ରାଉରକେଲା:ସୁନ୍ଦରଗଡ଼ ଜିଲ୍ଲାରେ ଥମୁନି ହାତୀ ଉପଦ୍ରବ । ପୁଣି ମୁଣ୍ଡ ନେଲା ଜଙ୍ଗଲୀ ହାତୀ । ସୁନ୍ଦରଗଡ଼ ଜିଲ୍ଲା ସୀମାନ୍ତ ଅଞ୍ଚଳ ନୂଆଗାଁ ବ୍ଲକରେ ହାତୀ ଆକ୍ରମଣରେ ମହିଳାଙ୍କ ମୃତ୍ୟୁ ଘଟିଛି । ମୃତ ମହିଳା ଜଣକ ହେଉଛନ୍ତି ଝାଡ଼ଖଣ୍ଡ ସୀମାନ୍ତବର୍ତ୍ତୀ କରଡେଗା ପଞ୍ଚାୟତ ବାସିନ୍ଦା ସୁମନ ଗୁଡ଼ିଆ । ଶୌଚ ପାଇଁ ଯାଇଥିବା ବେଳେ ଏକ ଜଙ୍ଗଲୀ ହାତୀ ଆକ୍ରମଣରେ ତାଙ୍କର ମୃତ୍ୟୁ ଘଟିଛି ।
ସୂଚନା ଅନୁଯାୟୀ, ମଙ୍ଗଳବାର ଭୋରରୁ ସୁମନ ଗୁଡ଼ିଆ ଶୌଚ ପାଇଁ ଘର ଠାରୁ କିଛି ଦୂରକୁ ଯାଇଥିଲେ । ଏହି ସମୟରେ ଏକ ଜଙ୍ଗଲୀ ହାତୀ ହାବୁଡ଼ରେ ପଡ଼ିଥିଲେ । ସୁମନଙ୍କୁ ଟେକି ନେଇ ଝାଡ଼ଖଣ୍ଡ ଜଙ୍ଗଲରେ ମୃତଦେହ ପକାଇଥିବା ଦେଖିବାକୁ ମିଳିଛି । ଖବର ପାଇ ବୁଧବାର ସକାଳୁ ବିରମିତ୍ରପୁର ଏବଂ ଝାଡ଼ଖଣ୍ଡ ବନ ବିଭାଗ ଅଧିକାରୀ ମାନେ ଘଟଣାସ୍ଥଳରେ ପହଞ୍ଚିଛନ୍ତି । ମୃତଦେହ ଉଦ୍ଧାର କରି ଘଟଣାର ତଦନ୍ତ କରାଯାଉଛି ।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, "ସୁମନ ଶୌଚ ପାଇଁ ଯାଇଥିବା ବେଳେ ହାତୀ ଆକ୍ରମଣର ଶିକାର ହୋଇଥିଲେ । ହାତୀଟି ସୁମନଙ୍କୁ କଚାଡି ମାରିବା ପରେ ସେହି ସ୍ଥାନରୁ ଉଠାଇ ନେଇ ଝାଡ଼ଖଣ୍ଡର ଏକ ଦୂର ଜଙ୍ଗଲରେ ଫିଙ୍ଗି ଦେଇଥିଲା । ଯାହା ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଛି ।" କ୍ରମାଗତ ଭାବେ ଜିଲ୍ଲାରେ ହାତୀ ଆକ୍ରମଣରେ ଲୋକଙ୍କ ପ୍ରାଣହାନୀ ହେଉଥିବାରୁ ଏଥିପ୍ରତି ବିହିତ ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି । ସତର୍କ ସୂଚନା ଫଳକ ଲଗାଇବା, ନିର୍ଦ୍ଧାରିତ ରାସ୍ତା ତିଆରି କରିବା, ହାତୀମାନେ ଯେପରି ଜନବସତି ଅଞ୍ଚଳକୁ ମାଡ଼ି ନ ଆସନ୍ତି ସେଥିପାଇଁ ବ୍ୟାରିକେଡ ଲଗାଇବା ଭଳି ପଦକ୍ଷେପ ବନ ବିଭାଗ ଯଥା ସମ୍ଭବ ଗ୍ରହଣ କରୁ ବୋଲି ଦାବି କରିଛନ୍ତି ।