ରାଉରକେଲା:ଇସ୍ପାତ ନଗରୀ ରାଉରକେଲାର ରଘୁନାଥପଲ୍ଲୀ ନିର୍ବାଚନ ମଣ୍ଡଳୀରେ ଫେଲ୍ ମାରିଛି ସରକାରୀ ଯୋଜନା । ଗ୍ରୀଷ୍ମ ପ୍ରବାହ ପୂର୍ବରୁ ରଘୁନାଥପଲ୍ଲୀ ଅଞ୍ଚଳର ବିଭିନ୍ନ ବସ୍ତିରେ ଉତ୍କଟ ଜଳ ସଙ୍କଟ ଦେଖାଦେଇଛି । ପାଣି ମୁନ୍ଦେ ପାଇଁ ହନ୍ତସନ୍ତ ହେଉଛନ୍ତି ହଜାର ହଜାର ବସ୍ତି ବାସିନ୍ଦା । ବର୍ତ୍ତମାନ ସୁଦ୍ଧା ଲୋକଙ୍କ ପାଖରେ ପହଞ୍ଚି ପାରୁନି ପାନୀୟ ଜଳ । ଏହି ପାଣି ସମସ୍ୟା ନେଇ ସାମ୍ବାଦିକ ସମ୍ମିଳନୀ ଜରିଆରେ ଜିଲ୍ଲା ପ୍ରଶାସନ, ଇସ୍ପାତ କାରଖାନା କର୍ତ୍ତୃପକ୍ଷ ଏବଂ ସ୍ଥାନୀୟ ବିଧାୟକଙ୍କୁ ଟାର୍ଗେଟ କରିଛି କଂଗ୍ରେସ ।
ଲୋକଙ୍କୁ ପାଣି ଯୋଗାଇବାରେ ବିଧାୟକ ସୁବ୍ରତ ତରାଇ, ରାଉରକେଲା ଇସ୍ପାତ କାରଖାନା କର୍ତ୍ତୃପକ୍ଷ ଏବଂ ଜିଲ୍ଲା ପ୍ରଶାସନର ବିଭାଗୀୟ ଅଧିକାରୀ ଅସମର୍ଥ ବୋଲି କଂଗ୍ରେସ ଅଭିଯୋଗ କରିଛି । ଯଥାଶୀଘ୍ର ସମସ୍ତ ବସ୍ତିରେ ଜଳ ସମସ୍ୟାର ସମାଧାନ ପାଇଁ ସାମ୍ବାଦିକ ସମ୍ମିଳନୀରେ ଦଳ ପକ୍ଷରୁ ଦାବି କରାଯାଇଛି । ୧୭୦ଟି ବସ୍ତିରେ କଂଗ୍ରେସ ଯାଇ ସ୍ଥିତି ପରଖି ଥିଲା ଏବଂ ଏଠାରେ ପ୍ରାୟ ୭୦ ପ୍ରତିଶତ ବସ୍ତିରେ ଆଜିବି ଲୋକେ ପାନୀୟ ଜଳ ପାଇଁ ନାନାଦି ଅସୁବିଧାର ସମ୍ମୁଖୀନ ହେଉଥିବା କୁହାଯାଇଛି ।
ଚଳିତ ବର୍ଷ ଫେବୃଆରୀ ମାସ ଆରମ୍ଭରୁ ସହରରେ ଯେଭଳି ତାତି ଅନୁଭୂତ ହେଲାଣି ଆଗକୁ ପ୍ରବଳ ଗ୍ରୀଷ୍ମ ପ୍ରବାହ ହେବାର ସମ୍ଭାବନା ରହିଛି । ବର୍ତ୍ତମାନ ଶୀତ ଋତୁରେ ମଧ୍ୟ ପାଣି ପାଇବାରୁ ବଞ୍ଚିତ ହେଉଛନ୍ତି ବହୁ ବସ୍ତି ବାସିନ୍ଦା । ବିଭିନ୍ନ ବସ୍ତିରେ ବସୁଧା ଯୋଜନାରେ ଓଭରହେଡ ଟାଙ୍କି ଲାଗିଛି କିନ୍ତୁ ଲୋକଙ୍କ ପାଖରେ ପାଣି ପହଞ୍ଚିବ ସ୍ୱପ୍ନ ହୋଇଛି ବୋଲି ଅଭିଯୋଗ କରିଛି କଂଗ୍ରେସ । ତେଣୁ ଆଗାମୀ ଦିନରେ ଉତ୍କଟ ଜଳ ସଙ୍କଟ ଦେଖାଯିବାର ସମ୍ଭାବନା ରହିଥିବା ଦଳ କହିଛି ।
ଏଥିସହ ସେକ୍ଟର ଅଞ୍ଚଳରେ ଥିବା ବହୁ ବସ୍ତିରେ ପାଇପ ବିଛା ଯାଇଥିଲେ ମଧ୍ୟ ଲୋକଙ୍କ ପାଖକୁ ପାଣି ଯୋଗାଣ ହୋଇ ପାରୁନାହିଁ । ଆଜି ମଧ୍ୟ ଲୋକେ ପାଣି ମୁନ୍ଦାଏ ପାଇଁ ଡହଳ ବିକଳ ହେଉଛନ୍ତି । କେତେକ ବସ୍ତିରେ ବର୍ତ୍ତମାନ ଯାଏ ପାଇପ ମଧ୍ୟ ବିଛା ଯାଇନାହିଁ । ଗ୍ରୀଷ୍ମ ଋତୁ ପୂର୍ବରୁ ସମସ୍ତ ବସ୍ତି ଅଞ୍ଚଳକୁ ପାନୀୟ ଜଳ ଯୋଗାଣକୁ ସୁନିଶ୍ଚିତ କରିବାକୁ କଂଗ୍ରେସ ନେତା ପ୍ରଶାନ୍ତ ସେଠି ସାମ୍ବାଦିକ ସମ୍ମିଳନୀରେ ଦାବି କରିଛନ୍ତି । ବସ୍ତି ଅଞ୍ଚଳରେ ଶୀଘ୍ର ପାନୀୟ ଜଳ ଯୋଗାଣର ବ୍ୟବସ୍ଥା କରାଯାଉ । ଯଦି ଜିଲ୍ଲା ପ୍ରଶାସନ, ରାଉରକେଲା ଇସ୍ପାତ କାରଖାନା ଏବଂ ବିଧାୟକ ଏହି ସମସ୍ୟା ନଶୁଣନ୍ତି ତେବେ ଆଗାମୀ ଦିନରେ ଆନ୍ଦୋଳନ ତୀବ୍ର ହେବ ବୋଲି କଂଗ୍ରେସ ପକ୍ଷରୁ ଚେତାବନୀ ଦିଆଯାଇଛି ।
ଇଟିଭି ଭାରତ, ରାଉରକେଲା
