ୱାଶିଂଟନ୍: ଆମେରିକାନ ଏକାଡେମୀ ଅଫ୍ ନ୍ୟୁରୋଲୋଜିର ମେଡିକାଲ୍ ଜର୍ଣ୍ଣାଲ୍ ନ୍ୟୁରୋଲୋଜି ଅନଲାଇନ୍ ଇସୁରେ ପ୍ରକାଶିତ ଏକ ଅଧ୍ୟୟନ ଅନୁଯାୟୀ, ହାଇପୋଥାଇରଏଡାଇଜିମ୍ ଥିବା ବୟସ୍କ ବ୍ୟକ୍ତି, ଯାହାକୁ ନିଷ୍କ୍ରିୟ ଥାଇରଏଡ୍ କୁହାଯାଏ, ସେମାନଙ୍କର ଡିମେନ୍ସିଆ ହେବାର ଆଶଙ୍କା ଅଧିକ ହୋଇପାରେ । ଅନୁସନ୍ଧାନ ଅନୁସାରେ, ଯେଉଁମାନଙ୍କ ଥାଇରଏଡ୍ ଅବସ୍ଥା ଥାଇରଏଡ୍ ହରମୋନ୍ ବଦଳାଇବା ଔଷଧ ଆବଶ୍ୟକ କରେ ସେମାନଙ୍କ ପାଇଁ ଡିମେନ୍ସିଆ ହେବାର ଆଶଙ୍କା ଅଧିକ ଥିବା ଜଣାପଡିଛି(Thyroid problems linked to increased risk of dementia) । ଜୁଲାଇ 6, 2022 ରେ ଏହି ଅନୁସନ୍ଧାନର ରିପୋର୍ଟ ପ୍ରକାଶ ପାଇଥିଲା ।
ଏହା ମଧ୍ୟ ପଢନ୍ତୁ:- ଡିମେନ୍ସିଆ ରୋଗୀଙ୍କ ମାନସିକ ସ୍ବାସ୍ଥ୍ୟରେ ଉନ୍ନତି ଆଣିପାରେ Talk Therapy
ଥାଇରଏଡ୍ ଗ୍ରନ୍ଥି ଯଥେଷ୍ଟ ଥାଇରଏଡ୍ ହରମୋନ୍ ତିଆରି ନକଲେ ହାଇପୋଥାଇରଏଡିଜିମ୍ ହୁଏ । ଏହା ମେଟାବୋଲିଜିମ୍(ହଜମ ପ୍ରକ୍ରିୟା)କୁ ମନ୍ଥର କରିପାରେ । ଏହାର ଲକ୍ଷଣ ମଧ୍ୟରେ ଥକ୍କା ଅନୁଭବ, ଓଜନ ବୃଦ୍ଧି ଏବଂ ଥଣ୍ଡା ପ୍ରତି ସମ୍ବେଦନଶୀଳତା ଆଦି ଅନ୍ତର୍ଭୁକ୍ତ । ରୋଡ୍ ଆଇଲ୍ୟାଣ୍ଡ(Rhode Island)ର ପ୍ରୋଭିଡେନ୍ସର ବ୍ରାଉନ୍ ୟୁନିଭରସିଟିର ଅଧ୍ୟୟନ ଲେଖକ ଚିଆନ୍-ହିସିଆଙ୍ଗ ୱେଙ୍ଗ କହିଛନ୍ତି ଯେ, ଏହି ଅନୁସନ୍ଧାନକୁ ନିଶ୍ଚିତ କରିବା ପାଇଁ ଅଧିକ ଅଧ୍ୟୟନର ଆବଶ୍ୟକତା ଥିଲେ ମଧ୍ୟ ଲୋକମାନେ ଥାଇରଏଡ୍ ସମସ୍ୟା ବିଷୟରେ ସଚେତନ ହେବା ଉଚିତ୍ ।
ଏହା ମଧ୍ୟ ପଢନ୍ତୁ:-ହାଇପରଥାଇରଏଡିଜିମ ଓ ପ୍ରଜନନ ସ୍ୱାସ୍ଥ୍ୟ
ଅଧ୍ୟୟନ ପାଇଁ, ଅନୁସନ୍ଧାନକାରୀମାନେ, ତାଇୱାନରେ ଡିମେନ୍ସିଆରେ ଆକ୍ରାନ୍ତ ହୋଇଥିବା 7,843 ଜଣଙ୍କ ସ୍ୱାସ୍ଥ୍ୟ ରେକର୍ଡ ଉପରେ ପରୀକ୍ଷା-ନୀରିକ୍ଷା କରିଥିଲେ ଏବଂ ଡିମେନ୍ସିଆ ନଥିବା ସମାନ ସଂଖ୍ୟକ ଲୋକଙ୍କ ସହ ତୁଳନା କରିଥିଲେ । ଅନୁସନ୍ଧାନରେ ଭାଗ ନେଇଥିବା ବ୍ୟକ୍ତିଙ୍କ ହାରାହାରି ବୟସ 75 ଥିଲା । ତେବେ କହି ରଖୁଛୁ ଯେ, ଡିମେନ୍ସିଆ ହେଉଛି ଏକ ମସ୍ତିଷ୍କ ରୋଗ, ଯେଉଁ କାରଣରୁ ସ୍ମୃତି, ଚିନ୍ତା ଏବଂ ସାମାଜିକ ଦକ୍ଷତା ପ୍ରଭାବିତ ହୋଇଥାଏ । ଡିମେନ୍ସିଆ ରୋଗୀଙ୍କ ମଧ୍ୟରେ ମାନସିକ ସ୍ବାସ୍ଥ୍ୟ ସମସ୍ୟା ବ୍ୟାପକ ଭାବରେ ବ୍ୟାପିଥାଏ । ବର୍ତ୍ତମାନ ଏହି ରୋଗ ଥାଇରଏଡ୍ ସହ ଜଡିତ ଥିବା ନିଶ୍ଚିତ ରୂପେ ଚିନ୍ତାର କାରଣ ପାଲଟିଛି ।
