ହାଇଦ୍ରାବାଦ:ଆଜି ବିଶ୍ବ ବଧିର ଦିବସ । ପ୍ରତିବର୍ଷ ସେପ୍ଟେମ୍ବର ମାସର ଶେଷ ରବାବାରକୁ ବିଶ୍ବ ବଧିର ଦିବସ ଭାବେ ପାଳନ କରାଯାଏ । ୱାର୍ଲ୍ଡ ଫେଡେରେସନ୍ ଅଫ୍ ଡେଫ୍ ଅନୁଯାୟୀ, ବର୍ତ୍ତମାନ ସାରା ବିଶ୍ୱରେ 70 ନିୟୁତରୁ ଅଧିକ ଲୋକ ଆଂଶିକ କିମ୍ବା ସମୁଦାୟ ବଧିରତା କିମ୍ବା ଶ୍ରବଣ ଶକ୍ତିରେ ପୀଡ଼ିତ ଅଛନ୍ତି । ଯେଉଁଥିରୁ 80 ପ୍ରତିଶତରୁ ଅଧିକ ବିକାଶଶୀଳ ଦେଶର ହୋଇଥିବା ଜଣାପଡ଼ିଛି ।
ଅନେକ କାରଣରୁ ବଧିରତା କିମ୍ବା ଶ୍ରବଣ ସମସ୍ୟା ଦେଖାଦେଇପାରେ । କିନ୍ତୁ ଥରେ ଏଥିରେ ପୀଡ଼ିତ ହେଲେ ଅନେକ ସମସ୍ୟାର ସାମ୍ନା କରିବାକୁ ପଡ଼ିଥାଏ । ଅନ୍ୟମାନଙ୍କ ସାହାରା ବିନା କୌଣସି କାର୍ଯ୍ୟ କରିବା ସମ୍ଭବପର ହୋଇନଥାଏ । ଚାକିରି ସ୍ଥାନରେ କିମ୍ବା ସମାଜରେ ଅନ୍ୟମାନଙ୍କ ସହିତ ଏକ ହେବାରେ ମଧ୍ୟ ସମସ୍ୟା ହୋଇପାରେ । ଅନେକ ଥର ବଧିର ଲୋକଙ୍କୁ କେବଳ ସମାଜରେ ନୁହେଁ ସମ୍ପର୍କୀୟ କିମ୍ବା ପରିବାରର ଅବହେଳାର ସମ୍ମୁଖୀନ ହେବାକୁ ପଡ଼େ । ବଧିରତାର କାରଣ ବୁଝିବା, ଏହାର ଠିକ ସମୟରେ ଚିକିତ୍ସା ପାଇଁ ଉଦ୍ୟମ କରିବା ସହିତ ବଧିର ଲୋକଙ୍କୁ ସମାଜରେ ଆର୍ଥିକ ଦୃଷ୍ଟିରୁ ଶକ୍ତିଶାଳୀ କରିବା ଏବଂ ସେମାନଙ୍କୁ ସାଧାରଣ ଜୀବନଯାପନ କରିବାରେ ସାହାଯ୍ୟ କରିବା ପାଇଁ ସୁଯୋଗ ସୃଷ୍ଟି କରିବା ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ ।
ଏହି ଉଦ୍ଦେଶ୍ୟ ନେଇ ପ୍ରତିବର୍ଷ ସେପ୍ଟେମ୍ବରର ଶେଷ ସପ୍ତାହକୁ ଅନ୍ତରାଷ୍ଟ୍ରୀୟ ବଧିର ସପ୍ତାହ ପାଳନ କରାଯାଏ ଏବଂ ସେପ୍ଟେମ୍ବରର ଶେଷ ରବିବାରକୁ "ବିଶ୍ୱ ବଧିର ଦିବସ" ଭାବରେ ପାଳନ କରାଯାଏ । ତେବେ ଚଳିତ ବର୍ଷ "ସମସ୍ତଙ୍କ ପାଇଁ କାନ ଏବଂ ଶ୍ରବଣ ଶକ୍ତିର ସଚେତନତା ଜରୁରୀ" ଏହି ଥିମ୍ ନେଇ ବିଶ୍ବ ବଧିର ଦିବସ ପାଳନ କରାଯାଉଛି ।
ଏହା ମଧ୍ୟ ପଢନ୍ତୁ: ବୈଜ୍ଞାନିକଙ୍କ ଦାବି, କୋରୋନା ଯୋଗୁଁ ଯାଇପାରେ ଶ୍ରବଣଶକ୍ତି
ଦିବସ ପାଳନର ଉଦ୍ଦେଶ୍ୟ ଏବଂ ଇତିହାସ: ବଧିରତାକୁ ଏକ ପ୍ରକାର ଅକ୍ଷମତା ଭାବରେ ବିବେଚନା କରାଯାଏ । ଏହି ସମସ୍ୟାର ଶିକାର ହେଉଥିବା ଲୋକମାନେ ଆଂଶିକ କିମ୍ବା ସମ୍ପୂର୍ଣ୍ଣ ଭାବରେ ଅନ୍ୟମାନଙ୍କୁ ଶୁଣିବାରେ ଅସୁବିଧାର ସମ୍ମୁଖୀନ ହୁଅନ୍ତି । କିନ୍ତୁ ଏହାର ଅର୍ଥ ନୁହେଁ ଯେ ସେମାନେ ଅନ୍ୟମାନଙ୍କ ସହିତ ଯୋଗାଯୋଗ କରିପାରିବେ ନାହିଁ । ବଧିରତା ସମସ୍ୟା ଭୋଗୁଥିବା ଲୋକମାନେ ଅନ୍ୟ ଲୋକଙ୍କ ସହିତ ସଂଯୋଗ କରିପାରିବେ କିମ୍ବା ସଙ୍କେତ ଭାଷା ଶିଖିବା ଏବଂ କିଛି ବିଶେଷ ପ୍ରକାରର ତାଲିମ ସାହାଯ୍ୟରେ ସେମାନଙ୍କ ସହିତ ସେମାନଙ୍କ ଭାବନା ବାଣ୍ଟିପାରିବେ । ତେବେ ଏଥିପାଇଁ କେବଳ ବଧିରତାର ସମ୍ମୁଖୀନ ହେଉଥିବା ବ୍ୟକ୍ତି ନୁହଁନ୍ତି ବରଂ ସେମାନଙ୍କ ସହ ଜଡିତ ଲୋକ, ସେମାନଙ୍କର ବନ୍ଧୁ ଏବଂ ଅନ୍ୟମାନେ ମଧ୍ୟ ଏହି ଦିଗରେ ଉଦ୍ୟମ କରିବା ଉଚିତ୍ । ଯାହାଫଳରେ ବଧିରମାନେ ମଧ୍ୟ ଏକ ସାଧାରଣ ଜୀବନ ବିତାଇ ପାରିବେ । ଲୋକଙ୍କ ମଧ୍ୟରେ ବଧିରତା ସମ୍ବନ୍ଧୀୟ ଆବଶ୍ୟକ ସୂଚନା ବିସ୍ତାର କରିବା ବ୍ୟତୀତ ବଧିରମାନଙ୍କ ପ୍ରତି ସମାଜରେ ଏକ ସହାୟକ ମନୋଭାବ ସୃଷ୍ଟି କରିବା ଏବଂ ସାଧାରଣ ଲୋକଙ୍କୁ ଏଥିପାଇଁ ସମସ୍ତ ପ୍ରକାର ପ୍ରୟାସ କରିବାକୁ ଉତ୍ସାହିତ କରିବା ଉଦ୍ଦେଶ୍ୟରେ ବିଶ୍ବ ବଧିର ଦିବସ ପାଳନ କରାଯାଏ ।
1958 ମସିହାରେ ଇଟାଲୀର ରୋମରେ ବଧିର ମହାସଂଘ ଦ୍ୱାରା ବିଶ୍ୱ ବଧିର ଦିବସ ଆରମ୍ଭ ହୋଇଥିଲା । କିନ୍ତୁ ବାସ୍ତବରେ ଏହି କାର୍ଯ୍ୟକ୍ରମ ଫେଡେରେସନ୍ ଦ୍ବାରା 1951 ମସିହାରେ ଅନୁଷ୍ଠିତ ହୋଇଥିଲା । ପରେ 1959 ମସିହାରେ, ବିଶ୍ୱ ବଧିର ସଂଘ ମଧ୍ୟ ମିଳିତ ଜାତିସଂଘ ଏବଂ ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ମାନ୍ୟତା ପାଇଲା । ସେବେଠାରୁ ପ୍ରତିବର୍ଷ ସେପ୍ଟେମ୍ବର ମାସର ଶେଷ ରବିବାର ବିଶ୍ୱ ବଧିର ଦିବସ ଭାବେ ପାଳନ କରାଯାଏ । ସାଧାରଣ ଜନତାଙ୍କୁ ବଧିରତାର କାରଣ, ଚିକିତ୍ସା ଏବଂ ପରିଚାଳନା ବିଷୟରେ ଅବଗତ କରାଇବା ଏବଂ ସମସ୍ତ ସମ୍ଭାବ୍ୟ ସହାୟତା ଯୋଗାଇବା ଏବଂ ଏଥିରେ ପୀଡ଼ିତ ଲୋକଙ୍କ ପାଇଁ ଏକ ସହାୟକ ପରିବେଶ ସୃଷ୍ଟି କରିବା ପାଇଁ ଉଦ୍ୟମ କରିବା ଉଦ୍ଦେଶ୍ୟରେ ସେପ୍ଟେମ୍ବର ମାସର ଶେଷ ସପ୍ତାହକୁ ବଧିର ସପ୍ତାହ ପାଳନ କରାଯାଉଛି । ବଧିରମାନଙ୍କ ସହ ଅନ୍ୟମାନଙ୍କ ସହ ଯୋଗାଯୋଗ କରିବା ସହଜ କରିବା ଲକ୍ଷ୍ୟରେ 2018ରେ ଆନ୍ତର୍ଜାତିକ ବଧିର ସପ୍ତାହରେ ଆନ୍ତର୍ଜାତୀୟ ସାଙ୍କେତିକ ଭାଷା ମଧ୍ୟ ସ୍ୱୀକୃତିପ୍ରାପ୍ତ । ଯାହାପରେ ଏହି କାର୍ଯ୍ୟକ୍ରମକୁ ଅନ୍ତର୍ଜାତୀୟ ସାଙ୍କେତିକ ଭାଷା ଦିବସ ଭାବେ ପାଳନ କରାଯାଏ ।
ଦିବସର ମହତ୍ତ୍ବ: ଗତ କିଛି ବର୍ଷ ମଧ୍ୟରେ, ବିଭିନ୍ନ କାରଣରୁ ଶ୍ରବଣ ଶକ୍ତି ହ୍ରାସ ସହିତ ମାମଲା ସମଗ୍ର ବିଶ୍ୱରେ ଦ୍ରୁତ ଗତିରେ ବୃଦ୍ଧି ପାଉଛି । ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁଯାୟୀ, ଏକ ବିଲିୟନରୁ ଅଧିକ ଲୋକ ସ୍ଥାୟୀ ଶ୍ରବଣ ଶକ୍ତି ହରାଇବାର ଆଶଙ୍କା ରହିଛି । ଏଭଳି ପରିସ୍ଥିତିରେ ବିଶ୍ୱ ସ୍ୱାସ୍ଥ୍ୟ ସଂଗଠନ ଏବଂ ମିଳିତ ଜାତିସଂଘ ଭଳି ସଂଗଠନ ଏବଂ ସେମାନଙ୍କ ନେତୃତ୍ୱରେ ଅନ୍ୟାନ୍ୟ ସାମାଜିକ ଓ ସ୍ୱାସ୍ଥ୍ୟ ସଂଗଠନଗୁଡ଼ିକ ଦ୍ୱାରା ଏହି ଦିଗରେ ସ୍ୱତନ୍ତ୍ର ଉଦ୍ୟମ କରାଯାଉଛି । ଏହା ଅଧୀନରେ ବିଶ୍ୱ ବଧିର ଦିବସ ଏବଂ ସପ୍ତାହରେ ଅନ୍ୟାନ୍ୟ ଉଦ୍ଦେଶ୍ୟ ପାଇଁ ଅଭିଯାନ ଏବଂ ସଚେତନତା କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥାଏ । ଶ୍ରବଣ ଶକ୍ତି ହ୍ରାସ ହେବାର ପ୍ରକାର ଏବଂ କାରଣ ବିଷୟରେ ସଚେତନତା ସୃଷ୍ଟି କରିବା, ବଧିରତା ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ଜିନିଷ ଏବଂ ସୂଚନା ବିଷୟରେ ସଚେତନତା ସୃଷ୍ଟି କରିବା ଏବଂ ସଙ୍କେତ ଭାଷା ବିଷୟରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ଏବଂ ସାଧାରଣ ଲୋକଙ୍କୁ ଏହା ଶିଖିବା ପାଇଁ ଉତ୍ସାହିତ କରିବା ଏହି ଦିବସର ମହତ୍ତ୍ବ ରହିଛି । ଯାହାଦ୍ୱାରା ବଧିରତାର ସମ୍ମୁଖୀନ ହେଉଥିବା ଲୋକଙ୍କ ଜୀବନରେ ଉନ୍ନତି ହୋଇପାରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
