ସୁବର୍ଣ୍ଣପୁର: ଅଜଣା ଜନ୍ତୁ ଭୟରେ ଆତଙ୍କିତ ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଳକର କୁମୁରସିଂହା ଗାଁ । କେଉଁ ଜନ୍ତୁ ଏଭଳି ଆକ୍ରମଣ କରୁଛି ତାହାର କାରଣ ଖୋଜିବାରେ ଲାଗିଛି ବନବିଭାଗ ।
ଭିଡିଓ ସୌଜନ୍ୟ: ପ୍ରତିନିଧି, ସୁବର୍ଣ୍ଣପୁର ସୂଚନା ଅନୁଯାୟୀ, ଗତ ଦୁଇ ଦିନ ତଳେ ଅଜଣା ଜଙ୍ଗଲି ଜନ୍ତୁ ଆକ୍ରମଣରେ ଗାଁର କପିଳ ମହାକୁରଙ୍କ 25ଟି ମେଣ୍ଢାର ମୃତ୍ୟୁ ଓ 10ଟି ମେଣ୍ଢା ଗୁରୁତର ଭାବେ ଆହତ ହୋଇଥିବା ଅଭିଯୋଗ ହୋଇଥିଲା । ଜଙ୍ଗଲ ବିଭାଗ ଘଟଣାସ୍ଥଳକୁ ପହଞ୍ଚି ମେଣ୍ଢା ପାଳକ କପିଳ ମହାକୁର ସହିତ ଆଲୋଚନା କରି ମେଣ୍ଢାଗୁଡିକର ଶବ ବ୍ୟବଛେଦ କରାଯାଇଥିଲା ।
ତେବେ କେଉଁ ଜନ୍ତୁ ଆକ୍ରମଣରେ ମେଣ୍ଢାମାନଙ୍କ ମୃତ୍ୟୁ ହୋଇଛି ତାହା ଜାଣିବା ପାଇଁ ଜଙ୍ଗଲ ବିଭାଗ ଗାଁରେ ଦୁଇଟି ସିସିଟିଭି କ୍ୟାମେରା ଲଗାଇବା ସହିତ ବନ କର୍ମଚାରୀମାନେ ଗାଁକୁ ଜଗିଥିଲେ ।
ହେଲେ ସିସିଟିଭିରେ କୌଣସି ଜଙ୍ଗଲି ଜନ୍ତୁ ଗାଁକୁ ଆସିଥିବା ଫୁଟେଜରେ ଜଣା ପଡିନାହିଁ । ଏପଟେ କପିଳ ମହାକୁରଙ୍କ ମେଣ୍ଡା ଗୁଡିକୁ ଦଳବଦ୍ଧ ଭାବେ ଗଧିଆ ଆକ୍ରମଣ କରିଥିବା ଜଙ୍ଗଲ ବିଭାଗ ଅନୁମାନ କରୁଥିବା ବେଳେ ଶବ ବ୍ୟବଛେଦ ରିପୋର୍ଟ ମିଳିବା ପରେ ତାହା ସ୍ପଷ୍ଟ ହେବ ବୋଲି କହିଛି ।
ଅନ୍ୟପଟେ ଅଜଣା ଜନ୍ତୁ ଆକ୍ରମଣ ଯୋଗୁଁ ଗାଁରେ ଭୟର ବାତାବରଣ ଥିବାବେଳେ ଜଙ୍ଗଲ ବିଭାଗ ପକ୍ଷରୁ କର୍ମଚାରୀମାନଙ୍କୁ ଗାଁରେ ରାତ୍ରୀରେ ମୁତୟନ କରାଯାଇଛି । ମେଣ୍ଢା ପାଳକ କପିଳ ମହାକୁର ମେଣ୍ଢା ମୃତ୍ୟୁର କାରଣ ଖୋଜିବା ସହିତ କ୍ଷତିପୂରଣ ଦେବାକୁ ଦାବି କରିଛନ୍ତି ।
ଅପରପକ୍ଷରେ ଜିଲ୍ଲା ବନ ଅଧିକାରୀ ଏହି ଘଟଣାରେ ବେଶ ସମ୍ବେଦନଶୀଳ ଥିବାବେଳେ 11ଟି ମେଣ୍ଢା ମୃତ୍ୟୁ ହୋଇଥିବା ଏବଂ ଆଠଗୋଟି ମେଣ୍ଢା ଗୁରୁତର ଆହତ ହୋଇଥିବା ତଦନ୍ତରୁ ଜଣାପଡିଥିବା କହିଛନ୍ତି । ଗୁରୁତର ମାନଙ୍କ ଚିକିତ୍ସା ଚାଲିଥିବା ବେଳେ ସରକାରୀ ନିୟମ ଅନୁଯାୟୀ ମେଣ୍ଢାପାଳକ କପିଳକୁ ସରକାରୀ ସହାୟତା ଯୋଗାଇ ଦିଆଯିବ ବୋଲି କହିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
