦୱା ଖାନା ମଧ୍ୟ ତିଆରି କରିଥିଲେ । ହାକିମ ଅଜମଲ ଖାନ ମଧ୍ୟ ଦିଲ୍ଲୀର ଜାମିଆ ମିଲିଆ ଇସଲାମିଆ ବିଶ୍ୱବିଦ୍ୟାଳୟର ପ୍ରତିଷ୍ଠାତା ଥିଲେ ।
ୟୁନାନି ଔଷଧ ପ୍ରଣାଳୀ:ୟୁନାନି ଔଷଧ ପ୍ରଣାଳୀରେ ଆଖପାଖର ଜିନିଷ, ପରିବେଶର ସ୍ୱାସ୍ଥ୍ୟ ଉପରେ ପ୍ରଭାବ ଓ ରୋଗର ମାନସିକ, ଭାବନାତ୍ମକ, ଆଧ୍ୟାତ୍ମିକ ଏବଂ ଶାରୀରିକ କାରଣ ଗୁଡ଼ିକ ଆବିଷ୍କୃତ ହୁଏ । ଏହି ଚିକିତ୍ସା ପଦ୍ଧତିରେ ରୋଗର ଚିକିତ୍ସା ସହିତ ଏହାର ପ୍ରତିରୋଧ ଏବଂ ସାଧାରଣତଃ ଶରୀରକୁ ସୁସ୍ଥ ରଖିବା ଏବଂ ଶରୀରର ପ୍ରତିରକ୍ଷା ପ୍ରଣାଳୀକୁ ମଜବୁତ କରିବା ପାଇଁ ମଧ୍ୟ ଚିକିତ୍ସା ଦିଆଯାଏ ।
ୟୁନାନି ଔଷଧ ପ୍ରଣାଳୀରେ ରୋଗୀମାନେ ଶରୀରର ତରଳ ପଦାର୍ଥ ଯେପରିକି କଫ ରକ୍ତ ତଥା ହଳଦିଆ ଏବଂ କଳା ପିତ୍ତ ଆଧାରରେ ଚିକିତ୍ସା କରନ୍ତି । ୟୁନାନି ଔଷଧ ବିଶ୍ବାସ କରେ ଯେ, ଶରୀରକୁ ସୁସ୍ଥ ରଖିବା ପାଇଁ ରକ୍ତ, କଫ, ହଳଦିଆ ପିତ୍ତ ଏବଂ କଳା ପିତ୍ତରେ ଏକ ସନ୍ତୁଳନ ଗୁରୁତ୍ୱପୂର୍ଣ୍ଣ । ୟୁନାନି ଔଷଧରେ ବିଶ୍ବାସ କରାଯାଏ ଯେ, ବାୟୁ, ପୃଥିବୀ, ଜଳ ଏବଂ ଅଗ୍ନିର ଅସନ୍ତୁଳନ ରୋଗ ସୃଷ୍ଟି କରିଥାଏ । ଏହା ସହିତ ପରିବେଶ କାରକ ମଧ୍ୟ ସ୍ୱାସ୍ଥ୍ୟ ଉପରେ ଯଥେଷ୍ଟ ପ୍ରଭାବ ପକାଇପାରେ । ୟୁନାନି ଔଷଧ ପ୍ରଣାଳୀ ଶରୀରର ସମସ୍ତ ଅଙ୍ଗରେ ଘଟୁଥିବା ପ୍ରାୟ ସମସ୍ତ ପ୍ରକାରର ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟା ଏବଂ ରୋଗର ଚିକିତ୍ସା ପାଇଁ ଲାଭ ପ୍ରଦାନ କରିଥାଏ ।
