ହାଇଦ୍ରାବାଦ:ହୃଦୟ ଶରୀରର ଏକ ଗୁରୁତ୍ୱପୂର୍ଣ୍ଣ ଅଙ୍ଗ ଅଟେ । ନିଜକୁ ସୁସ୍ଥ ରଖିବାକୁ ହେଲେ ହୃଦୟକୁ ସୁସ୍ଥ ରଖିବା ନିହାତି ଆବଶ୍ୟକ ବୋଲି କୁହାଯାଏ । ଆଜିକାଲି ପରିବର୍ତ୍ତିତ ଜୀବନଶୈଳୀ ଏବଂ ଅନିୟମିତ ଖାଦ୍ୟ ଅଭ୍ୟାସ ଏବଂ ଚାପ ଯୋଗୁଁ ଖୁବଶୀଘ୍ର ଲୋକେ ହୃଦୟର ଜଡିତ ରୋଗରେ ପୀଡିତ ହୋଇଥାଆନ୍ତି । ହୃଦୟ ସ୍ୱାସ୍ଥ୍ୟ ସମ୍ବନ୍ଧୀୟ ସଚେତନତା ସୃଷ୍ଟି କରିବା ଏବଂ ଲୋକଙ୍କୁ ହୃଦୟ ସମ୍ବନ୍ଧୀୟ ବିପଦରୁ ଦୂରେଇ ରହିବାକୁ ଉତ୍ସାହିତ କରିବା ପାଇଁ ପ୍ରତିବର୍ଷ 29 ସେପ୍ଟେମ୍ବରରେ ବିଶ୍ୱ ହୃଦୟ ଦିବସ ପାଳନ କରାଯାଏ । ତେବେ ସ୍ବାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ, ଏଭଳି ଅନେକ ରୋଗ ରହିଛି ଯାହାକି ହୃଦଘାତର ଆଶଙ୍କାକୁ ବୃଦ୍ଧି କରିଥାଏ । ନିମ୍ନଲିଖିତ ତଥ୍ୟ ଉପରେ ନଜର ପକାନ୍ତୁ କେଉଁ ରୋଗ ହେଲେ ହୃଦୟ ସମ୍ବନ୍ଧୀୟ ରୋଗର ଆଶଙ୍କା ଅଧିକ ରହିଥାଏ ।
କୋରୋନା-ହୃଦରୋଗ: ତିନି ବର୍ଷରୁ ଅଧିକ ସମୟ ବିତିଯାଇଥିଲେ ସୁଦ୍ଧା କୋରୋନା ମହାମାରୀ ବର୍ତ୍ତମାନ ସୁଦ୍ଧା ଶେଷ ହୋଇନାହିଁ । ଅନେକ ରିପୋର୍ଟରେ କୁହାଯାଇଛି ଯେ, କୋରୋନାରେ ଆକ୍ରାନ୍ତ ହେବା ପରେ ହୃଦୟ ସହ ଜଡିତ ରୋଗର ଆଶଙ୍କା ମଧ୍ୟ ଅଧିକ ରହିଥାଏ । କୋରୋନାରେ ଆକ୍ରାନ୍ତ ହେବା ପରେ ଶରୀରରେ ରକ୍ତ ଜମାଟ ବାନ୍ଧିବା ଏବଂ ହୃଦରୋଗର ଆଶଙ୍କା ବୃଦ୍ଧି ପାଇଥାଏ ।
ଉଚ୍ଚ ରକ୍ତଚାପ: ଉଚ୍ଚ ରକ୍ତଚାପରେ ପୀଡିତ ଲୋକମାନଙ୍କ କ୍ଷେତ୍ରରେ ହୃଦଘାତ ହେବାର ଆଶଙ୍କା ଅଧିକ ଥାଏ । ରକ୍ତଚାପ ଅଧିକ ହେଲେ ରକ୍ତବାହୀ ଯଥା ରକ୍ତ ଧମନୀ କଠିନ ହୋଇଯାଏ ଏବଂ ଏହି କାରଣରୁ ଶରୀରରେ ରକ୍ତ ସଞ୍ଚାଳନ ଠିକ ଭାବେ ହୋଇପାରେ ନାହିଁ । ଫଳରେ ହୃଦଘାତର ଆଶଙ୍କା ମଧ୍ୟ ଅଧିକ ରହିଥାଏ ।