ଓଲଟିଲା ବାହାଘର ଡିଜେ ଗାଡି, ଜଣେ ବାଦ୍ୟକାର ମୃତ, ୨୪ ଗୁରୁତର

ବାହାଘରରେ ଯୋଗ ଦେବା ପାଇଁ ଆସୁଥିବା ବେଳେ ଓଲଟିଲା ଡିଜେ ଗାଡ଼ି । ଦୁର୍ଘଟଣାରେ ଜଣେ ବାଦ୍ୟକାରଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ୨୪ ଜଣ ଗୁରୁତର ଅବସ୍ଥାରେ ବଣେଇ ସରକାରୀ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଅଧିକ ପଢ଼ନ୍ତୁ

ରାଉରକେଲା: ବାହାଘରରେ ଯୋଗ ଦେବା ପାଇଁ ଆସୁଥିବା ବେଳେ ଘଟିଲା ଅଘଟଣ । ଭାରସାମ୍ୟ ହରାଇ ଓଲଟିଲା ଡିଜେ ଗାଡ଼ି । ଡିଜେ ଗାଡି ଓଲଟିବା ଫଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ପ୍ରାୟ ୨୪ ଜଣ ଗୁରୁତର ହୋଇଥିବା ସୂଚନା ମିଳିଛି । ବଣାଇ ଇନ୍ଦ୍ରପୁରକୁ ବାହାଘର ଆସୁଥିବା ବେଳେ ବଣେଇ ଉପଖଣ୍ଡ ଟିକେଟପାଲି ଥାନା ଅନ୍ତର୍ଗତ ସରସରା କୂଳକୁତା ଘାଟିରେ ଘଟିଲା ଅଘଟଣ ।

ବାହାଘର ପାଇଁ ପିକ୍‌ଅପ ଗାଡ଼ିରେ ଡିଜେ ଲୋଡ଼ ହୋଇ ଆସୁଥିବା ବେଳେ ବଣେଇ ଉପଖଣ୍ଡ ଟିକେଟପାଲି ଥାନା ଅନ୍ତର୍ଗତ ସରସରା କୂଳକୁତା ଘାଟିରେ ଭାରସାମ୍ୟ ହରାଇ ଗାଡିଟି ଓଲଟି ପଡ଼ିଥିଲା । ଡିଜେ ପିକ୍‌ଅପ ଗାଡି ଦୁର୍ଘଟଣାରେ ମୋଟ ୨୪ ବାଦ୍ୟକାର ଗୁରୁତର ହୋଇଥିବା ବେଳେ ଜଣଙ୍କର ମୃତ୍ୟୁ ଘଟିଛି । ଏହି ଦୁର୍ଘଟଣାରେ ୨୪ ଗୁରୁତର ମଧ୍ୟରୁ ଚାରିଜଣ ବାଦ୍ୟକାରଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେମାନଙ୍କୁ ବଣେଇ ଚିକିତ୍ସାଳୟରୁ ରାଉରକେଲା ସରକାରୀ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି ।

ମିଳିଥିବା ସୂଚନା ଅନୁସାରେ, ବରଗଡରୁ ଏକ ପିକ୍‌ଅପ ଗାଡ଼ିରେ ଡିଜେ ଫିଟିଂ ହୋଇ ୨୫ ଜଣ ବାଦ୍ୟ କଳାକାରଙ୍କୁ ନେଇ ଇନ୍ଦ୍ରପୁର ଗ୍ରାମକୁ ଏକ ବାହାଘରରେ ଯୋଗ ଦେବାପାଇଁ ଆସୁଥିଲେ । ସମସ୍ତ ବାଦ୍ୟକାରମାନେ ଗାଡିର ଡାଲାରେ ଛିଡ଼ା ହୋଇଥିଲେ । ହଠାତ ସରସରା ଗ୍ରାମର କୂଳକୁତା ଘାଟିରେ ପିକ୍‌ଅପ ଗାଡିଟି ଭାରସାମ୍ୟ ହରାଇ ଓଲଟି ପଡିଥିଲା । ଫଳରେ ଗାଡି ତଳେ ମଧ୍ୟ କିଛି ଜଣ ଚାପି ହୋଇଯାଥିଲେ । ସେମାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ୪ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି । ସେମାନଙ୍କୁ ରାଉରକେଲା ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି । ଅନ୍ୟ ୨୦ ବାଦ୍ୟକାରଙ୍କ ମଧ୍ୟରୁ ୫ ଜଣ ସାମାନ୍ୟ ଆହତ ହୋଇଥିବାବେଳେ ୧୫ ଜଣ ଗୁରୁତର ଅବସ୍ଥାରେ ବଣାଇ ସରକାରୀ ହସ୍ପିଟାଲରେ ଭର୍ତ୍ତି ହୋଇଛନ୍ତି ।

ଇଟିଭି ଭାରତ, ସୁନ୍ଦରଗଡ଼