ରାଉରକେଲା:ଓଡିଶା ଆନ୍ତଃ କ୍ଲବ ଭାରୋତ୍ତଳନ ପ୍ରତିଯୋଗିତାରେ ଚମକିଲେ ରାଉରକେଲା ଆଥଲେଟ । ଆନ୍ତଃ କ୍ଲବ ଭାରୋତ୍ତଳନ ପ୍ରତିଯୋଗିତାରେ ଭରୋତ୍ତୋଳନକାରୀଙ୍କ ଚମତ୍କାର ପ୍ରଦର୍ଶନ ଦେଖିବାକୁ ମିଳିଛି । ଓଡିଶା କ୍ରୀଡା ବିଭାଗ ପକ୍ଷରୁ ଆୟୋଜିତ ଟୁର୍ଣ୍ଣାମେଣ୍ଟରେ ଚମତ୍କାର ପ୍ରଦର୍ଶନ କରି ହାତେଇଲେ ପଦକ । ଶକ୍ତି ଓ ଦକ୍ଷତାର ଉଲ୍ଲେଖନୀୟ ପ୍ରଦର୍ଶନ କରି ରାଉରକେଲା ୟୁଥ୍ ଆଣ୍ଡ୍ ମାସସ୍ ଆସୋସିଏସନ୍ (ଆରୱାଇଏମଏ) କ୍ଲବ ଭାରୋତ୍ତୋଳକମାନେ ଆୟୋଜିତ ଓଡ଼ିଶା ଅନ୍ତଃକ୍ଲବ୍ ଭାରୋତ୍ତୋଳନ ପ୍ରତିଯୋଗିତାରେ ଚାମ୍ପିଅନ୍ ହୋଇଛନ୍ତି ।
ଜୁନ୍ 28ରୁ ଜୁନ୍ 30 ତାରିଖ ପର୍ଯ୍ୟନ୍ତ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଓଡ଼ିଶା କ୍ରୀଡ଼ା ବିଭାଗ ପକ୍ଷରୁ ଆୟୋଜିତ ହୋଇଥିଲା ଏହି ସମ୍ମାନଜନକ ଚାମ୍ପିଅନସିପ୍ । ରାଉରକେଲା ଭାରୋତ୍ତଳକାରୀମାନେ ସେମାନଙ୍କ ଅସାଧାରଣ ପ୍ରତିଭାର ପରିଚୟ ଦେଇ ବିଭିନ୍ନ ଓଜନ ବର୍ଗରେ ପଦକ ହାସଲ କରି ନିଜ ସହର ପାଇଁ ଗୌରବ ଆଣିଛନ୍ତି । ରାଉରକେଲା ଆରୱାଇଏମଏ କ୍ଲବରୁ ଆସିଥିବା ମୋଟ 6 ଜଣ ଭାରୋତ୍ତଳନକାରୀ ଦର୍ଶକଙ୍କୁ ଆକୃଷ୍ଟ କରିବା ସହ ପୂରା ଟୁର୍ଣ୍ଣାମେଣ୍ଟରେ ଚମତ୍କାର ପ୍ରଦର୍ଶନ କରିଥିଲେ । ପ୍ରତ୍ୟେକ ପ୍ରତିଯୋଗୀ ନିଜର ଶାରୀରିକ ଶକ୍ତି ପ୍ରଦର୍ଶନ କରିଥିଲେ । ରାଉରକେଲା ଭାରୋତ୍ତଳକମାନେ ବିଭିନ୍ନ ଓଜନ ବର୍ଗରେ ପ୍ରତିଦ୍ୱନ୍ଦ୍ୱିତା କରି ନିଜ ନିଜ ବିଭାଗରେ ନିଜର ଦକ୍ଷତା ଓ ଚମତ୍କାର ଖେଳ ପ୍ରଦର୍ଶନ କରିଥିଲେ ।
ଭାରୋତ୍ତଳନକାରୀଙ୍କ ସଫଳତା ବ୍ୟକ୍ତିଗତ ପ୍ରଦର୍ଶନର ପରିସୀମା ଅତିକ୍ରମ କରିଥିଲା । ଗୋଟିଏ ଦଳ ଭାବେ ସେମାନେ ପୂରା ଟୁର୍ଣ୍ଣାମେଣ୍ଟରେ ପରସ୍ପରକୁ ସମର୍ଥନ ଓ ପ୍ରୋତ୍ସାହନ ଦେଇ ଚମତ୍କାର ସମନ୍ୱୟ ଓ ସୌହାର୍ଦ୍ଦ୍ୟ ପ୍ରଦର୍ଶନ କରିଥିଲେ । ରାଉରକେଲା ଆରୱାଇଏମଏ କ୍ଳବ ପକ୍ଷରୁ ସେକ୍ଟର-୭ ରାଇମା କ୍ଲବର ଖେଳାଳିମାନେ ସଫଳତା ହାସଲ କରିଛନ୍ତି । ୮୧ କେଜି ପୁରୁଷ ବର୍ଗରେ ଦେବାଶିଷ ଦେ ଜୁନିୟରରେ ପ୍ରଥମ ସ୍ଥାନ ଅଧିକାର କରିଛନ୍ତି । ସିନିୟର ବର୍ଗରେ ସେ ତୃତୀୟ ସ୍ଥାନ ଅଧିକାର କରିଛନ୍ତି । ୯୬ କେଜି ବର୍ଗରେ ନକୁଳ ଶର୍ମା ଦ୍ୱିତୀୟ, ୧୦୨ କେଜି ବର୍ଗରେ ଅନିକେତ ଓରାମ ଦ୍ଵିତୀୟ ସ୍ଥାନ ହାସଲ କରିଥିବା ବେଳେ ରାଜା ବରୁଆ ତୃତୀୟ ସ୍ଥାନ ଅଧିକାର କରିଛନ୍ତି ।