ହାଇଦ୍ରାବାଦ:ସର୍ବଭାରତୀୟ ସ୍ତରରେ କର୍କଟ ରୋଗରେ ମୃତ୍ୟୁ ଏକ ଚିନ୍ତାଜନକ କାରଣ ସାଜିଛି । ସାରା ବିଶ୍ୱରେ ବିଭିନ୍ନ ପ୍ରକାରର କର୍କଟ ରୋଗ କାରଣରୁ ଲକ୍ଷ ଲକ୍ଷ ଲୋକ ମୃତ୍ୟୁବରଣ କରନ୍ତି । ପୁରୁଷଙ୍କ ଠାରେ ପ୍ରୋଷ୍ଟେଟ୍ ଏବଂ ମହିଳାଙ୍କ ଠାରେ ଓଭାରି-ସ୍ତନ କର୍କଟ ରୋଗର ମାମଲା ଅଧିକ ଦେଖାଯାଉଛି । ଏନେଇ ଏକ ରିପୋର୍ଟରେ ପ୍ରକାଶ କରାଯାଇଛି । ତେବେ କ୍ୟାନ୍ସରରେ ପୁରୁଷଙ୍କ ତୁଳନାରେ ମହିଳାଙ୍କ ମୃତ୍ୟୁ ସଂଖ୍ୟା ଅଧିକ ବୋଲି କୁହାଯାଇଛି ।
ଭାରତରେ କର୍କଟ ରୋଗ ଏକ ଚିନ୍ତାଜନକ ବିଷୟ ହୋଇଥିବାରୁ ସ୍ୱାସ୍ଥ୍ୟ ବିଶେଷଜ୍ଞମାନେ ସମସ୍ତ ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି । କର୍କଟ ରୋଗରୁ ମୃତ୍ୟୁ ହାର ବୃଦ୍ଧି ହେବାର କାରଣ ଜାଣିବା ପାଇଁ ଅନୁସନ୍ଧାନକାରୀ ଟିମ ଏକ ଅଧ୍ୟୟନ କରିଥିଲେ । ଯେଉଁଥିରେ ଅନେକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଥିବା କୁହାଯାଇଛି । ଅଧ୍ୟୟନର ରିପୋର୍ଟରେ ବୈଜ୍ଞାନିକମାନେ କହିଛନ୍ତି ଯେ, ପୁରୁଷଙ୍କ ଅପେକ୍ଷା ମହିଳାଙ୍କ ଠାରେ କର୍କଟ ରୋଗ ହେବାର ଆଶଙ୍କା ଅଧିକ ଦେଖାଯାଉଛି । ଭାରତରେ କର୍କଟ ରୋଗରେ ମୃତ୍ୟୁ ହାର ପୁରୁଷଙ୍କ କ୍ଷେତ୍ରରେ ବାର୍ଷିକ 0.19 ପ୍ରତିଶତ ହ୍ରାସ ପାଇଛି, କିନ୍ତୁ ମହିଳାଙ୍କ କ୍ଷେତ୍ରରେ ଏହା 0.25 ପ୍ରତିଶତ ବୃଦ୍ଧି ପାଇଛି । ମହିଳାମାନଙ୍କ କ୍ଷେତ୍ରରେ ବଢୁଥିବା ବିପଦ ଉଦବେଗଜନକ ହୋଇପାରେ ବୋଲି ରିପୋର୍ଟରେ କୁହାଯାଇଛି ।
କ୍ୟାନ୍ସରରେ ପୁରୁଷଙ୍କ ଅପେକ୍ଷା ମହିଳାଙ୍କ ମୃତ୍ୟୁ ସଂଖ୍ୟା ଅଧିକ: ଭାରତୀୟଙ୍କ ଠାରେ କର୍କଟ ରୋଗ କାହିଁକି ଅଧିକ ରହିଥାଏ ବୋଲି ଏକ ଅଧ୍ୟୟନ କରାଯାଇଥିଲା । 23 ପ୍ରକାରର କର୍କଟକୁ ନେଇ ଅନୁଧ୍ୟାନ କରାଯାଇଥିଲା । ଯାହା 2000 ରୁ 2019 ମଧ୍ୟରେ 12.85 ମିଲିୟନ ଲୋକଙ୍କର ମୃତ୍ୟୁ ଘଟିଥିବା ନେଇ ରିପୋର୍ଟରେ କୁହାଯାଇଛି । ଆମେରିକୀୟ ସୋସାଇଟି ଅଫ୍ କ୍ଲିନିକାଲ୍ ଅଙ୍କୋଲୋଜି ସହିତ ଜଡିତ ଏକ ପତ୍ରିକା JCO ଗ୍ଲୋବାଲ୍ ଅଙ୍କୋଲୋଜିରେ ପ୍ରକାଶିତ ଏକ ଅଧ୍ୟୟନରେ ବିଶେଷଜ୍ଞମାନେ କହିଛନ୍ତି ଯେ ଏହି ଗୁରୁତର ରୋଗର ବିପଦ ବିଷୟରେ ଆମକୁ ସତର୍କ ରହିବା ଆବଶ୍ୟକ ।
ଅଗ୍ନାଶୟ କ୍ୟାନ୍ସରରେ ମୃତ୍ୟୁ ସଂଖ୍ୟା ଅଧିକ:ଅଧ୍ୟୟନ ଅନୁଯାୟୀ, 2000 ରୁ 2019 ମଧ୍ୟରେ ସର୍ବାଧିକ ମୃତ୍ୟୁ ହୋଇଥିବା କର୍କଟ ରୋଗ ମଧ୍ୟରେ ଫୁସଫୁସ, ସ୍ତନ, କଲୋରେକ୍ଟମ୍, ଲିମ୍ଫୋମା, ମଲ୍ଟିପଲ ମାଇଲୋମା, ଗାଲ୍ ବ୍ଲାଡର, ଅଗ୍ନାଶୟ, କିଡନୀ ଏବଂ ମେସୋଥେଲିଓମା କର୍କଟ ଅଟେ । ଅଗ୍ନାଶୟ କର୍କଟ ହେତୁ ମୃତ୍ୟୁ ହାର ପୁରୁଷ ଏବଂ ମହିଳାଙ୍କ ମଧ୍ୟରେ 2.7 ପ୍ରତିଶତ ସର୍ବାଧି କ। ପୁରୁଷମାନଙ୍କରେ ଏହି କର୍କଟ କାରଣରୁ ମୃତ୍ୟୁ ହାର ବାର୍ଷିକ 2.1 ପ୍ରତିଶତ ରହିଥିବା ବେଳେ ମହିଳାମାନଙ୍କ ଠାରେ ମୃତ୍ୟୁ ହାର 3.7 ପ୍ରତିଶତ ବୃଦ୍ଧି ହୋଇଥିଲା ।