ରାଉରକେଲା:ସୁନ୍ଦରଗଡଜିଲ୍ଲାରେ ପ୍ଲାଣ୍ଟରେ ଶ୍ରମିକଙ୍କ ଦୁର୍ଘଟଣା ମାମଲା ବଢ଼ିବାରେ ଲାଗିଛି । କେତେବେଳେ ଗ୍ୟାସ୍ ଲିକ୍ ହୋଇ ତ କେତେବେଳେ ଭୟଙ୍କର ବିସ୍ଫୋରଣରେ ଚାଲିଯାଉଛି ନିରୀହ ଜୀବନ । ତେବେ ସୁନ୍ଦରଗଡ଼ ଜିଲ୍ଲାରେ ଥିବା ବିଭିନ୍ନ ଛୋଟ ବଡ଼ କାରଖାନାରେ ସୁରକ୍ଷା ଉପକରଣ ଅବହେଳା ଯୋଗୁଁ ଏଭଳି ଦୁର୍ଘଟଣା ଘଟୁଛି । ଏହାର ପ୍ରତିବାଦରେ ଶୁକ୍ରବାର ସୁନ୍ଦରଗଡ଼ ଶିଳ୍ପ ମଜଦୁର ୟୁନିୟନ ପକ୍ଷରୁ ରାଉରକେଲା ସ୍ଥିତ ଫ୍ୟାକ୍ଟ୍ରି ଓ ବଏଲର ଉପନିର୍ଦ୍ଦେଶକଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ତେବେ କାରଖାନାରେ ଶ୍ରମିକ ସୁରକ୍ଷାକୁ ନେଇ ଜିଲ୍ଲାର ବିଭିନ୍ନ କଳକାରଖାନାରେ କଡାକଡି ସୁରକ୍ଷା ବ୍ୟବସ୍ଥାକୁ ଲାଗୁ କରିବା ସହ କାର୍ଯ୍ୟକାରୀ କରିବା ପାଇଁ ଦାବି କରିଛନ୍ତି ଆନ୍ଦୋଳନକାରୀ ।
ସୁନ୍ଦରଗଡରେ ବିଭିନ୍ନ କାରଖାନାରେ ମାସକୁ ପ୍ରାୟ ୮ରୁ ୧୦ଟି ଜୀବନ ଯାଉଥିବା ଦେଖିବାକୁ ମିଳିଛି । ଜିଲ୍ଲାରେ ସ୍ପଞ୍ଜ୍ ଆଇରନ ଏବଂ ଷ୍ଟିଲ୍ ପ୍ଲାଣ୍ଟ୍ଗୁଡ଼ିକରେ କର୍ତ୍ତୃପକ୍ଷ ସୁରକ୍ଷାରେ ଅବହେଳା କରୁଥିବାରୁ ଏଭଳି ଦୁର୍ଘଟଣା ଘଟୁଥିବା କୁହାଯାଉଛି । ବିପଦସଙ୍କୁଳ ଅବସ୍ଥାରେ ଶ୍ରମିକମାନେ କାମ କରୁଥିବାରୁ ଶ୍ରମିକ ମୃତ୍ୟୁ ମାମଲା ବଢ଼ିବାରେ ଲାଗିଛି । ଏଥିସହ ପ୍ଲାଣ୍ଟଗୁଡ଼ିକର ପରିଚାଳନାରେ ସୁରକ୍ଷା ଉପକରଣ ଅବହେଳିତ ହୋଇ ରହିଥିବାରୁ ଏହି ଦୁର୍ଘଟଣା ଘଟୁଛି । ହେଲେ ବାରମ୍ବାର ଦୁର୍ଘଟଣା ମାମଲା ସାମ୍ନାକୁ ଆସୁଥିଲେ ମଧ୍ୟ ସ୍ଥାନୀୟ ଫ୍ୟାକ୍ଟ୍ରି ଏଣ୍ଡ୍ ବୋଏଲର ବିଭାଗ କାର୍ଯ୍ୟାନୁଷ୍ଠାନ ଶୂନ୍ୟ ରହିଥିବା ବେଳେ କାରଖାନା ଗୁଡ଼ିକରେ ସୁରକ୍ଷା ଯାଞ୍ଚ ହେଉନଥିବାରୁ ଏଭଳି ଦୁର୍ଘଟଣା ଘଟୁଥିବା ଅଭିଯୋଗ ସାମ୍ନାକୁ ଆସିଛି ।