ସୁବର୍ଣ୍ଣପୁର: ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟକୁ ସମ୍ବଲପୁର ଡିଭିଜନରେ ମିଶ୍ରଣ ପାଇଁ ସରକାରୀ ସ୍ତରରେ ବ୍ୟାପକ ଆଲୋଚନା ଚାଲିଛି । ସରକାର ଚୁଡାନ୍ତ ନିଷ୍ପତ୍ତି ନେବା ପୂର୍ବରୁ ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ନ ଉଠାଇବାକୁ ଦାବି କରିଛି ବିଜେପି । ଡିଏଫଓଙ୍କ କାର୍ଯ୍ୟାଳୟ ସ୍ଥାନାନ୍ତର ହେଲେ ଜିଲ୍ଲାରେ ଜୋରଦାର ଆନ୍ଦୋଳନ କରାଯିବ ବୋଲି ବିଜେପି ନେତା ବଳଦେବ ବେଦବାଗ ଧମକ ଦେଇଛନ୍ତି ।
ସୁବର୍ଣ୍ଣପୁରର ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟକୁ ଉଠାଇବାକୁ ଚାଲିଛି ଚକ୍ରାନ୍ତ । ଜିଲ୍ଲାରେ ବ୍ୟାପକ ପରିମାଣର ଜଙ୍ଗଲ ରହିଛି । ପୁରୁଣା ଜଙ୍ଗଲର ପୁନଃରୁଦ୍ଧାର ସାଙ୍ଗକୁ ସାମାଜିକ ବନୀକରଣ ଯୋଜନା ଚାଲିଛି । ସେହିପରି ଜିଲ୍ଲାରେ ଅସାମାଜିକ ଲୋକେ ବନ୍ୟଜନ୍ତୁଙ୍କ ଶିକାର କରୁଛନ୍ତି । ଜିଲ୍ଲାର ସିଂହାସନ ଜଙ୍ଗଲ ଓ ବାରପାହାଡ ଜଙ୍ଗଲରେ ପ୍ରାୟ 25ରୁ ଅଧିକ ହାତୀ ବ୍ୟାପକ ପରିମାଣରେ ଫସଲ ନଷ୍ଟ କରୁଛନ୍ତି । ଘରଦ୍ବାର ଭାଙ୍ଗିବା ସହିତ ହାତୀପଲ ଅନେକ ଧନ ଜୀବନ ନଷ୍ଟ କରୁଛନ୍ତି । ତେବେ କ୍ଷତିଗ୍ରସ୍ତ ଲୋକେ ବନ ବିଭାଗର ସହଯୋଗରୁ ବଞ୍ଚିତ ହେଲେ ଡିଏଫଓଙ୍କ କାର୍ଯ୍ୟାଳୟକୁ ଆସି ନିଜ ଦାବି ଉପସ୍ଥାପନ କରିବା ସହିତ ସରକାରୀ ସହାୟତା ବି ପାଉଛନ୍ତି । ତେବେ ଡିଏଫଓ ଅଫିସ ଉଠିଗଲେ ପୂର୍ବଭଳି ବଲାଙ୍ଗୀର ଓ ସମ୍ବଲପୁର ଡିଭିଜନରେ ଜିଲ୍ଲାର ଜଙ୍ଗଲ ଓ ରେଞ୍ଜ ଦୁଇଭାଗ ହୋଇଯିବ । ଫଳରେ ଲୋକେ ଆଉ ବନବିଭାଗ ପାଖରୁ ଆବଶ୍ୟକ ସହଯୋଗ ପାଇବେ ନାହିଁ ବୋଲି ବିଜେପି ଅଭିଯୋଗ କରିଛି ।