ଆୟୁଷ୍ମାନ ଯୋଜନା ନେଇ ରାଜ୍ୟ ସରକାରଙ୍କୁ ଟାର୍ଗେଟ ରାଉରକେଲା:କେନ୍ଦ୍ରରେ ମୋଦି ସରକାରଙ୍କୁ ୯ ବର୍ଷ ପୁରିଥିବା ବେଳେ ଏହି ଅବସରରେ ସୁନ୍ଦରଗଡ଼ ଜିଲ୍ଲା ରାଉରକେଲା ସହରକୁ ଗସ୍ତ କରିଛନ୍ତି କେନ୍ଦ୍ର ରାଷ୍ଟ୍ର ଆୟୁଷ ଓ ମହିଳା ଓ ଶିଶୁ ବିକାଶ ମନ୍ତ୍ରୀ ମହେନ୍ଦ୍ର ମୁଞ୍ଜପଡ଼ା । ସୁନ୍ଦରଗଡ଼ ଜିଲ୍ଲା ସମସ୍ତ ବିଜେପି ମୋର୍ଚ୍ଚା ସହ ସେ ଏକ ଗୁରୁତ୍ବପୂର୍ଣ୍ଣ ବୈଠକରେ ଯୋଗ ଦେଇଛନ୍ତି । ଏହି ୯ବର୍ଷ ମଧ୍ୟରେ କେନ୍ଦ୍ର ସରକାର କିଭଳି ଏବଂ କେଉଁ କେଉଁ କ୍ଷେତ୍ରରେ ପାରଦର୍ଶିତା ଲାଭ କରିଛି ସେ ସମ୍ପର୍କରେ ଆଲୋଚନା କରିଛନ୍ତି କେନ୍ଦ୍ରମନ୍ତ୍ରୀ ।
ଏହାସହିତ ୨୦୨୪ ନିର୍ବାଚନ ଲାଗି ସେ ଦଳୀୟ ନେତାଙ୍କ ସହିତ ରଣନୀତି ମଧ୍ୟ ପ୍ରସ୍ତୁତ କରିଛନ୍ତି । ମୋଦି ସରକାର ଗତ ୯ବର୍ଷ ମଧ୍ୟରେ କିଭଳି ଲୋକାଭିମୁଖୀ ଯୋଜନା ଆଣିବା ସହିତ ଏହାକୁ କାର୍ଯ୍ୟକାରୀ କରୁଛନ୍ତି ସେ ନେଇ ଆଲୋଚନା କରିଥିଲେ କେନ୍ଦ୍ରମନ୍ତ୍ରୀ ମହେନ୍ଦ୍ର । ଆୟୁଷ୍ମାନ ଭାରତ ଯୋଜନା ଏକ ପ୍ରମୁଖ ସ୍ବାସ୍ଥ୍ୟସେବା କାର୍ଯ୍ୟକ୍ରମ ଯାହା ଗରିବ ଲୋକଙ୍କୁ ଶସ୍ତାରେ ଚିକିତ୍ସା ସେବା ପ୍ରଦାନ କରିବା ପାଇଁ ଉଦ୍ଦିଷ୍ଟ । ଆଲୋଚନା କାଳରେ କେନ୍ଦ୍ରରେ ଏହା ସ୍ଥାନ ପାଇଥିଲା ବୋଲି ସେ କହିଛନ୍ତି । ସାରା ଦେଶରେ ଲକ୍ଷ ଲକ୍ଷ ଭାରତୀୟଙ୍କ ପାଇଁ ଲାଭଦାୟକ ସାବ୍ୟସ୍ତ ହୋଇଥିବା ଏହି ଯୋଜନାକୁ ଓଡ଼ିଶା ସରକାର କାର୍ଯ୍ୟ ନ କରିବା ନେଇ ଡ. ମୁଞ୍ଜପଡ଼ା ଅସନ୍ତୋଷ ବ୍ୟକ୍ତ କରିଛନ୍ତି । ସେ ରାଜ୍ୟ ସରକାରଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠାଇବା ସହ ଏହି ଗୁରୁତ୍ବପୂର୍ଣ୍ଣ ସ୍ବାସ୍ଥ୍ୟସେବା ପଦକ୍ଷେପକୁ ବିରୋଧ କରିବାର ପୁନର୍ବିଚାର କରିବାକୁ ଅନୁରୋଧ କରିଛନ୍ତି ।
ଏହା ବି ପଢନ୍ତୁ- ଆମ୍ବ ଚାଷ ଦେଇଛି ପରିଚୟ, ସଫଳ ଚାଷୀ ପାଲଟିଛନ୍ତି କିନୁ ସିଂ
ଏହାସହ ଜିଲ୍ଲାର ବିଜେପି ସଭ୍ୟ ଓ ସମର୍ଥକଙ୍କୁ ଏକାଠି କରିଥିବା ଏହି ବୈଠକରେ ମୋଦି ସରକାରଙ୍କ ସଫଳତାର ମୂଲ୍ୟାଙ୍କନ କରିବା ସହ ଆଗାମୀ ନିର୍ବାଚନ ଲଢେଇର ରୂପରେଖ ପ୍ରସ୍ତୁତ କରିବା ଉପରେ ଗୁରୁତ୍ବାରୋପ କରାଯାଇଥିଲା । ବିଜେପିର ରାଷ୍ଟ୍ରମନ୍ତ୍ରୀ ଡ. ମହେନ୍ଦ୍ର ମୁଞ୍ଜପଡ଼ା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାରର ସଫଳତାକୁ ପ୍ରଶଂସା କରିବା ସହ ବିଭିନ୍ନ କ୍ଷେତ୍ରରେ ନିଆଯାଇଥିବା ପରିବର୍ତ୍ତନମୂଳକ ପଦକ୍ଷେପ ଉପରେ ଆଲୋକପାତ କରିଥିଲେ । ଏହି ସମାବେଶରେ ଉଦବୋଧନ ଦେଇ ଡ. ମହେନ୍ଦ୍ର ମୋଦି ସରକାରଙ୍କ ନୀତି ଏବଂ କାର୍ଯ୍ୟକ୍ରମର ନାଗରିକଙ୍କ ଜୀବନ ଉପରେ ପ୍ରଭାବ ଉପରେ ଗୁରୁତ୍ବାରୋପ କରିଥିଲେ । ପ୍ରଧାନମନ୍ତ୍ରୀ ଜନ ଧନ ଯୋଜନା, ଯାହା ଜନସାଧାରଣଙ୍କ ଆର୍ଥିକ ଅନ୍ତର୍ଭୁକ୍ତୀକରଣ ଆଣିଛି ଏବଂ ସ୍ବଚ୍ଛ ଭାରତ ଅଭିଯାନ ଭଳି ପଦକ୍ଷେପ ଉପରେ ସେ ଆଲୋକପାତ କରିଥିଲେ ।
ଭିତ୍ତିଭୂମି ବିକାଶ, ଗ୍ରାମାଞ୍ଚଳ ବିଦ୍ୟୁତକରଣ ଏବଂ ଅକ୍ଷୟ ଶକ୍ତିକୁ ପ୍ରୋତ୍ସାହନ ଦେବା ଲାଗି କରାଯାଇଥିବା ପ୍ରୟାସକୁ ମଧ୍ୟ ମନ୍ତ୍ରୀ ପ୍ରଶଂସା କରିଥିଲେ । ଆୟୁଷ୍ମାନ ଭାରତ ଯୋଜନା, ଯାହାକୁ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ମଧ୍ୟ କୁହାଯାଉଛି ତାହା ସ୍ବାସ୍ଥ୍ୟସେବା କ୍ଷେତ୍ରରେ ପରିବର୍ତ୍ତନ ଆଣିବା ପାଇଁ ଏହାର ସାମର୍ଥ୍ୟ ପାଇଁ ବ୍ୟାପକ ପ୍ରଶଂସା ଲାଭ କରିଛି । ଏହି ଯୋଜନା ଅଧୀନରେ ଯୋଗ୍ୟ ହିତାଧିକାରୀମାନେ ପ୍ରତି ପରିବାର ପିଛା ବାର୍ଷିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ସ୍ବାସ୍ଥ୍ୟ ବୀମା କଭରେଜ ପାଉଛନ୍ତି । ଦୁର୍ବଳ ପରିବାରକୁ ଆର୍ଥିକ ସୁରକ୍ଷା ପ୍ରଦାନ କରିବା ଏବଂ ଉନ୍ନତମାନର ଚିକିତ୍ସା ସେବା ସୁନିଶ୍ଚିତ କରିବାରେ ଏହା ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଛି ବୋଲି ମନ୍ତ୍ରୀ କହିଛନ୍ତି ।
ଇଟିଭି ଭାରତ, ରାଉରକେଲା
