କୋଭିଡ ମହାମାରୀ ସମୟରେ ଗର୍ଭଧାରଣ ଅଧିକାଂଶ ଦମ୍ପତିଙ୍କ ପାଇଁ ଚିନ୍ତାର କାରଣ ହୋଇଛି । ଆସନ୍ତୁ ଏ ସମ୍ପର୍କରେ ବହୁଳ ଭାବେ ପଚରାଯାଉଥିବା କିଛି ପ୍ରଶ୍ନର ଉତ୍ତର ଜାଣିବା ।
- କୋଭିଡ-୧୯ ସମୟରେ ଗର୍ଭବତୀ ମହିଳାଙ୍କ ପ୍ରତି ଅଧିକ ବିପଦ ଥାଏ କି ?
ଗର୍ଭବତୀ ମହିଳାଙ୍କ ଉପରେ କୋଭିଡ-୧୯ ସଂକ୍ରମଣ ପ୍ରଭାବ ନେଇ ବର୍ତ୍ତମାନ ଗବେଷଣା ଚାଲୁଛି । କିନ୍ତୁ ଗର୍ଭବତୀ ମହିଳାଙ୍କ ପ୍ରତି କୋରୋନା ସଂକ୍ରମଣର ବିପଦ ଅଧକ ବୋଲି ଏ ଯାଏଁ କୌଣସି ପ୍ରମାଣ ମିଳିନାହିଁ । ଏ ନେଇ ସୀମିତ ତଥ୍ୟ ହିଁ ଉପଲବ୍ଧ ରହିଛି । ହେଲେ ଶରୀର ଓ ପ୍ରତିରୋଧକ ବ୍ୟବସ୍ଥାରେ ପରିବର୍ତ୍ତନ ହେଉଥିବାରୁ ଗର୍ଭବତୀ ମହିଳାମାନେ ଶ୍ୱାସଜନିତ ସଂକ୍ରମଣ ଦ୍ୱାରା ଗୁରୁତର ପ୍ରଭାବିତ ହେବା ଆଶଙ୍କା ଅଧିକ ଥାଇପାରେ ବୋଲି କୁହାଯାଉଛି । ତେଣୁ କୋଭିଡ-୧୯ ସଂକ୍ରମଣ ଏଡାଇବା ପାଇଁ ଗର୍ଭବତୀ ମହିଳାମାନଙ୍କୁ ଯଥାସମ୍ଭବ ସତର୍କତା ଅବଲମ୍ବନ କରିବା ଜରୁରୀ । ଜ୍ୱର, କଫ ଓ ନିଶ୍ୱାସ ପ୍ରଶ୍ୱାସ ନେବାରେ କଷ୍ଟ ହେଉଥିଲେ ସେମାନେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରିବା ଉଚିତ ।
2. ଗର୍ଭବତୀ ଥିବା ସମୟରେ କୋଭିଡ-୧୯ରୁ କିପରି ସୁରକ୍ଷିତ ରହିପାରିବେ ?
କୋଭିଡ ସଂକ୍ରମଣରୁ ସୁରକ୍ଷିତ ରହିବା ପାଇଁ ସ୍ଥାନୀୟ ସ୍ୱାସ୍ଥ୍ୟ ଅଧିକାରୀଙ୍କ କିଛି ସାଧାରଣ ସତର୍କତାମୂଳକ ପରାମର୍ଶ ମାନି ଚଳିଲେ ଭଲ । ସେହି ପରାମର୍ଶଗୁଡିକ ହେଲା...
- ସାବୁନ ପାଣି ବା ଆଲକୋହଲ ଭିତ୍ତିକ ହ୍ୟାଣ୍ଡ ରବରେ ବାରମ୍ବାର ହାତ ଧୋଇବା
- ଆପଣ ଓ ଅନ୍ୟମାନଙ୍କ ମଧ୍ୟରେ କିପରି ବ୍ୟବଧାନ ରହିବ, ତାହା ନିଶ୍ଚିତ କରନ୍ତୁ । ଜନଗହଳିପୂର୍ଣ୍ଣ ସ୍ଥାନରୁ ଦୂରେଇ ରହନ୍ତୁ ।
- ଆଖି, ନାକ ଓ ପାଟିକୁ ଛୁଅଁନ୍ତୁ ନାହିଁ ।
- ରେସପିରେଟରୀ ହାଇଜିନ ଅଭ୍ୟାସ କରନ୍ତୁ । ଏହାର ଅର୍ଥ ହେଲା ଯେ, କାଶ ଓ ଛିଙ୍କ ବେଳେ ମୁହଁକୁ ଟିସୁ ପେପର ବା କହୁଣୀ ବଙ୍କା କରି ଘୋଡାନ୍ତୁ । ଟିସୁକୁ ତୁରନ୍ତ ଫିଙ୍ଗିଦିଅନ୍ତୁ ।
3. ମହିଳାଙ୍କଠାରୁ ତାଙ୍କର ଗର୍ଭସ୍ଥ ଶିଶୁ ବା ନବଜାତ ଶିଶୁ କୋଭିଡ-୧୯ ସଂକ୍ରମଣ ହୋଇପାରେ କି ?
ଏ ନେଇ ବି ଠୋସ୍ ପ୍ରମାଣ ନାହିଁ । କୋଭିଡ-୧୯ ସଂକ୍ରମିତ ଗର୍ଭବତୀ ମହିଳାଙ୍କ ଦ୍ୱାରା ତାଙ୍କ ଗର୍ଭସ୍ଥ ଶିଶୁ ବା ଡେଲିଭରି ବେଳେ ନବଜାତକଙ୍କୁ ସଂକ୍ରମଣ ହେବ କି ନାହିଁ, ସେ ବାବଦରେ କିଛି ଜଣାପଡିନାହିଁ । ଆମନିଓଟିକ୍ ଫ୍ଲୁଏଡ୍ ଓ ବ୍ରେଷ୍ଟମିଲ୍କ ସାମ୍ପଲରେ ଏଯାଏଁ ଭାଇରସ ମିଳିନାହିଁ ।