ସୁନ୍ଦରଗଡ: ନିଖୋଜ ବିର୍ଜୁର ମିଳିଲା ପତ୍ତା । ଅନୁଗୋଳ ତାଳଚେରରୁ ଠାବ କଲା ପୋଲିସ । ସୂଚନାଥାଉକି, ପାକିସ୍ତାନର ଲାହୋର ଜେଲରେ ଦୁଇ ଦଶନ୍ଧି ବନ୍ଦୀ ଜୀବନ ବିତାଇବା ପରେ ସୁନ୍ଦରଗଡ ଫେରିଥିଲେ ବିର୍ଜୁ । ନଭେମ୍ବର 13 ତାରିଖରେ ସୁନ୍ଦରଗଡ କୁତ୍ରା ବ୍ଲକ ଜଙ୍ଗରପଡା ଫେରିଥିଲେ ସେ । ଦୀର୍ଘ 25 ବର୍ଷ ନିଖୋଜ ପରେ ବିର୍ଜୁ ଗାଁକୁ ଫେରିଥିବାରୁ ତାଙ୍କ ପରିବାର ସହିତ ପଡୋଶୀ ମଧ୍ୟ ବେଶ୍ ଖୁସି ଥିଲେ ।
ହେଲେ ସେମାନଙ୍କ ଖୁସି ପୁଣି ହଜି ଯାଇଥିଲା । ଶନିବାର ମଧ୍ୟରାତ୍ରୀରୁ ବିର୍ଜୁ ପୁଣି କେଉଁଆଡେ ଚାଲିଯାଇଥିଲା । ବହୁ ଖୋଜାଖୋଜି ପରେ ନପାଇବାରୁ ଥାନାର ଦ୍ବାରସ୍ଥ ହୋଇଥିଲେ ବିର୍ଜୁଙ୍କ ପରିବାର । ସେପଟେ ବିର୍ଜୁର ନିଖୋଜ ଘଟଣା ପରିବାର ଲୋକଙ୍କୁ ଯେତିକି ଚକିତ କରିଛି ପ୍ରଶାସନ ପାଇଁ ମଧ୍ୟ ସେତିକି ମୁଣ୍ଡ ବ୍ୟଥାର କାରଣ ସାଜିଥିଲା ।
ବିର୍ଜୁ ଫେରିବା ପରେ ତାକୁ ସମସ୍ତ ପ୍ରକାର ସରକାରୀ ସହାୟତା ଯୋଗାଇଦେବାକୁ ଉଦ୍ୟମ କରିଥିବା ପ୍ରଶାସନ, ଚିନ୍ତାରେ ପଡିଥିଲା । ବିର୍ଜୁ ଫେରିବା ପରେ ତାର ସମସ୍ତ ଖର୍ଚ୍ଚ ପ୍ରଶାସନ ତୁଲାଉଥିଲା । ଏପରିକି ରହିବା ପାଇଁ ଘର ନଥିବାରୁ ତାକୁ ପକ୍କା ଘର ଯୋଗାଇଦେବାକୁ ବ୍ୟବସ୍ଥା କରାଯାଇଥିଲା । ହେଲେ ସେ ପୁଣି କେଉଁଆଡେ ଚାଲିଯାଇଥିବାରୁ ତାକୁ ଖୋଜିବା ପାଇଁ ପ୍ରଶାସନ ପୂରା ଦମ୍ରେ ଲାଗିଥିଲା ।