ସୁନ୍ଦରଗଡ: ଆରକ୍ଷୀ ଅଧିକ୍ଷକଙ୍କ ମାନସ ପ୍ରକଳ୍ପ ଆମ ଘର ଏବେ ସାକାର ହେବାରେ ଲାଗିଛି । ଆମଘର ପ୍ରକଳ୍ପର ଏକ ନୂଆରୂପ ଭାବେ ‘ଆନନ୍ଦ ଘର' ପିଲାଙ୍କ ପାଇଁ ଲୋକାର୍ପିତ ହୋଇଛି ।
ସୁନ୍ଦରଗଡ ସଦର (ଆଦର୍ଶ )ଥାନାରେ ଆରକ୍ଷୀ ଅଧିକ୍ଷକ ବିଧିବଦ୍ଧ ଭାବେ ଏହାର ଶୁଭ ଉଦଘାଟନ କରିବା ସହ ଥାନାକୁ ଆସୁଥିବା ଛୋଟ ଛୋଟ ପିଲାଙ୍କ ପାଇଁ ଏହି ଆନନ୍ଦ ଘରକୁ ଭେଟି ଦେଇଛନ୍ତି । ଥାନାକୁ ବା ଥାନା ପରିସର ଯେପରି ପିଲାଙ୍କ ପାଇଁ ଭୟର ବାତବରଣ ସୃଷ୍ଟି ନ କରିବ ସେହି ଉଦ୍ଦେଶ୍ୟରେ ଏହାର ପରିକଳ୍ପନା କରାଯାଇଛି ।
କେତେକ ପିଲା ତାଙ୍କ ବାପା ଓ ମାଙ୍କ ଅପରାଧ ବା କୃତକର୍ମ ପାଇଁ ତାଙ୍କ ସହିତ ଆସିଥାନ୍ତି । ପିଲା ପୋଲିସ ପୋଷାକରେ ପୋଲିସଙ୍କୁ ଦେଖି ଭୟ କରିଥାନ୍ତି । ସେହି ଭୟକୁ ଦୂର କରିବା, ପୋଲିସ ଓ ଜନସାଧାରଣ ତଥା ପୋଲିସ ଥାନା ସହ ପିଲାଙ୍କ ମଧ୍ୟରେ ଥିବା ଭୟକୁ ଦୂର କରି ଥାନା ପରିସରକୁ ଏକ ସୌହାର୍ଦ୍ୟପୂର୍ଣ୍ଣ ବାତାବରଣରେ ପରିଣତ କରିବା ନେଇ ଏହି ପ୍ରକଳ୍ପର ସୃଷ୍ଟି ହୋଇଥିବା ଆରକ୍ଷୀ ଅଧୀକ୍ଷକ କହିଛନ୍ତି । ଏହି ଆନନ୍ଦ ଘର ଥାନା ମଧ୍ୟରେ ରଖାନଯାଇ ଥାନା ପରିସର ମଧ୍ୟରେ ରଖିବାର ପ୍ରମୁଖ କାରଣ ହେଲା ଶିଶୁଙ୍କ ନିରାପତ୍ତା । ଏହି ପରିସରରେ ଶିଶୁମାନେ ସେମାନଙ୍କ ଭାବନା ବ୍ୟକ୍ତ କରିବା ସହ ଖେଳ କୁଦ ଓ ପାଠ ମଧ୍ୟ ପଢିପାରିବେ ବୋଲି ଆରକ୍ଷୀ ଅଧିକ୍ଷକ କହିଛନ୍ତି ।
କେବଳ ସେତିକି ନୁହେଁ ଆଜି ସଦର ଥାନା ସମେତ ବଡଗାଁ, କୁତ୍ରା, ରାଜଗାଙ୍ଗପୁର, ବୀରମିତ୍ରପୁର ଓ ରିଜର୍ଭ ପୋଲିସ ପରିସରରେ ଏହି ବ୍ୟବସ୍ଥା କରାଯାଇଛି । ଏହି ଆନନ୍ଦ ଘରେ ଇ- ଲାଇବ୍ରେରୀ ସହ ଇଣ୍ଟରନେଟ ଶିକ୍ଷଣ ନେଇ ଜିଲ୍ଲା ପୋଲିସ ବ୍ୟବସ୍ଥା କରିଛି । ତେବେ ଆନନ୍ଦ ଘରରେ ଛୋଟ ଛୋଟ ଶିଶୁଙ୍କ ସହ 18ବର୍ଷରୁ କମ ପିଲା ମଧ୍ୟ ଏହାର ସୁଯୋଗ ନେଇ ପାରିବେ ବୋଲି ଆରକ୍ଷୀ ଅଧିକ୍ଷକ କହିଛନ୍ତି । ସୁନ୍ଦରଗଡରେ ଏହି ପ୍ରକଳ୍ପ ଆମ ଆରମ୍ଭ ହୋଇଥିବା ବେଳେ ଏହା ରାଜ୍ୟରେ ପ୍ରଥମ ବୋଲି ଜଣାପଡିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର,ଇଟିଭି ଭାରତ
