ସୁବର୍ଣ୍ଣପୁର:ଖୁବଶୀଘ୍ର ଆରମ୍ଭ ହୋଇପାରେ ସୁବର୍ଣ୍ଣପୁର ସହରର ତେଲନଦୀରୁ ମହାନଦୀ ପୋଲ ଯାଏଁ ରାସ୍ତା ନିର୍ମାଣ କାର୍ଯ୍ୟ । କ୍ଷତିଗ୍ରସ୍ତ ହେବାକୁ ଥିବା ରୟତ ପ୍ରଜା ଜମି ନ ଛାଡିବା ଯୋଗୁଁ ଦୁଇ ବର୍ଷ ହେଲଣି ଅଧାପନ୍ତରିଆ ଭାବେ ନିର୍ମାଣ କାର୍ଯ୍ୟ ପଡି ରହିଥିଲା । ଶନିବାର ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଆୟୋଜିତ ହୋଇଥିବା ଜନ ଶୁଣାଣିରେ କ୍ଷତିଗ୍ରସ୍ତ ପ୍ରଜାମାନେ ନିଜ ଜମି ସରକାରଙ୍କୁ ପ୍ରଦାନ କରିବା ପାଇଁ ସମ୍ମତି ପ୍ରଦାନ କରିଛନ୍ତି । ହେଲେ ଏହା ବଦଳରେ ସେମାନେ ବଜାର ମୂଲ୍ୟର ଚାରିଗୁଣ କ୍ଷତିପୂରଣ ଦାବି କରିଛନ୍ତି ।
ପୂର୍ବରୁ ସରକାରୀ ଭାବେ ଜମିର ମୂଲ୍ୟ ଅତି କମ୍ ଥିବାରୁ କ୍ଷତିଗ୍ରସ୍ତ ରୟତ ପ୍ରଜା ରାସ୍ତା ପ୍ରଶସ୍ତିକରଣ ପାଇଁ ନିଜ ଜମି ଛାଡିବାକୁ ନାରାଜ ହୋଇଥିଲେ । ଯେଉଁ କାରଣରୁ ଏହି ସାଢେ ତିନି କିଲୋମିଟର ରାସ୍ତା ନିର୍ମାଣ କାର୍ଯ୍ୟକୁ ଇତିମଧ୍ୟରେ ଦୁଇ ବର୍ଷ ପୂରି ଯାଇଥିବାବେଳେ ମାତ୍ର 40 ପ୍ରତିଶତ ନିର୍ମାଣ କାର୍ଯ୍ୟ ଶେଷ ହୋଇଛି । ଏବେସୁଦ୍ଧା ମହାନଦୀରୁ ଜିଲ୍ଲା ସାମ୍ବାଦିକ ସଂଘ ପର୍ଯ୍ୟନ୍ତ ରାସ୍ତା ନିର୍ମାଣ କାର୍ଯ୍ୟ ସରିଛି । ବାକି 60 ପ୍ରତିଶତ କାର୍ଯ୍ୟ ଜମି ଅଧିଗ୍ରହଣ ହୋଇ ପାରିନଥିବାରୁ କାମ ଅଧାରେ ପଡିରହିଛି । ତେବେ 6 କୋଟି 69 ଲକ୍ଷ ଟଙ୍କା ବ୍ୟୟ ଅଟକଳରେ 20 ମିଟର ପ୍ରଶସ୍ତ ଚାରି ଥାକିଆ ରାସ୍ତା ନିର୍ମାଣ ପୁଣି ଶୀଘ୍ର ଆରମ୍ଭ ହେବ ବୋଲି ସହରବାସୀ ଆଶା କରୁଛନ୍ତି ।