ସୁବର୍ଣ୍ଣପୁର: ଆଗକୁ ଆସୁଛି ଭାଦ୍ରବ ମାସ ସପ୍ତପୁରୀ ଅମାବାସ୍ୟା । ଏନେଇ ସହରରେ ପାଳିତ ହେବ ଐତିହାସିକ ବିଶ୍ବ ପ୍ରସିଦ୍ଧ ଲଙ୍କାପୋଡି ପର୍ବ । ଦିନ ବେଳା କାଠରେ ନିର୍ମିତ ହାତୀ ଘୋଡା ତ ସନ୍ଧ୍ୟାରେ ମାଟି ତିଆରି ଟେରାକୋଟା ହନୁମାନଙ୍କୁ ନେଇ ଚଳଚଞ୍ଚଳ ହେବ ଏହି ପର୍ବ । ଏହି ବିଶ୍ବପ୍ରସିଦ୍ଧ ପର୍ବକୁ ନେଇ ସହରବାସୀ ଉତ୍ସାହିତ ଥିବା ବେଳେ କୁମ୍ଭାର କାରିଗରମାନେ ଲାଗି ପଡିଛନ୍ତି ଖେଳ ସାମଗ୍ରୀ ତିଆରିରେ ।
ପଶ୍ଚିମ ଲଙ୍କା ବୋଲି କୁହାଯାଉଥିବା ସୁବର୍ଣ୍ଣପୁରରେ ପ୍ରତିବର୍ଷ ପାଳିତ ହୁଏ ଏହି ପର୍ବ । ସାରା ବିଶ୍ବରେ କେବଳ ଏହି ସହରରେ ହିଁ ରାମାୟଣ ବର୍ଣ୍ଣିତ ହନୁମାନଙ୍କର ଲଙ୍କାପୋଡି ଉତ୍ସବ ପାଳନ କରାଯାଏ । ମଧ୍ୟାହ୍ନରେ କାଠ ତିଆରି ହାତୀ ଘୋଡା ଆଦିକୁ ନେଇ ପୁଅମାନେ ଖେଳ ଖେଳନ୍ତି । ଅନ୍ୟପଟେ କୁନି କୁନି ଝିଅମାନେ ମାଟି ତିଆରି କାଣ୍ଢିକୁଞ୍ଚିକୁ ନେଇ ଖେଳ ଖେଳିଥାନ୍ତି । ଆଉ ସନ୍ଧ୍ୟାରେ ମାଟି ତିଆରି ଟେରାକୋଟା ହନୁମାନଙ୍କର ଲାଞ୍ଜରେ ନିଆଁ ଲଗାଇ ଆରମ୍ଭ ହୁଏ ଉତ୍ସବ ପାଳନ ।
ସାଧାରଣ ହନୁମାନଙ୍କଠାରୁ କିଛିଟା ଅଲଗା ଭାବେ ହାତରେ ତିଆରି ହୁଏ ମାଟିର ଟେରାକୋଟା ହନୁମାନ । ଯାହା ଏହି ପର୍ବର ମୁଖ୍ୟ ଆକର୍ଷଣ । ଏହି ପର୍ବରେ କୁନି ପୁଅ ଓ ଝିଅମାନଙ୍କ ପାଇଁ ଅଭିଭାବକମାନେ ନିଜକୁ ପ୍ରସ୍ତୁତ କରି ସାରିଛନ୍ତି । ଏହି ପର୍ବରେ ବ୍ୟବହାର ହେଉଥିବା କାଠ ଓ ମାଟି ତିଆରି ଖେଳ ସାମଗ୍ରୀ ବିକ୍ରିବଟାକୁ ନେଇ ବି ବେଶ ଖୁସି ଅଛନ୍ତି କାରିଗର ।