ବଳି ଯାତ୍ରା ପାଇଁ ଅମଙ୍ଗ ସେବାୟତ

ବର୍ଷ ବର୍ଷ ଧରି ଭୂ ସମ୍ପତ୍ତି ଭୋଗ କରୁଥିଲେ ମଧ୍ୟ ବଳି ଯାତ୍ରା ପାଇଁ ଅମଙ୍ଗ ହେଉଛନ୍ତି ସେବାୟତ । ସମ୍ପତ୍ତି ଭୋଗ କରୁଛନ୍ତି କିନ୍ତୁ ପୂଜା ସେବା କରିବା ପାଇଁ ଅର୍ଥ ଦାବି କରୁଛନ୍ତି ଯାହା ଭୂ-ଦଲିଲ ବିରୋଧୀ କାର୍ଯ୍ୟ ।

ସୁବର୍ଣ୍ଣପୁର: ଆଗକୁ ଆସୁଛି ସୁବର୍ଣ୍ଣପୁରର ଐତିହାସିକ ବଳିଯାତ୍ରା । ବଳିଯାତ୍ରା କମିଟି ଓ ଦେବୋତ୍ତର ବିଭାଗ ମଧ୍ୟ ଯାତ୍ରା ପାଇଁ ନିଜକୁ ପ୍ରସ୍ତୁତ କରୁଛି । ହେଲେ ସେବାୟତମାନଙ୍କ ଅସହଯୋଗ ପାଇଁ ବଳି ଯାତ୍ରା ପାଳନ ଆଶା ଓ ଆଶଙ୍କା ଭିତରେ ରହିଛି । ରାଜାରାଜୁଡା ଅମଳରୁ ହଜାର ହଜାର ଏକର ଭୂ-ସମ୍ପତ୍ତି ଭୋଗ କରି ଆସୁଥିଲେ ହେଁ ଦେବୀ ସେବା ପୂଜା ଓ ବଳି ପାଳନ ପାଇଁ ଅମଙ୍ଗ ହେଉଛନ୍ତି ସେବାୟତ ।

ଭୂ-ଦଲିଲ ମୁତାବକ ପୂଜା ସେବା କରୁଥିବା ଯାଏଁ ସେବାୟତମାନେ ଭୂ-ସମ୍ପତ୍ତି ଭୋଗ କରିବେ । ଦେବୀ ପୀଠର ନିତି ଦିନିଆ ଖର୍ଚ୍ଚ ବି ତୁଲାଇବେ । ହେଲେ ଏହାକୁ ବେଖାତିର କରି ଅର୍ଥ ଦାବି କରୁଛନ୍ତି ସେବାୟତମାନେ ।

ଦେବୀମାନଙ୍କ ସେବା ପୂଜା ଓ ବଳି ଯାତ୍ରା ପାଇଁ ତତ୍କାଳୀନ ରାଜା ସକମା ଗାଁରେ 500 ଏକର ଜମିର ବ୍ୟବସ୍ଥା କରିଥିଲେ । ସେହିପରି ପୁରୋହିତ, ଡାଙ୍ଗୁଆ ଓ ଛିପି ଆଦି 36ଟି ସମ୍ପ୍ରଦାୟର ସେବାୟତମାନଙ୍କ ପାଇଁ ସଦର ମହକୁମାରେ 500 ଏକର ଜମିର ବ୍ୟବସ୍ଥା କରିଥିଲେ । ହେଲେ ପୀଢ଼ି ପରେ ପୀଢ଼ି ଭୂ-ସମ୍ପତ୍ତିକୁ ସେବାୟତମାନେ ଭୋଗ କରୁଥିଲେ ମଧ୍ୟ ପୂଜା ସେବାରୁ ନିଜକୁ ନିବୃତ୍ତ ରଖୁଛନ୍ତି ।

ସେପଟେ ହାଇକୋର୍ଟଙ୍କ ରହିତାଦେଶ ପାଇଁ ଜମି ବ୍ୟାଜ୍ୟାପ୍ତି ପରି କାର୍ଯ୍ୟାନୁଷ୍ଠାନ ନିଆଯାଇ ପାରୁନାହିଁ ବୋଲି ଉପଜିଲ୍ଲାପାଳ ତଥା ଦେବୋତ୍ତର ଅଧିକାରୀ କହିଛନ୍ତି ।

ଆଜକୁ ଦେଢ଼ ଦଶନ୍ଧି ହେଲା ସକମା ଗାଁର ସେବାୟତମାନେ ବଳି ଯାତ୍ରାରେ ସାମିଲ ହେଉ ନାହାନ୍ତି । ଏଥର ବି ଅନେକ ସେବାୟତ ବଳି ପାଇଁ ଢେର ଅର୍ଥ ଦାବି କରୁଛନ୍ତି । ତଥାପି ଦେବୋତ୍ତର ବିଭାଗ ଏହି ଐତିହାସିକ ବଳି ଯାତ୍ରା ପାଳନ କରିବାକୁ ନିଷ୍ପତ୍ତି ନେଇଛି ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ