ହାଇଦ୍ରାବାଦ:ସହରୀ ପରିବେଶ ଏବଂ ଜୀବନଶୈଳୀ ସ୍ୱାସ୍ଥ୍ୟ ଉପରେ ନକାରାତ୍ମକ ପ୍ରଭାବ ପକାଉଥିବା ଦେଖିବାକୁ ମିଳିଛି । ଏନେଇ କରାଯାଇଥିବା ଏକ ଅଧ୍ୟୟନରେ ଏକ ଚିନ୍ତାଜନକ ରିପୋର୍ଟ ପ୍ରକାଶ ପାଇଛି । କୁହାଯାଇଛି ଯେ, ଗ୍ରାମାଞ୍ଚଳରେ ରହୁଥିବା ଲୋକଙ୍କ ତୁଳନାରେ ସହରାଞ୍ଚଳରେ ଲୋକଙ୍କର କମୁଛି ଆୟୁଷ । ଏଥିପାଇଁ ତ ଅନେକ କାରଣ ଥାଇପାରେ, କିନ୍ତୁ ଦ୍ରୁତ ଗତିରେ ବଢୁଥିବା ବାୟୁ ପ୍ରଦୂଷଣକୁ ନେଇ ବୈଜ୍ଞାନିକମାନେ ଅଧିକ ଚିନ୍ତା ପ୍ରକଟ କରିଛନ୍ତି । ବାୟୁ ପ୍ରଦୂଷଣ ଫୁସଫୁସ ରୋଗ ଏବଂ ଆଲଜାଇମର ଭଳି ରୋଗର ଏକ ପ୍ରମୁଖ କାରଣ ବୋଲି ଜଣାପଡିଛି । ଯାହା କେବଳ ଜୀବନଶୈଳୀକୁ ଖରାପ କରିନଥାଏ ବରଂ ଏହାର ସାଂଘାତିକ ପାର୍ଶ୍ୱ ପ୍ରତିକ୍ରିୟା ମଧ୍ୟ ଦେଖିବାକୁ ମିଳୁଛି ।
ହାଓ୍ବାର୍ଡ ମେଡିକାଲ୍ ସ୍କୁଲର ବିଶେଷଜ୍ଞମାନେ ଅଧ୍ୟୟନରେ ଉଦବେଗ ପ୍ରକାଶ କରିଛନ୍ତି ଯେ, ଯଦି ବାୟୁ ପ୍ରଦୂଷଣକୁ ହ୍ରାସ କରିବା ପାଇଁ ପର୍ଯ୍ୟାପ୍ତ ପଦକ୍ଷେପ ନିଆ ନଯାଏ ତେବେ ଏହା ଭବିଷ୍ୟତ ପାଇଁ ଏକ ଗୁରୁତର ସୂଚକ ହୋଇପାରେ । ଏହି କାରଣରୁ, ଲୋକଙ୍କ ଆୟୁଷ ହ୍ରାସ ପାଇଥିବାର ଦେଖାଯାଏ । ପୂର୍ବ ଅପେକ୍ଷା ଅନେକ ଗମ୍ଭୀର ଏବଂ କ୍ରନିକ ରୋଗର ଆଶଙ୍କା ଯଥେଷ୍ଟ ବୃଦ୍ଧି ପାଉଥିବା ଜଣାପଡିଛି ।
କାହିଁକି ହେଉଛି ଅକାଳ ମୃତ୍ୟୁ: ବାୟୁ ପ୍ରଦୂଷଣ ଫୁସଫୁସ କର୍କଟ, କ୍ରନିକ ଅବଷ୍ଟ୍ରକ୍ଟିଭ ପ୍ଲୋମନାରି ଡିଜିଜ(ସିଓପିଡି), ଆଜମା, ହୃଦରୋଗ ଏବଂ ଷ୍ଟ୍ରୋକ ସୃଷ୍ଟି କରିଥାଏ । ଚୀନରେ ସମ୍ପୃକ୍ତ ଏକ ଅଧ୍ୟୟନରୁ ଜଣାପଡିଛି ଯେ 75 ବର୍ଷରୁ ଅଧିକ ବୟସ୍କର ଲୋକେ ପ୍ରତି ଲକ୍ଷେରେ 1ହଜାର 166ଜଣଙ୍କ ମୃତ୍ୟୁ ହେଉଛି ଯାହାର କାରଣ ବାୟୁ ପ୍ରଦୂଷଣ । ବାୟୁ ପ୍ରଦୂଷଣ ହେତୁ ଡିମେନ୍ସିଆ ଏବଂ ଆଲଜାଇମର ରୋଗ ବୃଦ୍ଧି ପାଇଥିବାର ଦେଖାଯାଇଛି ।
ଅଧ୍ୟୟନରୁ ଜଣାପଡିଛି ଯେ, ବାୟୁ ପ୍ରଦୂଷଣ କଗନିଟିଭ ଏବିଲିଟି କ୍ଷମତାକୁ ହ୍ରାସ କରିପାରେ ଏବଂ ଡିମେନ୍ସିଆ ଓ ଆଲଜାଇମର ରୋଗ ଅଧିକ ହୋଇପାରେ। ଚୀନ୍ ଏବଂ ଆମେରିକାର ଅନୁସନ୍ଧାନକାରୀଙ୍କ ମିଳିତ ବିଶ୍ଳେଷଣରୁ ଜଣାପଡିଛି ଯେ ବାୟୁ ପ୍ରଦୂଷଣର ଦୀର୍ଘକାଳୀନ ସଂସ୍ପର୍ଶରେ ଆସିବା ମାନସିକ କାର୍ଯ୍ୟଦକ୍ଷତାକୁ ପ୍ରଭାବିତ କରିପାରେ ।