ସୁବର୍ଣ୍ଣପୁର: ବିନିକା ବ୍ଲକ ସିନ୍ଦୁରପୁର ମହିଳା ଓ ଶିଶୁ ବିକାଶ ପ୍ରକଳ୍ପର ଅଙ୍ଗନବାଡି କର୍ମୀମାନେ ସୁପରଭାଇଜରଙ୍କ ବଦଳି ଦାବିରେ ଆନ୍ଦୋଳନ କରୁଛନ୍ତି । ଗତ ନଭେମ୍ବର 9ରେ ସିନ୍ଦୁରପୁର ସୁପରଭାଇଜର ସୀତା ମେହେରଙ୍କ ବଦଳି ଦାବି କରି ଅଙ୍ଗନବାଡି କର୍ମୀମାନେ କାର୍ଯ୍ୟ ବନ୍ଦ ଆନ୍ଦୋଳନ କରିବା ସହିତ ମହିଳା ଓ ଶିଶୁ ବିକାଶ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି ।
ଭିଡିଓ ସୌଜନ୍ୟ: ପ୍ରତିନିଧି ସୁବର୍ଣ୍ଣପୁର
ଗତ 10 ଦିନ ହେଲା 41ଟି କେନ୍ଦ୍ରରେ ପାଚିକାମାନେ କାର୍ଯ୍ୟଭାର ନେଇ ଥିବା ବେଳେ ଅଙ୍ଗନବାଡ଼ି କର୍ମଚାରୀମାନେ ଛୁଟିରେ ଅଛନ୍ତି । ସୁପରଭାଇଜରଙ୍କ ବଦଳି ନହେବା ଯାଏଁ କାର୍ଯ୍ୟରେ ଯୋଗ ଦେବେ ନାହିଁ ବୋଲି ସେମାନେ କହିଛନ୍ତି । ପୂର୍ବରୁ ଅଙ୍ଗନବାଡି କେନ୍ଦ୍ରର କର୍ମୀ ଓ ସହାୟିକାମାନେ ସୁପରଭାଇଜରଙ୍କ କାର୍ଯ୍ୟରେ ଅସନ୍ତୁଷ୍ଟ ଥିବା ସିଡିପିଓଙ୍କ ପାଖରେ ଅଭିଯୋଗ କରିଥିଲେ । କର୍ମୀମାନଙ୍କୁ ବିଭିନ୍ନ ପ୍ରକାରର ଧମକ ଚମକ ଦେବା ସହିତ ସରକାରୀ ନିର୍ଦ୍ଦେଶକୁ ଅବମାନନା କରୁଥିବା ଅଭିଯୋଗ ହୋଇଥିଲା ।