ସୁବର୍ଣ୍ଣପୁର: ଜିଲ୍ଲାରେ ଏଥର ଆଉ ରଥାରୂଢ ହେବେ ନାହିଁ ଶ୍ରୀ ଜଗନ୍ନାଥ । ମହମାରୀକୁ ଆଖି ଆଗରେ ରଖି ଚଳିତ ଥର ରଥଯାତ୍ରା ପାଳନ ନ କରିବାକୁ ହାଇକୋର୍ଟ ଚଳିତ ଥର ନିଷ୍ପତି ନେଇଛନ୍ତି । ଯାହାକୁ ସମ୍ମତି ଜଣାଇଛନ୍ତି ଜିଲ୍ଲା ଦେବୋତ୍ତର ବିଭାଗ ଓ ଯାତ୍ରା କମିଟି । ଏପରିକି ସର୍ବ ସାଧାରଣ ଦର୍ଶନ ପାଇଁ ବି ବାରଣ କରାଯାଇଛି। କେବଳ ନୀତିକାନ୍ତି କରାଯିବ ।
ସହରର ଶ୍ରୀ ବଡ ଜଗନ୍ନାଥ ଓ ଶ୍ରୀ ଦଧିବାମନ ଦେବ ରଥଯାତ୍ରା ଦିନ ପହଣ୍ଡି ହୋଇ ମନ୍ଦିର ପରିସରସ୍ଥିତ ଏକ ମଣ୍ଡପରେ ବିରାଜମାନ ହେବେ। ଏହି ମଣ୍ଡପରେ ରୀତିନୀତି ଅନୁଯାୟୀ ତିନି ବିଗ୍ରହ ବିଭିନ୍ନ ବେଶ ଧାରଣ କରିବେ। ସେହିପରି ବାହୁଡା ଦିନ ତିନି ବିଗ୍ରହ ପୁଣି ସିଂହାସନ ଆରୋହଣ କରିବା ପାଇଁ ଜିଲ୍ଲା ଦେବୋତ୍ତର କମିଟି ନିଷ୍ପତି ନେଇଛି। ସେହିପରି ଜିଲ୍ଲା ଦେବୋତ୍ତର ଅଧିକାରୀ ଓ ଉପ ଜିଲ୍ଲାପାଳ ନରେନ୍ଦ୍ର କଁଅର ପୌରହିତ୍ୟରେ ଆୟୋଜିତ ବୈଠକରେ ସୀମିତ ସଂଖ୍ୟକ ସେବାୟତ ଏହି କାର୍ଯ୍ୟ ସମ୍ପାଦନ କରିବେ । ସାମାଜିକ ଦୂରତା ପାଳନ କରିବେ ଓ ମାସ୍କ ପରିଧାନ କରିବେ ବୋଲି କୁହାଯାଇଛି। ତେବେ ଏଥର ବି ଶ୍ରଦ୍ଧାଳୁ ରଥାରୁଢ଼ ଶ୍ରୀ ଜଗନ୍ନାଥ ଓ ବିଗ୍ରହଙ୍କ ବେଶ ଦେଖିବାରୁ ବଞ୍ଚିତ ହେବେ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା ,ଇଟିଭି ଭାରତ