ରାଉରକେଲା: ଚାଲିଥିଲା ବାହାଘର । ଭୋଜି ପାଇଁ କ୍ୟାଟରିଂ ଦିଆଯାଇଥିଲା । ତେବେ ଭୋଜିରେ ସମସ୍ତ ବ୍ୟସ୍ତ ରହୁଥିବା ବେଳେ ଏହାର ସୁଯୋଗ ନେଲେ କ୍ୟାଟରିଂ ବେଶରେ ଆସିଥିବା ଚୋର । ସୁନାଗହଣା ଦେଖି ନିଜକୁ ଆୟତ୍ତ କରିପାରିନଥିଲେ । ଫଳରେ ସୁଯୋଗ ନେଇ ବାହାଘରରେ କଳାକନା ବୁଲାଇ ଫେରାର ହୋଇଯାଇଥିଲେ । ରାଉରକେଲା ସହରରୁ ସାମ୍ନାକୁ ଆସିଥିଲା ଏଭଳି ଘଟଣା । ଅନେଇ ପରିବାର ଲୋକ ଥାନାରେ ଏତଲା ଦେବାପରେ ୩ ଜଣ ଦୁର୍ବୃତ୍ତଙ୍କ ସହ ଦୁଇଜଣ ସହଯୋଗୀଙ୍କୁ ଗିରଫ କରିଲା ପୋଲିସ ।
ସୂଚନାଅନୁସାରେ, ରାଉରକେଲା ସହରର ଅଗ୍ରସେନ ଭବନରେ ମାର୍ଚ୍ଚ ୧୨ ତାରିଖରେ ଏକ ବାହାଘର ଚାଲିଥିବା ବେଳେ ଏଭଳି ଏକ ଘଟଣା ଘଟିଥିଲା । ତେବେ ବାହାଘର ଭୋଜି ଭାତ ଏବଂ ମଉଜ ମଜଲିସରେ ଲୋକେ ବ୍ୟସ୍ତ ଥିବା ବେଳେ ଏକ ଘରୋଇ କ୍ୟାଟରିଂ କମ୍ପାନୀ ଏହି ବାହାଘରର ଦାୟିତ୍ୱ ନେଇଥିଲା । ତେବେ ଏହି ଭୋଜି କାର୍ଯ୍ୟକ୍ରମ ପାଇଁ ଆସିଥିବା ଏହି କ୍ୟାଟରିଂ ସର୍ଭିସରେ ତିନି ଜଣ ଚୋର ମଧ୍ୟ ସାମିଲ ଥିଲେ । ବାହାଘର କାର୍ଯ୍ୟକ୍ରମରେ ଲୋକଙ୍କ ପାଖରେ ସୁନା ଗହଣା ଦେଖି ନିଜର ଲାଳସାକୁ ରୋକି ପାରି ନଥିଲେ।
ତେବେ ଲୋକେ ଗୋଟିଏ ପକ୍ଷରେ ବାହାଘର ଭୋଜି କାର୍ଯ୍ୟକ୍ରମରେ ବ୍ୟସ୍ତ ଥିବା ବେଳେ ଖୋଲା ଥିବା ବିଭିନ୍ନ ରୁମକୁ ଯାଇ ଲୋକଙ୍କ ବ୍ୟାଗରୁ ସୁନା ଗହଣା ଏବଂ ଟଙ୍କା ପଇସା ଚୋରି କରିନେଇ ଫେରାର ମାରିଥିଲେ । ବାହାଘର କାର୍ଯ୍ୟକ୍ରମ ସାରି ଲୋକେ ରୁମକୁ ଫେରିବା ବେଳେ ସୁନା ଗହଣା ଚୋରି ହୋଇଥିବା ଦେଖିବାକୁ ପାଇଥିଲେ । ସୁନା ଗହଣା ସହ ମୋବାଇଲ ଏବଂ ଟଙ୍କା ମଧ୍ୟ ଚୋରି ହୋଇଯାଇଥିବା ଅଭିଯୋଗ ହୋଇଥିଲା ।