ସୁନ୍ଦରଗଡ: ଅଭିନବ ଉପାୟରେ ଏଟିଏମରୁ ସିରିଜ ଲୁଟ । ରାଉରକେଲା ସହରର 4ଟି ଏଟିଏମରୁ 34 ଲକ୍ଷ ଟଙ୍କା ହେରଫେର କରିଛି ଅଭିଯୁକ୍ତ । ଏଟିଏମରେ ଟଙ୍କା ଭର୍ତ୍ତି କରୁଥିବା ସଂସ୍ଥାର କର୍ମଚାରୀ ଥିଲା ଅଫିଯୁକ୍ତ ।
ଦୀର୍ଘ ମାସ ଧରି ଅଭିଯୁକ୍ତ ଏଭଳି ହେରଫେର କାରବାର ଚଲାଇଥିବା ବେଳେ ସେକ୍ଟର – 7 ଥାନାରେ ଲୁଟ ନେଇ ଅଭିଯୋଗ ହୋଇଥିଲା । ଏ ନେଇ ପୋଲିସ ଅଭିଯୁକ୍ତକୁ ଶନିବାର ଗିରଫ କରିଛି ।
ସେକ୍ଟର-୭ ଥାନା ପୋଲିସ ଏକ ମାମଲା ରୁଜୁ କରି ଅଭିଯୁକ୍ତ ହରିଶଚନ୍ଦ୍ର ଦାସକୁ ଗିରଫ କରିଛି । ରାଇଟର୍ସ ନାମକ ଏକ ଘରୋଇ କମ୍ପାନୀ ରାଉରକେଲାର 15 ରୁ 16 ଟି ଏଟିଏମରେ ଟଙ୍କା ଭର୍ତ୍ତି କରିବାର ଦାୟିତ୍ବ ନେଇଥିଲା । ଗିରଫ ଅଭିଯୁକ୍ତ ଏହି କାମ୍ପାନୀରେ ଦୀର୍ଘ ୧ ବର୍ଷ ହେବ କର୍ମଚାରୀ ଭାବେ କାମ କରୁଥିଲା । ତେବେ ସେ ଅନ୍ୟ ଜଣେ କର୍ମଚାରୀଙ୍କର ପାସୱାର୍ଡ ବ୍ୟବହାର କରି ବର୍ଷକ ମଧ୍ୟରେ ବିଭିନ୍ନ ପର୍ଯ୍ୟାୟରେ ଟଙ୍କା ହଡପ କରିଚାଲିଥିଲା ।
ବ୍ୟାଙ୍କ ଅଡିଟ ସମୟରେ ଏହି ଟଙ୍କା ହେରଫେର ହୋଇଥିବା ନେଇ ଜଣା ପଡିଥିଲା । ପରେ ବ୍ୟାଙ୍କ କର୍ତ୍ତୃପକ୍ଷ ଏ ନେଇ ପୋଲିସର ଦ୍ବାରସ୍ଥ ହୋଇଥିଲେ । ପୋଲିସ ଏକ ମାମଲା ରୁଜୁ କରି ଶନିବାର ଅଭିଯୁକ୍ତକୁ ଗିରଫ କରି ତଦନ୍ତ ଚଳାଇଛି । ପ୍ରାଥମିକ ତଦନ୍ତ ପରେ ଅଭିଯୁକ୍ତକୁ କୋର୍ଟ ଚାଲାଣ କରାଯିବ ବୋଲି ଜଣାପଡିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ