ହାଇଦ୍ରାବାଦ:ବିଶ୍ୱ ସ୍ତରରେ କର୍କଟ ଏକ ଗମ୍ଭୀର ସ୍ବାସ୍ଥ୍ୟ ସମସ୍ୟା ହୋଇ ଉଭା ହୋଇଛି । ଏହି ରୋଗରେ ଆକ୍ରାନ୍ତ ରୋଗୀ ଏବଂ ମୃତ୍ୟୁସଂଖ୍ୟା ମଧ୍ୟ ବର୍ଷକୁ ବର୍ଷ ବୃଦ୍ଧି ପାଇବାରେ ଲାଗିଛି । ଭାରତରେ ମଧ୍ୟ ଗତ 10 ବର୍ଷ ଭିତରେ କର୍କଟ ରୋଗ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ଛୋଟ ଛୁଆଙ୍କଠାରୁ ବୃଦ୍ଧ ପର୍ଯ୍ୟନ୍ତ ସମସ୍ତେ ଏହି ରୋଗରେ ଆକ୍ରାନ୍ତ ହେଉଛନ୍ତି । ଯଦି ଜୀବନଶୈଳୀ ଏବଂ ଖାଦ୍ୟାଭ୍ୟାସରେ ପରିବର୍ତ୍ତନ କରାନଯାଏ, ତେବେ କିଛି ବର୍ଷ ମଧ୍ୟରେ କର୍କଟ ରୋଗୀଙ୍କ ସଂଖ୍ୟା ଆହୁରି ବୃଦ୍ଧି ପାଇପାରେ ବୋଲି କୁହାଯାଇଛି । ଆସନ୍ତା କିଛି ବର୍ଷ ମଧ୍ୟରେ କର୍କଟ ରୋଗୀ ଏବଂ ମୃତ୍ୟୁସଂଖ୍ୟା ବୃଦ୍ଧି ପାଇପାରେ ବୋଲି କୁହାଯାଇଛି। ଏହା ସ୍ବାସ୍ଥ୍ୟସେବା ଉପରେ ଏକ ବଡ଼ ଚାପ ହେବ । ଏହାର ବିପଦକୁ ବିଚାରକୁ ନେଇ ସମସ୍ତେ କର୍କଟ ରୋଗକୁ ରୋକିବା ପାଇଁ ପଦକ୍ଷେପ ନେବା ଆବଶ୍ୟକ ବୋଲି କୁହାଯାଇଛି ।
କର୍କଟ ରୋଗକୁ ଶୀଘ୍ର ଚିହ୍ନଟ, ପ୍ରତିରୋଧ ଏବଂ ଚିକିତ୍ସା ବିଷୟରେ ଜନସଚେତନତା ସୃଷ୍ଟି କରିବା ପାଇଁ ପ୍ରତିବର୍ଷ 7 ନଭେମ୍ବରରେ ଭାରତରେ ଜାତୀୟ କର୍କଟ ସଚେତନତା ଦିବସ ପାଳନ କରାଯାଏ। ସ୍ୱାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ, ଭାରତରେ କର୍କଟ ରୋଗର ହାର ପଶ୍ଚିମ ଦେଶମାନଙ୍କ ପରି ଦ୍ରୁତ ଗତିରେ ବୃଦ୍ଧି ପାଉ ନାହିଁ । କିନ୍ତୁ ଜନସଂଖ୍ୟା ବୃଦ୍ଧି ଏବଂ ସଚେତନତାର ଅଭାବ ଯୋଗୁଁ ରୋଗୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି ।
2040 ସୁଦ୍ଧା ପ୍ରତିବର୍ଷ 20 ଲକ୍ଷ ରୋଗୀ ଚିହ୍ନଟ ହୋଇପାରନ୍ତି:ଭାରତୀୟ କଂଗ୍ରେସ (ଆଇସିସି)ର ଉଦଘାଟନୀ ଉତ୍ସବରେ ଉପସ୍ଥାପିତ କରାଯାଇଥିବା ତଥ୍ୟ ଅନୁଯାୟୀ, ଦେଶରେ ପ୍ରତିବର୍ଷ 1.4 ମିଲିୟନ (14 ଲକ୍ଷ) ଲୋକ କ୍ୟାନ୍ସରରେ ଆକ୍ରାନ୍ତ ହେଉଛନ୍ତି । ତେବେ 2040 ସୁଦ୍ଧା ଏହି ସଂଖ୍ୟା 20 ଲକ୍ଷକୁ ବୃଦ୍ଧି ପାଇପାରେ। ତଥ୍ୟ ଅନୁସାରେ ଭାରତରେ ସର୍ବାଧିକ ସଂଖ୍ୟକ କର୍କଟ ରୋଗୀ ଉତ୍ତର-ପୂର୍ବ ରାଜ୍ୟରୁ ଚିହ୍ନଟ ହେଉଛନ୍ତି । ମିଜୋରାମର ରାଜଧାନୀ ଆଇଜ୍ୱାଲ୍ରେ ପ୍ରତି 1 ଲକ୍ଷ ଜନସଂଖ୍ୟାରେ 270ଜଣ କର୍କଟ ରୋଗୀ ଚିହ୍ନଟ ହେଉଛନ୍ତି । ସ୍ୱାସ୍ଥ୍ୟ ବିଶେଷଜ୍ଞମାନେ କହିଛନ୍ତି ଯେ କର୍କଟ ରୋଗକୁ ରୋକିବା ପାଇଁ କମ ବୟସରୁ ଉଦ୍ୟମ କରିବା ସହିତ କେତେକ ଖରାପ ଅଭ୍ୟାସଠାରୁ ଦୂରରେ ରହିବା ଆବଶ୍ୟକ ବୋଲି କୁହାଯାଇଛି।
ମଦ୍ୟାପାନ ଏବଂ ତମାଖୁ ସେବନ ସ୍ବାସ୍ଥ୍ୟ ପକ୍ଷେ ହାନିକାରକ: କ୍ୟାନ୍ସର ପାଇଁ ଅନେକ କାରଣ ଦାୟୀ ଅଟେ । ତେବେ ମୁଖ୍ୟତଃ ମଦ୍ୟପାନ ଏବଂ ତମାଖୁ ସେବନ ସେଥିମଧ୍ୟରୁ ମୁଖ୍ୟ କାରଣ ଅଟେ । ତମାଖୁ ସେବନ ଦ୍ବାରା ଶରୀରରେ ରୋଗ ପ୍ରତିରୋଧକ ଶକ୍ତି ହ୍ରାସ ହେବା ସହିତ ରୋଗ ହେବାର ଆଶଙ୍କା ବୃଦ୍ଧି ପାଇଥାଏ । ମଦ୍ୟପାନ ଦ୍ବାରା ଖାଦ୍ୟନଳୀ, ସ୍ତନ, ଯକୃତ ସହିତ ଅନେକ ପ୍ରକାର କର୍କଟ ରୋଗ ହେବାର ସମ୍ଭାବନା ଅଧିକ ଦେଖାଯାଇଥାଏ ।