ରାଉରକେଲା: ପାରିବାରିକ କହଳର କରୁଣ ପରିଣତି । ବର୍ଷକ ମଧ୍ୟରେ ଛାରଖାର ହୋଇଗଲା ସୁନାର ସଂସାର । ସ୍ତ୍ରୀକୁ ହତ୍ୟା କରିବା ପରେ ନିଜେ ଜୀବନ ହାରିଲା ସ୍ବାମୀ । ଗତକାଲି(ଗୁରୁବାର) ସୁନ୍ଦରଗଡ ଜିଲ୍ଲା ତଳସରା ଥାନା ଅନ୍ତର୍ଗତ ଦମକୁଡା ଗ୍ରାମରେ ଏଭଳି ଏକ ଅଭାବନୀୟ ଘଟଣା ଘଟିଛି । ମୃତ ଦମ୍ପତି ହେଉଛନ୍ତି ଦମକୁଡା ଗ୍ରାମର ହେମନ୍ତ ଦଣ୍ଡସେନା ଏବଂ ତାଙ୍କର ପତ୍ନୀ । ହେମନ୍ତ ଶ୍ବାସରୁଦ୍ଧ କରି ସ୍ତ୍ରୀକୁ ହତ୍ୟା କରିବା ପରେ ନିଜେ ଝୁଲି ପଡିଛନ୍ତି । ତେବେ କ'ଣ ପାଇଁ ସେ ଏଭଳି ଚରମ ନିଷ୍ପତ୍ତି ନେଲେ ତାହା ସ୍ପଷ୍ଟ ହୋଇନଥିବା ବେଳେ ଘରୋଇ ବିବାଦରୁ ଏପରି ଘଟିଥିବା ସନ୍ଦେହ କରାଯାଉଛି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କ ମୃତଦେହ ଉଦ୍ଧାର କରିଛି ।
ସୂଚନା ମୁତାବକ, ବର୍ଷକ ତଳେ ଦମକୁଡା ଗାଁର ହେମନ୍ତ ଏବଂ ତାଙ୍କ ସ୍ତ୍ରୀ ବିବାହ କରିଥିଲେ । ଉଭୟ ସ୍ବାମୀ-ସ୍ତ୍ରୀ ମଧ୍ୟରେ ସବୁ ଠିକଠାକ୍ ଚାଲିଥିଲା । ହେମନ୍ତ ଶ୍ରମିକ ଭାବରେ ଗୋଆ ଦାଦନ ଖଟିବାକୁ ଯାଇଥିଲେ । ଏଣେ ପତ୍ନୀ ନିଜ ଶାଶୁ ଓ ନଣନ୍ଦଙ୍କ ସହ ଶାଶୁଘରେ ରହୁଥିଲେ । ଗତ ହୋଲିରେ ଘରକୁ ଫେରିଥିଲେ ହେମନ୍ତ । ତେବେ କାହିଁକି ସେ ନିଜ ହାତରେ ସଂସାର ଉଜାଡି ଦେଲେ ତାହା ସମସ୍ତଙ୍କୁ ଚକିତ କରିଛି । ଯାହା କୁହାଯାଉଛି, ମଙ୍ଗଳବାର ଦିନ କୌଣସି କଥାକୁ ନେଇ ଉଭୟ ସ୍ୱାମୀ ଏବଂ ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା । ଏଥିରେ ରାଗି ଯାଇଥିଲେ ହେମନ୍ତ ରାଗରେ ସ୍ତ୍ରୀକୁ ଶ୍ବାସରୁଦ୍ଧ କରି ହତ୍ୟା କରିଥିଲେ । ଏହାପରେ ନିଜେ ଝୁଲି ପଡିଥିଲେ ।