ହାଇଦ୍ରାବାଦ: ଆଜି ଜାତୀୟ ସୁରକ୍ଷା ଦିବସ । ଜାତୀୟ ସୁରକ୍ଷା ପରିଷଦ ଦ୍ୱାରା ବିଶେଷ କରି କର୍ମକ୍ଷେତ୍ର ପାଇଁ ରଖାଯାଇଥିବା ସୁରକ୍ଷା ପ୍ରୋଟୋକଲ ଏବଂ ନିୟମ ବିଷୟରେ ଲୋକଙ୍କ ମଧ୍ୟରେ ସଚେତନତା ବୃଦ୍ଧି ଉଦ୍ଦେଶ୍ୟରେ ପ୍ରତିବର୍ଷ ମାର୍ଚ୍ଚ 4ରେ ଏହି ଦିବସ ପାଳନ କରାଯାଏ । କର୍ମକ୍ଷେତ୍ରରେ ଏକ ନିରାପଦ ପରିବେଶ ବଜାୟ ରଖିବା, କୌଣସି ପ୍ରକାର ଦୁର୍ଘଟଣାକୁ ଏଡାଇବା ପାଇଁ ପ୍ରତ୍ୟେକ ପ୍ରସଙ୍ଗରେ ସୁରକ୍ଷା ବ୍ୟବସ୍ଥା ଗ୍ରହଣ କରିବା ଲକ୍ଷ୍ୟ ନେଇ ମଧ୍ୟ ଜାତୀୟ ସୁରକ୍ଷା ସପ୍ତାହ ପାଳନ କରାଯାଏ ।
ଜାତୀୟ ସୁରକ୍ଷା ପରିଷଦ ଏହାର ସୁରକ୍ଷା ନିୟମ ଏବଂ ପ୍ରୋଟୋକଲରେ ସଡକ ସୁରକ୍ଷା, କର୍ମକ୍ଷେତ୍ରର ସୁରକ୍ଷା, ମାନବ ସ୍ୱାସ୍ଥ୍ୟର ସୁରକ୍ଷା ଏବଂ ପରିବେଶ ନିରାପତ୍ତା ସମେତ ଅନେକ କ୍ଷେତ୍ରରେ ସୁରକ୍ଷା ବ୍ୟବସ୍ଥା ଅନ୍ତର୍ଭୁକ୍ତ କରିଛି । ପ୍ରତିବର୍ଷ ଏହି କାର୍ଯ୍ୟକ୍ରମ ଏକ ଥିମ୍(ବିଷୟବସ୍ତୁ) ଉପରେ ପାଳନ କରାଯାଏ । ଚଳିତ ବର୍ଷ ଜାତୀୟ ସୁରକ୍ଷା ଦିବସ 'ଆୱାର୍ ମିଶନ-ଜିରୋ ହାର୍ମ' ଅର୍ଥାତ୍ 'ଆମର ମିଶନ-ଶୂନ୍ୟ କ୍ଷତି' ବିଷୟବସ୍ତୁ ଉପରେ ପାଳନ କରାଯାଉଛି ।
ଜାତୀୟ ସୁରକ୍ଷା ଦିବସ ଇତିହାସ:1972 ମସିହାରେ ପ୍ରଥମ ଥର ପାଇଁ ଜାତୀୟ ସୁରକ୍ଷା ଦିବସ ଆୟୋଜିତ ହୋଇଥିଲା । ଶ୍ରମ ଏବଂ ରୋଜଗାର ମନ୍ତ୍ରଣାଳୟ ଦ୍ୱାରା ଆୟୋଜିତ ଭାରତରେ ପ୍ରଥମ ଶିଳ୍ପ ସୁରକ୍ଷା ସମ୍ମିଳନୀ ପରେ ଏହି ଦିବସ ପାଳନ ଆରମ୍ଭ କରାଯାଇଥିଲା । ସେବେଠାରୁ ଦେଶର ସମସ୍ତ କାର୍ଯ୍ୟାଳୟରେ ଏକ ନିରାପଦ କାର୍ଯ୍ୟ ପରିବେଶକୁ ପ୍ରୋତ୍ସାହିତ କରିବା ଲକ୍ଷ୍ୟରେ ପ୍ରତିବର୍ଷ ଜାତୀୟ ସୁରକ୍ଷା ଦିବସ ପାଳନ କରାଯାଉଛି । ଉଲ୍ଲେଖନୀୟ କଥା ହେଉଛି, 1966 ମସିହାରେ ମୁମ୍ବାଇ ସୋସାଇଟି ଆକ୍ଟ ଅନୁଯାୟୀ ଜାତୀୟ ସୁରକ୍ଷା ପରିଷଦ ଗଠନ କରାଯାଇଥିଲା ।